(បន្ទាយមានជ័យ) ក្នុងឱកាសដ៏មង្គលថ្លៃថ្លា និងជាចំណងដៃនៃខួបកំណើតក្នុងជន្មាយុ៥១ឆ្នាំឈានចូល៥២ឆ្នាំរបស់លោក យឹម សំណាង អភិបាលរង ខេត្តបន្ទាយមានជ័យ រួមជាមួយលោក ស្រេង សុផល អភិបាលក្រុងសិរីសោភ័ណ និងព្រះអង្គ ង៉ែត សម្ផស្ស ជំនួយការផ្ទាល់របស់ព្រះវិរៈមុន្នី វ៉ា ចិន្តា ព្រះមេគណខេត្តបន្ទាយមានជ័យ និងជាម្ចាស់អាស្រមវិបស្សនារាម ផ្លូវលេខ៧ ស្ថិតនៅក្នុងភូមិសូភី២ សង្កាត់កំពង់ស្វាយ ក្រុងសិរីសោភ័ណ មានទឹកចិត្តសប្បុរធម៌ បាននាំយកគ្រឿងឧបភោគ បរិភោគ និងថវិកាមួយចំនួនចែកជូនដល់បុគ្គលិកក្រុមហ៊ុន (ហ្គា.អី.យា ភី.អិល.ស៊ី) សាខាក្រុងសិរីសោភ័ណ ៣០គ្រួសារ នាថ្ងៃទី៧ ខែមេសា ឆ្នាំ២០២៦។
ក្នុងនាមរដ្ឋបាលក្រុងសិរីសោភ័ណលោក ស្រេង សុផល អភិបាលក្រុងសិរីសោភ័ណ បានថ្លែងអំណរគុណយ៉ាងជ្រាលជ្រៅ ចំពោះលោក យឹម សំណាង អភិបាលរង ខេត្ត និងព្រះអង្គ ង៉ែត សម្ផស្ស ម្ចាស់អាស្រមវិបស្សនារាម ផ្លូវលេខ៧ ដែលបាននាំយកគ្រឿងឧបភោគ បរិភោគចែកជូនដល់បុគ្គលិកក្រុមហ៊ុន(ហ្គា.អី.យា ភី.អិល.ស៊ី) សាខាក្រុងសិរីសោភ័ណ នាពេលនេះ គឺជាការជួយសម្រាលទុកជូនពួកគាត់ ហើយក៏ជាផ្នែកមួយដែលយើងមិនអាចភ្លេចបានក្នុងការជួយគាំទ្រលើកទឹកចិត្ត និងក៏ដូចជាការជួយសម្រាលបន្ទុកបានមួយគ្រា។
មានប្រសាសន៍សំណេះសំណាលនាឱកាសនោះលោក យឹម សំណាង អភិបាលរង ខេត្ត បានមានប្រសាសន៍លើកឡើងថា៖ ឆ្នាំនេះខួបកំណើតលោក មិនមានអ្វីច្រើនទេ មានតែអំណោយជាសម្ភារៈគ្រឿងឧបភោគ បរិភោគ និងថវិកាមួយចំនួន ជាទឹកចិត្តសប្បុរសធម៌បានមកពីព្រះអង្គ ង៉ែត សម្ផស្ស ម្ចាស់អាស្រមវិបស្សនារាម ផ្លូវលេខ៧ យកមកចែកជូនដល់បុគ្គលិកក្រុមហ៊ុន (ហ្គា.អី.យា ភី.អិល.ស៊ី) សាខាក្រុងសិរីសោភ័ណនាពេលនេះ។
លោក យឹម សំណាង និងព្រះអង្គ ង៉ែត សម្ផស្ស ក៏បានសំណូមពរដល់ពួកគាត់ត្រូវខិតខំថែរក្សាសុខភាពឱ្យបានល្អដោយប្រកាន់យកនូវអនាម័យល្អ ហូបស្អាត ផឹកស្អាត រស់នៅស្អាត និងសូមបង្កើនការប្រុងប្រយ័ត្នអោយបានខ្ពស់ ដោយសារអាកាសធាតុមានការប្រែប្រួល។
សម្រាប់គ្រឿងឧបភោគ បរិភោគចែកជូនបុគ្គលិកក្រុមហ៊ុន(ហ្គា.អី.យា ភី.អិល.ស៊ី) ៣០គ្រួសារ ក្នុងមួយគ្រួសារទទួលបាន៖១,អង្ករ ២៥គីឡូក្រាម ២,ស្ករស ១គីឡូ ៣,ប៊ីចេង ១កញ្ចប់ ៤,មី ៦កញ្ចប់ ៥,ទឹកត្រី១ដប ៦,ទឹកស៊ីអ៊ីវ ១ដប ៧,ទឹកសុទ្ធ ១យួរ ៨,ថវិការមួយចំនួនផងដែរ៕
