បន្ទាយមានជ័យ ៖ ថ្នាក់ដឹកនាំខេត្តបន្ទាយមានជ័យ ដឹកនាំដោយឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ទទួលបដិសណ្ឋារកិច្ចគណៈប្រតិភូខេត្តដុងថាប់ នៃសាធារណរដ្ឋសង្គមនិយមវៀតណាម ដឹកនាំដោយឯកឧត្តម ត្រឹន ទួន អាញ អគ្គកុងស៊ុលវៀតណាម ប្រចាំខេត្តបាត់ដំបង និងឯកឧត្តម ផាម វ៉ាន់អាន អនុលេខាធិការគណៈកម្មាធិការគណបក្សខេត្ត និងជាអនុប្រធានគណៈកម្មាធិការប្រជាជនខេត្តដុងថាប់ រួមនឹងប្រតិភូអមដំណើរ បានអញ្ជើញមកបំពេញទស្សនកិច្ច និងជូនពរឆ្នាំថ្មី ប្រពៃណីជាតិខ្មែរ ដល់ថ្នាក់ដឹកនាំ និងប្រជាជនក្នុខេត្តបន្ទាយមានជ័យ ។ពិធីនេះបានប្រារព្ធឡើងធ្វើនៅសាលប្រជុំ ក សាលាខេត្តបន្ទាយមានជ័យ នាព្រឹកថ្ងៃទី២៥ ខែមីនា ឆ្នាំ២០២៦ ។
នាឱកាសនោះប្រតិភូដែលខេត្តដុងថាប់ ក៏បានធ្វើការជូនពរឯកឧត្តម អ៊ុំ រាត្រី អភិបាលនៃគណៈអភិបាលខេត្ត ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ព្រមទាំងមន្ត្រីរាជការនិងប្រជាជនទូទាំងខេត្តបន្ទាយមានជ័យក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដែលនឹងឈានមកដល់នាពេលដ៏ខ្លីខាងមុខ ទទួលបាននូវក្តីសុខសប្បាយ ទទួលសុខសន្តិភាព នឹងខេត្តកាន់តែមានការអភិវឌ្ឍរីកចម្រើនទៅមុខជាលំដាប់។
ក្នុងឱកាសនោះ ឯកឧត្ដម អ៊ុំ រាត្រី ក៏បានលើកឡើងពីទំនាក់ទំនងគ្នាល្អរវាងកម្ពុជា–វៀតណាម ពិសេសខេត្តបន្ទាយមានជ័យ និងខេត្តដុងថាប់ ដែលផ្សារភ្ជាប់យ៉ាងជិតស្និទ្ធលើគ្រប់កាលៈទេសៈ និងជួយជ្រោមជ្រែងគ្នាទៅវិញទៅមក ដោយឈរលើស្មារតីសាមគ្គីស្អិតរមួត រួមគ្នាជាធ្លុងមួយតស៊ូប្រយុទ្ធប្រឈមនឹងបញ្ហា ការលំបាកនានា និងបានឆ្លងកាត់ភ្លើងសង្រ្គាមជាមួយគ្នាតាំងពីដើមរៀងមក ក្នុងការប្រយុទ្ធសត្រូវរួម ដើម្បីឯករាជ្យភាព សេរីភាព នៃប្រជាជនទាំង២។
ឯកឧត្តម ផាម វ៉ាន់អាន អនុលេខាធិការគណៈកម្មាធិការគណបក្សខេត្ត និងជាអនុប្រធានគណៈកម្មាធិការប្រជាជនខេត្តដុងថាប់ ក៏បានបញ្ជាក់ សម្តែងនូវមនោសញ្ចេតនា និងបង្ហាញពីចំណងមិត្តភាពយ៉ាងជិតស្និទ្ធស៊ីជម្រៅរវាងខេត្តទាំង២ និងប្តេជ្ញាបន្តរក្សាទំនាក់ទំនងមួយនេះឱ្យនៅស្ថិតស្ថេរយូរអង្វែង។ ក្នុងនាមប្រទេសទាំងពីរគឺជាប្រទេសភូមិផងរបងជាមួយ ក៏ដូចជាដើម្បីរឹតចំណងមិត្តភាព មេត្រីភាពរវាងប្រជាជន និងប្រជាជន ក៏ដូចជាប្រទេសទាំង២ ខេត្តដុងថាប ក៏និងផ្តល់អារហារូបណ៍ជូនដល់និស្សិតរបស់ខេត្តបន្ទាយមានជ័យ ដើម្បីទៅសិក្សានៅប្រទេសវៀណាម ពាក់ព័ន្ធវិស័យកសិកម្ម ក៏ដូចជាវិស័យពាក់ព័ន្ធមួយចំនួន។
ក្នុងនោះថ្នាក់ដឹកនាំខេត្ត និងប្រជាជនកម្ពុជា បានចងចាំជានិច្ចនូវគំរូវីរៈភាពដ៏អង់អាចក្លាហានរបស់វីរៈយុទ្ធជន នៃកងទ័ពទាំងពីរ ដើម្បីបុព្វហេតុជាតិមាតុភូមិ។ផ្តើមចេញពីស្មារតីនេះ ចំណងមិត្តភាព សាមគ្គីភាព ដ៏មានសារៈសំខាន់ និងជាសក្ខីភាព ខេត្តបន្ទាយមានជ័យបានសង់ស្តូបមិត្តភាពកម្ពុជា–វៀតណាម មួយកន្លែងស្ថិតនៅសង្កាត់ទឹកថ្លា ក្រុងសិរីសោភ័ណ ដែលបង្ហាញអំពីអត្ថន័យប្រកៀកស្មាគ្នា ជួយគ្នាទៅវិញទៅមក ក្នុងបុព្វហេតុជាតិមាតុភូមិរបស់ខ្លួន និងជាសិលាចារឹកទុកជាប្រវត្ថិសាសន៍៕
