ខេត្តបន្ទាយមានជ័យ៖ ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមខេត្តបន្ទាយមានជ័យ ឯកឧត្តម ឈើយ ចាន់ណា អនុប្រធានកិត្តិយសនិងសមាជិកគណៈកម្មាធិការសាខា នាចុងសប្ដាហ៍នេះបានអញ្ជើញចូលរួមរំលែកទុក្ខយ៉ាងក្រៀមក្រំចំពោះ មរណភាពរបស់ ឧបាសកសុខ កាន់ ត្រូវជាឪពុកបង្កើតលោកស្រី សុខ លាភា នាយិកាសាខាកាកបាទក្រហមខេត្ត។
ក្នុងនោះក៏បាននាំយកនូវសម្ភារៈអំណោយមនុស្សធម៌និងថវិកាមួយចំនួនរបស់កាកបាទក្រហមកម្ពុជា ទៅប្រគល់ជូនគ្រួសារនៃសព។ ឯកឧត្តម អ៊ុំ រាត្រី បានចូលរួមរំលែកទុក្ខ និងសោកស្ដាយអាឡោះអាល័យជាទីបំផុតចំពោះការបាត់បង់ឧបាសក សុខ កាន់ នេះគឺជាការបាត់បង់ឪពុកជីតាដ៏ល្អមួយរូបដែលមានព្រហ្មវិហារធម៌និងគុណធម៌ដ៏ល្អប្រពៃចំពោះកូនចៅ សាច់ញាតិនិងក្រុមគ្រួសារទាំងអស់ ដែលបានតស៊ូខិតខំប្រឹងប្រែងចិញ្ចឹមបីបាច់ថែរក្សាអប់រំ ឲ្យកូនចៅ ក្លាយជាអ្នកមានចំណេះដឹងមានធនធានមនុស្ស ដ៏មានតម្លៃក្នុងបុព្វហេតុការងារមនុស្សធម៌និងបម្រើជាតិ សាសនា ព្រះមហាក្សត្រ។ ក្នុងវេលាប្រកបដោយសមានទុក្ខដ៏ក្រៀមក្រំនេះថ្នាក់ដឹកនាំនិងសហការីនៃកាកបាទក្រហមកម្ពុជាក៏សូមឧទ្ទិសបួងសួងដល់ដួងវិញ្ញាណក្ខន្ធឧបាសក សុខ កាន់សុខបានទៅកាន់សុគតិភពកុំបីឃ្លៀងឃ្លាតឡើយ៕
