(បន្ទាយមានជ័យ)៖ដោយមើលឃើញជាក់ស្ដែងពីទុក្ខលំបាក និងជាទឹកចិត្តមនុស្សធម៌ស្រណោះអាណិតផងនោះលោក យឹម សំណាង អភិបាលរង ខេត្តបន្ទាយមានជ័យ រួមជាមួយព្រះសង្ឃវត្តស្វាយថ្មី(ហៅវត្តតាហី).ចៅអធិការវត្តព្រៃចាន់ លោក ហុង ណើន ម្ចាស់ហាងលក់ទូរសព្ទដៃទំនើបហុងណើន(ហៅហុងចើម) ព្រមទាំងបងប្អូនអ្នកសារព័ត៌មាន បាននាំយកគ្រឿងឧបភោគ បរិភោគ និងថវិកាមួយចំនួនទៅឧបត្ថម្ភជូនដល់គ្រួសារ គរទាំងប្ដី និងប្រពន្ធ ដែលមានជីវភាពខ្វះខាតរស់នៅភូមិព្រហូត សង្កាត់អូរអំបិល ក្រុងសិរីសោភ័ណ នៅថ្ងៃទី២ ខែតុលា ឆ្នាំ២០២៥ ស្ថិតនៅទីតាំងអាហារដ្ឋានម្លប់ព្រីង(ផ្លូវវាងក្រុង)។
ក្នុងឱកាសនោះលោក យឹម សំណាង អភិបាលរង ខេត្ត ក៏បានធ្វើការកោតសរសើរដល់ព្រះសង្ឃ បងប្អូនអ្នកសារព័ត៌មាន និងម្ចាស់ហាងលក់ទូរសព្ទដៃទំនើបហុងណើន ដែលបានធ្វើការគៀងគសម្ភារៈ និងថវិកា ក្នុងវប្បធម៌ចែករំលែក ខ្មែរស្រឡាញ់ខ្មែរ។
លោក យឹម សំណាង បានធ្វើការលើកទឹកចិត្តដល់ពួកគាត់ត្រូវខិតខំប្រឹងប្រែងរស់នៅ មិនត្រូវអស់សង្ឃឹម ក្នុងជីវិតនោះទេ ជាពិសេសត្រូវថែទាំសុខភាពប្រកបដោយអនាម័យ ដោយហូបស្អាត ផឹកស្អាត និងរស់ស្អាតជាប្រចាំ។ ម្យ៉ាងវិញទៀតសម្រាប់គ្រឿងឧបភោគបរិភោគ និងថវិកាទាំងនេះ គ្រាន់តែជួយសម្រាល់ដល់ជីវភាពរស់នៅជូនបានតែមួយរយៈពេលតែប៉ុណ្ណោះ។
គួររំលឹកផងដែរថា៖ គ្រួសារគរទាំង២នាក់ ប្ដី ប្រពន្ធ នេះត្រូវបានបងប្អូនប្រជាពលរដ្ឋយើងហៅគាត់ថាមីងគរ ពូគរ ហើយប្រពន្ធមានអាយុ ៤៦ឆ្នាំ ប្តីអាយុ ៤៧ឆ្នាំ និងមានកូនប្រុស១អាយុ ៦ឆ្នាំ រស់នៅភូមិព្រហូត សង្កាត់អូរអំបិល ក្រុងសិរីសោភ័ណ។ចំណែកមុខរបរ ប្ដី ស៊ីឈ្នួលលីសែងឥវ៉ាន់នៅផ្សារហ៊ុយ ឡេង ប្រពន្ធ ដើរលក់គ្រឿងម្ជូរនៅតាមកញ្ចុះនៅផ្លូវវាងក្រុង។
សម្រាប់គ្រឿងឧបភោគ បរិភោគ និងថវិកាដែលយកទៅប្រគល់ជូននៅពេលនោះរួមមាន៖អង្ករ១០០គីឡូក្រាម មី ទឹកក្រូច ទឹកស៊ីអ៊ីវ ទឹកត្រី ទឹកដោះគោ អំបិល ស្ករ ប៊ីចេង សាប៊ូ និងថវិការជាង ៣០ម៉ឺនរៀល៕
