បន្ទាយមានជ័យ៖ ឯកឧត្តម វង្ស ពិសិដ្ឋ អនុរដ្ឋលេខាធិការ និងជានាយកគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ លោក ឃ្លោក នួយ អភិបាលរង ខេត្ត តំណាងឲ្យឯកឧត្តម អ៊ុំ រាត្រី អភិបាល នៃគណៈអភិបាលខេត្ត និងលោក សាន រដ្ឋា តំណាងធនាគារអភិវឌ្ឍន៍អាស៊ី (ADB) បានដឹកនាំក្រុមការងារ ចុះត្រួតពិនិត្យការងារអនុវត្តតាមការដ្ឋានជាក់ស្ដែង និងបើកកិច្ចប្រជុំពិភាក្សាពីវឌ្ឍនភាពការងារ និងដោះស្រាយបញ្ហាប្រឈមនានា នៅថ្ងៃទី០១ ខែតុលា ឆ្នាំ២០២៥ ដោយមានការចូលរួមពី លោកអភិបាល អភិបាលរង ក្រុងសិរីសោភ័ណ លោកប្រធានមន្ទីរសាធារណការ និងដឹកជញ្ជូនខេត្ត ទីប្រឹក្សាបច្ចេកទេស និងអ្នកពាក់ព័ន្ធ។
លោក ឃ្លោក នួយ អភិបាលរង ខេត្ត បានមានប្រសាសន៍ថា ការរៀបចំបណ្តាញលូមេ បណ្តាញលូមេរង និងលូបង្រៀរមានប្រវែង ៣៦.៧២៤ គ.ម។ ធ្វើការតភ្ជាប់លូទឹកស្អុយតាមផ្ទះ អគារពាណិជ្ជកម្ម និងអគារស្ថាប័ន ៣៧៦៦។ រៀបចំបណ្តាញលូដែលមានសំពាធមានប្រវែង៩.៧៦៥ គ.ម។ តភ្ជាប់បណ្តាញលូខ្នែងមានប្រវែង៦៣.៣៣២គ.ម។ សាងសង់ស្ថានីយ៍បូមមេចំនួន១ នៅរង្វង់មូលសូគីមិច និងស្ថានីយ៍បូមតូចចំនួន៣ នៅផ្លូវលេខ៣។ សាងសង់ស្ថានីយ៍ប្រព្រឹត្តកម្មទឹកកខ្វក់រួមតាមលក្ខណៈធម្មជាតិមានសមត្ថភាពអាចបញ្ចេញទឹក ស្អុយបាន ៣,៥០០ ម៉ែត្រត្រីគុណក្នុងមួយថ្ងៃ។ សាងសង់ អគាររដ្ឋបាល អគាររោងជាង អគារម៉ាស៊ីនភ្លើង និងអគារសន្តិសុខ នៅស្ថានីយ៍ ប្រព្រឹត្តកម្មទឹកកខ្វក់ និងរៀបចំដាំដើមឈើតាមលក្ខណៈធម្មជាតិ។ សាងសង់ផ្លូវទៅកាន់ស្ថានីយ៍ប្រព្រឹត្តកម្មទឹកកខ្វក់ មានប្រវែង២.៦គ.ម និងសាងសង់ ទ្វារទឹក ១ទីតាំង ស្ថិតនៅភូមិ កន្ទួតសង្កាត់ភៀត ក្រុងសិរីសោភ័ណ។ សាងសង់បណ្តាញលូទឹកភ្លៀង ប្រភេទ Udrains លូ អ៊ុយ មានប្រវែង ៦.៨៨៥ គ.ម នៅភូមិ គោរដ្ឋាន បេនឡាន សួនមានជ័យ និងពីស្ថានីយប្រេងសូគីមិច មកដល់ស្ថូប បេនឡាន សម្រាប់រំដោះទឹកភ្លៀងកាត់បន្ថយការជន់លិច នៅរដូវភ្លៀង។
លោក ឃ្លោក នួយ អភិបាលរងខេត្ត បានបញ្ជាក់ថា យោងតាមរបាយការណ៍របស់ មន្ត្រីជំនាញ និងការចុះជាក់ស្តែងគិតត្រឹមខែមីនានេះ គម្រោងប្រពន្ធ័ទឹកកខ្វក់និង លូរំដោះទឹកក្នុងទីប្រជុំជន អាងប្រព្រឹតកម្មទឹកកខ្វក់ សមិទ្ធផលទាំងនេះពិតជាមានសារៈសំខាន់ណាស់សម្រាប់ប្រជាពលរដ្ឋ ក្នុងទីប្រជុំជនក្រុង តាមរយៈការលើកកំពស់ធ្វើអោយវិស័យបរិស្ថាន។ ដើម្បីបាននិរន្តរ៍ភាពការងារគ្រប់គ្រង ខេត្តបានបង្កើតគណៈកម្មការគ្រប់គ្រង ប្រតិបត្តិការទីលាន ដោយយកបទពិសោធន៍រាជធានី ខេត្តដែលមានបទពិសោធន៍ ខេត្តបាន ប្តេជ្ញាជួយគាំទ្រដល់ ក្រុង ស្រុក រៀបចំដីកា តារាងតម្លៃ ប្រមូលសេវា នៅតាមទីតាំងអាជីវកម្ម លំនៅដ្ឋាន នឹងគ្រឹះស្ថានសាធារណៈនានា។ សូមបញ្ជាក់ជូនថា ក្រុងសិរីសោភ័ណ និងក្រុងប៉ោយប៉ែតជាទីប្រជុំជនមានប្រជាពលរដ្ឋជាង៨៥% ជាអាជីវករ និងមានស្ថាបន័មន្ទីរអង្គភាពក្រុមហ៊ុន សហគ្រាសនានា ដែលមានសក្តានុពលសេដកិច្ចរបស់ខេត្ត។
ឯកឧត្តម វង្ស ពិសិដ្ឋ អនុរដ្ឋលេខាធិការ និងជានាយកគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ បានមានប្រសាសន៍ថា លទ្ធផលដ៏ល្អប្រសើរខាងលើនេះ គឺបានរួមចំណែកយ៉ាងធំធេងជាមួយរាជរដ្ឋាភិបាលកម្ពុជាក្រោម ការដឹកនាំប្រកបដោយភាពស្វាហាប់ ឈ្លាសវៃ ស៊ីជម្រៅ និងចក្ខុវែងឆ្ងាយរបស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់ចេញយុទ្ធសាស្ត្របញ្ច កោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ព្រមទាំង អាទិភាពគន្លឹះ ចំនួន៥គឺ៖ មនុស្ស ផ្លូវ ទឹក ភ្លើង និងបច្ចេកវិទ្យា ក្នុងការកាត់បន្ថយភាពក្រីក្រ និងជំរុញកំណើនសេដ្ឋកិច្ច កម្ពុជា ដើម្បីសម្រេចបានចក្ខុវិស័យកម្ពុជា ជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០៕
