បន្ទាយមានជ័យ ៖ ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ អញ្ជើញ ជាអធិបតីភាក្នុងពិធីប្រកាសចូលកាន់មុខតំណែង អនុប្រធានមន្ទីរពេទ្យបង្អែក ប្រធាន–អនុប្រធាន មណ្ឌលសុខភាព ចំនួន២០រូប។
ពិធីនេះបានប្រាព្ធធ្វើឡើងនៅសាលប្រជុំផ្ការំដួល នៃមន្ទីរសុខាភិបាល នៃរដ្ឋបាលខេត្តបន្ទាយមានជ័យ នារសៀលថ្ងៃទី០៨ ខែមេសា ឆ្នាំ ២០២៦ ដោយមានអញ្ជើញចូលរួមឯកឧត្ដម ប្លែក វ៉ារី ប្រធានក្រុមប្រឹក្សាខេត្ត អភិបាលរង ខេត្ត អ្នកពាក់ព័ន្ធ មេ ឃុំចៅ–សង្កាត់ពាក់ព័ន្ធ ប្រធាន–អនុប្រធានមន្ទីរ និងថ្នាក់ដឹកនាំគ្រប់ផ្នែក ព្រមទាំងមន្រ្តីរាជការក្នុងវិស័យសុខាភិបាលផងដែរ។
នាឱកាសនោះឯកឧត្តម អ៊ុំ រាត្រី អភិបាលខេត្ត ថ្លែងនូវការកោតសរសើរ និងវាយតម្លៃខ្ពស់ចំពោះមន្ទីរសុខាភិបាល នៃរដ្ឋបាលខេត្ត ក៏ដូចជាលោកវេជ្ជបណ្ឌិត គ្រូពេទ្យ និងមន្រ្តីរាជការក្នុងវិស័យសុខាភិបាលទាំងអស់ ដែលកន្លងទៅ បានខិតខំប្រឹងប្រែងរួមសាមគ្គីគ្នាយ៉ាងសកម្មក្នុងការបំពេញតួនាទី ភារកិច្ចប្រកបដោយស្មារតីទទួលខុសត្រូវខ្ពស់ លើការងារពិគ្រោះ ពិនិត្យ ព្យាបាលជំងឺទូទៅជូនប្រជាពលរដ្ឋដោយមិនរើសអើង ឬប្រកាន់និន្នាការអ្វីឡើយ ជាពិសេសលោកវេជ្ជបណ្ឌិត គ្រូពេទ្យ និងក្រុមការងារផ្នែកសុខាភិបាលទាំងអស់ តែងតែលះបង់ ក្លាហាន តស៊ូចូលរួមជាមួយក្រុមការងាររដ្ឋបាលខេត្ត អាជ្ញាធរមូលដ្ឋានពាក់ព័ន្ធ និងកងកម្លាំងប្រដាប់អាវុធគ្រប់ប្រភេទ ដើម្បីពិនិត្យព្យាបាលរបួស ក៏ដូចជាព្យាបាលជូនបងប្អូនជនភៀសសឹកក្នុងមណ្ឌលសុវត្ថិភាព តាមជំនាញវិជ្ជាជីវៈបានយ៉ាងសស្រាក់សស្រាំគួរជាទីកក់ក្តៅបំផុត។
ឯកឧត្ដម អភិបាល ខេត្ត បានបញ្ជាក់ថា ការតែងតាំងមន្រ្តី៖ គឺជាដំណើរការជាប្រក្រតី សម្រាប់ដំណើរការគ្រប់គ្រងមន្រ្តីបំពេញ ការងារប្រចាំថ្ងៃ ដោយអនុលោមតាមច្បាប់ និងលិខិតបទដ្ឋានគតិយុត្តិជាធរមាន ក្នុងគោលបំណងលើកកម្ពស់ ប្រសិទ្ធភាព និងប្រសិទ្ធផល នៃការគ្រប់គ្រងមន្រ្តីរាជការ។ យ៉ាងណាមិញការគ្រប់គ្រងមន្រ្តីរាជការនៅរដ្ឋបាលថ្នាក់ក្រោមជាតិ គឺត្រូវបានរាជរដ្ឋាភិបាលធ្វើប្រតិភូកម្មអំណាច មកឱ្យគណៈអភិបាលរាជធានី ខេត្ត–ក្រុង–ស្រុក តាមរយៈអនុក្រឹត្យលេខ២៤០ អនក្រ.បក ឆ្នាំ២០១៧ ដើម្បីលើកកម្ពស់ប្រសិទ្ធភាពបំពេញការងាររបស់បុគ្គលិកនៅរដ្ឋបាលថ្នាក់ក្រោមជាតិ។
ឯកឧត្ដម បន្តថា កិច្ចការនេះរដ្ឋបាលខេត្ត តែងតែបានយកចិត្តទុកដាក់អនុវត្តដោយសុក្រឹត្យ អនុលោមតាមបទដ្ឋានគតិយុត្តជាធរមានពោលគឺ៖ ករណីតែងតាំងគឺត្រូវផ្អែកលើគោលការណ៍មុខតំណែងដែលនៅទំនេរ ដែលត្រូវបំពេញ ទន្ទឹមនឹងនោះ ក៏ត្រូវផ្អែកលើលក្ខណៈសម្បត្តិ និងឧបនិស្ស័យរបស់មន្រ្តីដែលត្រូវតែងតាំងនោះ ដូចមានក្នុងព្រះរាជក្រឹត្យស្តីពីលក្ខន្តិកៈដោយឡែក នៃក្របខណ្ឌនីមួយៗ ជាបុគ្គលដែលប្រកបដោយគុណវុឌ្ឍ មានសមត្ថភាពដឹកនាំ គ្រប់គ្រង មានគំនិតផ្តួចផ្តើម ក្នុងការអនុវត្តការងារ មានសាមគ្គីល្អ មានគុណធម៌ មានសុខភាពល្អ និងមនសិកាវិជ្ជាជីវៈ ក្នុងនោះ ស្រី្តត្រូវបានលើកទឹកចិត្ត និងផ្តល់អាទិភាពក្នុងការតែងតាំងក្នុងមុខតំណែងណាមួយ ដើម្បីឆ្លើយតបទៅនឹងគោលនយោបាយយេនឌ័រ និងការផ្តល់អំណាចដល់ស្រ្តីនៅកម្ពុជា៕
