(បន្ទាយមានជ័យ)៖លោក ហ៊ឹល រ៉ាយ៉ា អភិបាលរង ខេត្តតំណាង ឯកឧត្តម អ៊ុំ រាត្រី អភិបាលខេត្តបន្ទាយមានជ័យ លោក បៀវ ថាន ប្រធានមន្ទីរធម្មការនិងសាសនាខេត្ត លោក ស្រេង សុផល អភិបាលក្រុងសិរីសោភ័ណនាថ្ងៃទី៥ ខែមេសា ឆ្នាំ២០២៦ បានអញ្ជើញជាអធិបតីភាពក្នុងពិធីអបអរសាទរ ព្រះយេស៊ូគ្រិស្ត ទ្រង់សុគតបីថ្ងៃ ដើម្បីសងថ្លៃបាប របស់មនុស្ស រួចទ្រង់មានព្រះជន្មរស់ឡើងវិញ ហើយក៏កំពុងរស់នៅសព្វថ្ងៃ ។ដោយកម្មវិធីនេះរៀបចំឡើងដោយក្រុមជំនុំមេតូឌីស្ទ ស្ថិតនៅក្នុងក្រុងសិរីសោភ័ណ ដឹកនាំដោយលោកគ្រូគង្វាល គឹម វិវឌ្ឍន៍ ដែលបាន សហការជាមួយអង្គការខាំផាសិន។
លោក គឹម វិវឌ្ឍន៍ បានបញ្ជាក់ឲ្យដឹងថា ក្រុមជំនុំមេតូឌីស្ទ ប្រចាំខេត្តបន្ទាយមានជ័យ បានប្រារព្ធពិធីនេះឡើងជារៀងរាល់ឆ្នាំ ដោយឡែកសម្រាប់ឆ្នាំនេះ ក៏បានធ្វើការផ្តល់ជូននូវអំណោយមនុស្សធម៌ចែកជូនដល់សមាជិកគ្រិស្តបរិស័ទចំនួន ១៥៦គ្រួសារ ដោយក្នុងនោះអំណោយសម្រាប់គ្រួសារម្ដាយមានផ្ទៃពោះចំនួន ២០គ្រួសារ ក្នុងមួយគ្រួសារទទួលបាន អង្ករផ្កាម្លិះ ៥០Kg ខ្លាញ់២លីត្រ ទឹកត្រី១ដប សាប៊ូកូនក្មេង ខ្ទឹម១Kg ហាយប៊ឺ ១ កញ្ចប់យាហឺ១កញ្ចប់ ថ្នាំដុសធ្មេញ១ដបសាប៊ូលាងចាន ២កញ្ចប់ សាច់ក្រក០,៥Kg និងសាច់ផាត់១កញ្ចប់ និងអំណោយសម្រាប់ម្ដាយកុមារតូចៗចំនួន ១៣៦គ្រួសារ ក្នុងមួយគ្រួសារទទួលបាន អង្ករផ្កាម្លិះ ៥០Kg ឃីតមួយថង់ធំ រួមមាននំសាំងវិច នំស្រួយ ទឹកដោះគោ ថ្នាំដុសធ្មេញសាប៊ូដុសខ្លួន សាប៊ូលាងចាននិងសាប៊ូម្សៅកូនក្មេង។
លោក ហ៊ឹល រ៉ាយ៉ា បានមានប្រសាសន៍កោតសរសើរនិងអរគុណដោយស្មោះចំពោះសមានចិត្តដ៏ល្អប្រពៃរបស់ក្រុមជំនុំមេតូឌីស្ទ ដែលតែងតែជួយដល់បងប្អូនខ្មែរយើង ដែលមានជីវភាពខ្វះខាត នេះគឺជាទឹកចិត្តខ្មែរជួយខ្មែរ ពិសេសការផ្តល់នូវអំណោយនាថ្ងៃ គឺជាគន្លឹះដើម្បីពង្រឹងសេវាថែទាំសុខភាពដូចជាស្ត្រីមានផ្ទៃពោះកុមារតូចតូច ជាដើម ហើយក៏ស្របទៅនឹងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជាអាណត្តិទី៧ នឹងនាំទៅដល់ការទទួលបានសេវាថែទាំសុខភាព និងការព្យាបាល ប្រកបដោយគុណភាពពិសេសសេវាថែទាំសុខភាពមាតាទារកនិងកុមារនៅកម្ពុជាឲ្យមានប្រសិទ្ធភាព៕
