(បន្ទាយមានជ័យ) ឯកឧត្តម ហុង ពិសិដ្ឋ សមាជិកក្រុមប្រឹក្សាខេត្ត និងជាអនុប្រធាន ស.ស.យ.ក. ខេត្ត តំណាងឯកឧត្តម កែ សួនសុភាព ប្រធាន ស.ស.យ.ក.ខេត្តបន្ទាយមានជ័យ បានអញ្ជើញជាអធិបតីភាពក្នុងពិធីបើកសិក្ខាសាលាតម្រង់ទិស ការត្រៀមខ្លួនប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) និងការជ្រើសរើសជំនាញសិក្សានៅសាកលវិទ្យាល័យ ស្របតាមតម្រូវការទីផ្សារការងារ ជូនដល់សិស្សានុសិស្សថ្នាក់ទី១២ ក្នុងខេត្តបន្ទាយមានជ័យ មកពីតាមបណ្ដាវិទ្យាល័យចំនួន៤ មានវិទ្យាល័យសម្ដេចឪ.វិទ្យាល័យសិរីសោភ័ណ.វិទ្យាល័យអូរអំបិល និងវិទ្យាល័យខ្លាកូន ព្រមទាំងយុវជន ស.ស.យ.ក.ខេត្ត ក្រុង និងយុវជនអភិវឌ្ឍន៍ខេត្ត សរុបប្រមាណជាង ២០០នាក់ ដែលរៀបចំដោយសាកលវិទ្យាល័យអន្តរជាតិ (IU) សាខាខេត្តបន្ទាយមានជ័យ នៅថ្ងៃសៅរ៍ ទី២៨ ខែមីនា ឆ្នាំ២០២៦ ធ្វើនៅសាលប្រជុំសាកលវិទ្យាល័យ អន្តរជាតិ (IU) សាខាខេត្តបន្ទាយមានជ័យ ស្ថិតនៅក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ។
លោក រិទ្ធ វីថាន ប្រធានការិយាល័យសិក្សាសាកលវិទ្យាល័យ អន្តរជាតិ (IU) បានឡើងមានមតិស្វាគមន៍ឱ្យដឹងថា៖សិក្ខាសាលាតម្រង់ទិសដល់សិស្សានុសិស្សថ្នាក់ទី១២ នាពេលនេះក្រោមគំនិតផ្តួចផ្តើមដឹកនាំដ៏ខ្ពង់ខ្ពស់របស់ ឯកឧត្តមសា ស្ត្រាចារ្យមហាបរិញ្ញាបណ្ឌិត សាបូ អូហ្សាណូ សាកលវិទ្យាធិការនៃសាកលវិទ្យាល័យ អន្តរជាតិ និងដោយមានការចូលរួមសហការរៀបចំយ៉ាងសកម្ម ពីក្រុមការងារសហភាព សហព័ន្ធយុវជនកម្ពុជា ខេត្តបន្ទាយមានជ័យ។
លោក ប្រធានការិយាល័យសិក្សាសាកលវិទ្យាល័យ អន្តរជាតិ (IU) បានបញ្ជាក់ថា៖ នៅក្នុងអាណត្តិទី២ នៃរាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃរាជរដ្ឋាភិបាលកម្ពុជា សាកលវិទ្យាល័យរអន្តរជាតិ International University ដែលហៅកាត់ថា (IU) បានបង្កើតឡើងនាថ្ងៃទី១៦ ខែធ្នូ ឆ្នាំ២០០២ តាមរយៈអនុក្រឹត្យ លេខ ១២២ អនក្រ បក ដែលមានឯកឧត្តមសាស្ត្រាចារ្យ អ៊ួន សាបូ ជាស្ថាបនិក និងមានសាស្ត្រាចារ្យមហាបរិញ្ញា បណ្ឌិត សាបូ អូហ្សាណូ ជាសាកលវិទ្យាធិការ នាពេលបច្ចុប្បន្ននេះ។
ថ្លែងនៅក្នុងឱកាសនោះឯកឧត្តម ហុង ពិសិដ្ឋ សមាជិកក្រុមប្រឹក្សាខេត្ត និងជាអនុប្រធាន ស.ស.យ.ក. ខេត្ត បានឡើងមានប្រសាសន៍អោយដឹងថា៖ សិក្ខាសាលានេះ មានសារៈសំខាន់យ៉ាងខ្លាំង ក្នុងការផ្តល់នូវការណែនាំ និងបំផុសគំនិតដល់សិស្សថ្នាក់ទី១២ ដើម្បីជួយឱ្យសិស្សានុសិស្សមានការយល់ដឹងច្បាស់លាស់ អំពីទិសដៅសិក្សាបន្តនៅថ្នាក់ឧត្តមសិក្សា ក៏ដូចជាការជ្រើសរើសជំនាញដែលសមស្រប នឹងសមត្ថភាព និងបំណងប្រាថ្នារបស់ខ្លួន នាពេលអនាគត។
ឯកឧត្តមបានបន្តថា៖ តាមរយៈសិក្ខាសាលានេះ សិស្សានុសិស្សយើងនឹងទទួលបានបទពិសោធន៍ ចំណេះដឹងនិងការណែនាំពីវាគ្មិន ដែលជួយជំរុញឱ្យមានការត្រៀមខ្លួនល្អប្រសើរ សម្រាប់ការបន្តការសិក្សា និងអភិវឌ្ឍន៍សមត្ថភាពផ្ទាល់ខ្លួនផងដែរ៕
