ខេត្តបន្ទាយមានជ័យ៖នាថ្ងៃអង្គា ៧រោច ខែផល្គុន ឆ្នាំម្សាញ់ សប្តស័ក ព.ស ២៥៦៩ ត្រូវថ្ងៃទី១០ ខែកុម្ភៈ ឆ្នាំ២០២៦ លោកជំទាវ ជ័យ ណារី អ៊ំ រាត្រី អនុប្រធានប្រធានសាខាកាកបាទក្រហមខេត្តបន្ទាយមានជ័យ បានអញ្ជើញជាអធិបតីភាពក្នុងពិធីអបអរសាទរ ទិវាជាតិសុខភាព មាតាទារកនិងកុមារ ២១កុម្ភៈ ឆ្នាំ២០២៦ ក្រោមប្រធានបទរួមគ្នាលើកកម្ពស់គុណភាព សុវត្ថិភាពប្រសិទ្ធភាព នៃការថែទាំផ្ទៃពោះមុនសម្រាល រួមទាំងក្នុងបរិបទមានគ្រោះអាសន្នឬគ្រោះអន្តរាយ ដើម្បីធានាថា ទាំងម្តាយ និងទារកមានសុខភាពល្អ ។ពិធីនេះមានការផ្តល់ជូននូវកញ្ចប់ជា អំណោយមនុស្សធម៌ចែកជូនដល់គ្រួសារស្ត្រីមានផ្ទៃពោះនិងកុមារតូចៗចំនួន១០៩នាក់ ក្នុងជំរំជនភៀសសឹក នៅវត្តកណ្ដោល ឃុំគោករមៀត ស្រុកថ្មពួក ខេត្តបន្ទាយមានជ័យ។
លោកស្រី ម៉េង គឹមហួយ សមាជិកគណៈកម្មាធិការសាខាកាកបាទក្រហមបាន អានសារលិខិតរបស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជានិងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិដើម្បីសុខុមាលភាពស្ត្រីនិងកុមារថា ការថែទាំសុខភាព សុវត្ថិភាពផ្នែកសុខភាពនិងប្រព័ន្ធភាពធន់ផ្នែកសុខភាពពិតជាមានសារៈសំខាន់ ស្រួចស្រាវណាស់ សម្រាប់ការកសាងជាតិនិងការឈានទៅសម្រេចបានចក្ខុវិស័យនៃឆ្នាំ២០២៥០។ម្ល៉ោះហើយយើងត្រូវតែនាំគ្នាវិនិយោគធនធាននិងការខិតខំប្រឹងប្រែងរបស់យើងនៅក្នុងការលើកកម្ពស់ប្រព័ន្ធថែទាំសុខភាពនិងការគ្របដណ្តប់សេវាថែទាំសុខភាពជាសកល ធ្វើឲ្យកិច្ចការទាំងនោះកាន់តែមានលក្ខណៈបរិយាប័ន្ននិងមានភាពធន។
ជាការពិតណាស់ប្រជាពលរដ្ឋគឺជាទ្រព្យធនជាយុទ្ធសាស្ត្រ អនាគតប្រទេសជាតិយើងត្រូវពឹងផ្អែកទៅលើទារកកុមារនិងយុវជនជំនាន់ក្រោយ។ ហើយដូចនេះយើងត្រូវថែទាំពួកគាត់ឲ្យបានល្អជាទីបំផុត។
លោកជំទាវ ជ័យ ណារី អ៊ុំរាត្រី បានមានប្រសាសន៍ផ្តាំផ្ញើដល់ស្ត្រីក្នុងវ័យបន្តពូជស្ត្រីមានផ្ទៃពោះនិងកុមារសុំអនុវត្តរួមមានស្ត្រីមានផ្ទៃពោះទាំងអស់ ទៅពិនិត្យសុខភាពឲ្យបានតាមការកំណត់របស់គ្រូពេទ្យដើម្បីទទួលបានវ៉ាក់សាំងការពារជំងឺផ្សេងៗ ព្រមទាំងស្ម័គ្រចិត្តចូលរួមធ្វើតេស្តឈាមនិងត្រូវទៅសម្រាលកូននៅមន្ទីរពេទ្យ។
សូមស្ត្រីទាំងអស់ដែលសម្រាលកូនហើយ សូមទៅពិនិត្យសុខភាពព្រមទាំងយកកូនទៅជាមួយដើម្បីទទួលបានវ៉ាក់សាំងជំងឺនិងបន្តបំបៅដោះកូនតែមួយមុខគត។
សូមចូលរួមលុបបំបាត់ជំងឺឆ្លងផ្សេងៗពិសេសសុំយកកូនស្រីដែលមានអាយុ៩ឆ្នាំទៅចាក់វ៉ាក់សាំងការពារជំងឺមហារីកមាត់ស្បូនឲ្យបានគ្រប់គ្រប់គ្នា។
សូមទទួលយកនូវវិធីពន្យារកំណើតដើម្បីមានសុខភាពល្អ ទាំងម្តាយ និងកូន។
គួរបញ្ជាក់ថា អំណោយសម្រាប់ផ្តល់ជូនស្ត្រីមានផ្ទៃពោះ និងកុមារតូចៗទាំង ១០៩នាក់ ដោយម្នាក់ៗ ទទួលបាន។ ម្សៅសាប៊ូLix១កញ្ចប់ សាប៊ូកក់សក់១ដប សាប៊ូដុសខ្លួន២ដុំ ថ្នាំដុសធ្មេញ ១បំពង់ ច្រាស់ដុសធ្មេញ១ដើម ក្រដាសជូត ២ដុំកន្សែងពោះគោតូច ១ ទឹកដោះគោខាប់ ២កំប៉ុង ទឹកដោះគោស្រស់ ១ដប នំផ្អែម១ថង់ពិល១ សារុង១និងថវិកាមួយចំនួនផងដែរ៕
