បន្ទាយមានជ័យ ៖ ឯកឧត្តម ផាន់ ចាន់ធុល រដ្ឋលេខាធិការ ក្រសួងមហាផ្ទៃ អញ្ជើញជាអធិបតីភាពកិច្ចប្រជុំត្រួតពិនិត្យលទ្ធផលការងារអនុវត្តគោលនយោបាយ “ភូមិ–ឃុំ–សង្កាត់ មានសុវត្ថិភាព” ប្រចាំឆ្នាំ២០២៥ និងលើកទិសដៅការងារសម្រាប់ត្រីមាសទី១ ឆ្នាំ២០២៦។ កិច្ចប្រជុំនេះបានធ្វើឡើងនៅសាលប្រជុំ ក សាលាខេត្តបន្ទាយមានជ័យ នារសៀលថ្ងៃទី០៦ ខែមីនា ឆ្នាំ ២០២៦ដោយមានការអញ្ជើញចូលរួមពីសណាក់ប្រតិភូអមដំណើរ ឯកឧត្ដម ប្លែក វ៉ារី ប្រធាន ក្រុមប្រឹក្សា ខេត្ត ឯកឧត្ដម អ៊ុំ រាត្រី អភិបាល នៃគណៈ អភិបាលខេត្ត ស្នងការនគរបាលខេត្ត កងរាជអាវុធហត្ថខេត្ត មេឃុំ ចៅសង្កាត់ ប៉ុស្តិ៍នគរបាលទាំង៦៧ទូទាំងខេត្តផងដែរ។
មានមតិស្វាគមន៍ ឯកឧត្ដម អ៊ុំ រាត្រី អភិបាល នៃគណៈអភិបាល ក៏បានថ្លែងនូវការកោតសរសើរចំពោះគណៈបញ្ជាការឯកភាពរដ្ឋបាលគ្រប់ថ្នាក់ ជាពិសេសស្នងការដ្ឋាននគរបាលខេត្ត និងអធិការដ្ឋាននគរបាលក្រុង–ស្រុក និងឃុំ–សង្កាត់ រួមជាមួយកងកម្លាំងសមត្ថកិច្ចពាក់ព័ន្ធដែលបានយកអស់កម្លាំងកាយចិត្ត អនុវត្តតួនាទី ភារកិច្ចក្នុងការងារការពារសន្តិសុខ និងសុវត្ថិភាពជូនប្រជាពលរដ្ឋក្នុងទូទាំងខេត្តទទួលបានលទ្ធផលល្អប្រសើរ។
ថ្លែង នាឱកាសនោះឯកឧត្តម ផាន់ ចាន់ធុល រដ្ឋលេខាធិការ ក្រសួងមហាផ្ទៃ ក៏ថ្លែងអំណរគុណដល់គ្រប់តួអង្គពាក់ព័ន្ធដែលកន្លងមកបានអនុវត្តតួនាទីភារកិច្ចរបស់ខ្លួនបានយ៉ាងល្អប្រសេីរ។ ជាពិសេសអរគុណដល់កងកម្លាំងទាំង៣ ដែលបានលះបង់គ្រប់បែបយ៉ាង ការពារបូរណភាពទឹកដីពីសត្រូវឈ្លានពានទៀ បណ្តាលឱ្យរងរបួស និងពលីក្នុងសមរភូមិនាពេលកន្លងមក។
ក្រៅអំពីកិច្ចការពារបូរណភាពទឹកដីពីសត្រូវឈ្លានពាន ឯកឧត្ដម ក៏បានលើកឡើងថា កម្លាំងក៏បានអនុវត្តយ៉ាងខ្ជាប់ខ្ជួននូវគោលនយោបាយ “ភូមិ–ឃុំ–សង្កាត់ មានសុវត្ថិភាព” បម្រើរពលរដ្ឋនៅមូលដ្ឋានយ៉ាងល្អប្រសើរ។ ជាមួយនឹងសមិទ្ធផលការងារដែលសម្រេចបាន ឯកឧត្ដម ក៏បានណែនាំបន្ថែមដល់គណៈបញ្ជាការ ឯកភាពរដ្ឋបាលគ្រប់ថ្នាក់ ៖ ១–គណៈបញ្ជាការឯកភាពរដ្ឋបាលខេត្ត ក្រុង ស្រុក ដែលមានស្នងការដ្ឋាននគរបាលខេត្ត និង អធិការដ្ឋាននគរបាលក្រុងស្រុក ជាសេនាធិការ ត្រូវយកចិត្តទុកដាក់តាមដានត្រួតពិនិត្យនិងផ្តល់ការ គាំទ្រជាប្រចាំដើម្បីជួយដល់ប៉ុស្តិ៍នគរបាលរដ្ឋបាល, ២–គណៈបញ្ជាការឯកភាពរដ្ឋបាលខេត្ត ក្រុង ស្រុក ត្រូវបន្តលើកកម្ពស់ស្មារតីទទួលខុសត្រូវក្នុង ការដឹកនាំ បំផុសចលនាប្រជាការពារឱ្យកាន់តែសកម្មផុលផុស ទូលំទូលាយ និងមានសកម្មភាពជាប់ជា ប្រចាំនិងខិតខំកៀរគរសប្បុរសជនបង្កើតជាសម្ព័ន្ធមេត្រីភាពរវាងវិស័យឯកជនជាមួយក្រុមប្រជា ការពារ សំដៅផ្តល់ការឧបត្ថម្ភ គាំទ្រដល់សកម្មភាពរបស់ប្រជាការពារនៅមូលដ្ឋាន, ៣–បន្ត ពង្រឹងយន្តការទទួលព័ត៌មាននៅគ្រប់មូលដ្ឋាន ដើម្បីឆ្លើយតប ដោះស្រាយរាល់សំណូម ពររបស់ប្រជាពលរដ្ឋ ប្រកបដោយប្រសិទ្ធភាព ទាន់ពេលវេលា និងអាចឱ្យប្រជាពលរដ្ឋទទួលយកបាន ជាពិសេសចំពោះប្រជាពលរដ្ឋភៀសសឹកដែលបានវិលត្រឡប់ទៅលំឋានវិញ និងនៅជំរុំសុវត្ថិភាព, ៤–រដ្ឋបាលខេត្ត ត្រូវយកចិត្តទុកដាក់បន្តការគាំទ្រ និងពង្រឹងការអនុវត្តការងាររបស់ការិយាល័យ ប្រជាពលរដ្ឋ និងអង្គភាពច្រកចេញចូលតែមួយខេត្ត ដើម្បីទទួលបាននូវប្រសិទ្ធភាពខ្ពស់៕
