ខេត្តបន្ទាយមានជ័យ៖នាថ្ងៃទី២៩ ខែមករា ឆ្នាំ២០២៦ នៅសាលប្រជុំនៃសាលាខេត្តបន្ទាយមានជ័យ បានរៀបចំពិធីផ្សព្វផ្សាយខ្លឹមសារអនុសំវច្ចរៈមហាសន្និបាតមន្ត្រីសង្ឃលើកទី ៣៣ ។ពិធីនេះប្រព្រឹត្តទៅក្រោមអធិបតីភាពព្រះមេគណខេត្តទាំងពីរគណៈ ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលខេត្ត ដោយការ និមន្ត អញ្ជើញចូលរួមសរុប ១០២០អង្គ/អ្នក។
លោក បៀវ ថាន ប្រធានមន្ទីរធម្មការនិងសាសនាខេត្តបានមានប្រសាសន៍ថា ដោយមានការចង្អុលបង្ហាញ និងការយកចិត្តទុកដាក់ខ្ពស់ពីឯកឧត្តមបណ្ឌិត រដ្ឋមន្ត្រី សម្ដេចសង្ឃ នាយកទាំងពីរគណៈ និងមានការយកចិត្តទុកដាក់ពីសំណាក់ ឯកឧត្តម អ៊ុំ រាត្រី អភិបាលនៃគណៈអភិបាលខេត្ត ដើម្បីឲ្យមន្ទីរ និងគណៈសង្ឃទាំងពីរគណៈ សហការជាមួយអាជ្ញាធរ ធ្វើយ៉ាងណាសម្របសម្រួលនិងជួយបង្កលក្ខណៈផ្សេងៗ នៅតាមវត្តអារាម ក្នុងអំឡុងពេលនៃសង្គ្រាមរយៈពេល ២១ថ្ងៃចាប់ពីថ្ងៃទី ៨ដល់ ថ្ងៃទី២៧ ខែធ្នូ ឆ្នាំ២០២៥ ដែលយោធាថៃបានរំលោភបំពានមកលើទឹកដីនៃព្រះរាជាណាចក្រកម្ពុជា បងប្អូនប្រជាពលរដ្ឋភៀសសឹក ស្នាក់នៅតាមមណ្ឌល និងមានអារាមចំនួន ៧វត្ត ដែលទទួលរងផលប៉ះពាល់រួមមាន ១–វត្តសុវណ្ណសិក្ខារាមព្រៃចាន់,២–វត្តពុទ្ធិសីមាជោគជ័យ ,៣ -វត្តហេមវ័នបឹងត្រកួន,៤-វត្តខណ្ឌសីមារាមទំនប់ដាចល,៥–វត្តគិរីតេជោសែនជ័យភ្នំដី ,៦- វត្តសិលារុក្ខារាម,៧ –គិរីវនារាមល្បើកស្វាយ និង បណ្តាស្រុកក្រុង មួយចំនួនទៀត។
ព្រះសមណ:ញាណ ណាប់ ម៉ឺន បាននិមន្តឡើងអានសង្ឃប្រកាស អនុសំវច្ចរៈមហាសន្និបាតមន្ត្រីសង្ឃទូទាំងប្រទេសលើកទី៣៣ នៃគណ:សង្ឃព្រះពុទ្ធសាសនា រដ្ឋនៃព្រះរាជាណាចក្រកម្ពុជាដែលមានខ្លឹមសារថា ដើម្បីចូលរួមចំណែកក្នុងការសម្រាលទុក្ខលំបាករបស់សង្គម មន្ត្រីសង្ឃគ្រប់ឋានានុក្រម និងព្រះសង្ឃទូទាំងប្រទេសដើម្បីចែករំលែកលើកិច្ចការមនុស្សធម៌ ក្នុងការចុះសួរសុខទុក្ខប្រជាពលរដ្ឋភៀសសឹក វីរៈកងទ័ព និងវារៈនគរបាលជាតិខ្មែរ ដែលមានស្មារតីលះបង់ខ្ពស់ ក្នុងការការពារជាតិសំដៅបានរួមចំណែកជាមួយរាជរដ្ឋាភិបាល ដែលកំពុងមមាញឹកក្នុងបេសកកម្មបម្រើជាតិមាតុភូមិ និងបុព្វហេតុការពារសុខសន្តិភាព អធិបតេយ្យភាព និងបូរណភាពទឹកដីសម្រាប់ និងជាតិសាសនា ព្រះមហាក្សត្រ។
ឯកឧត្តម អ៊ុំ រាត្រី បានមានប្រសាសន៍ថា កោតសរសើរនិងវាយតម្លៃខ្ពស់ចំពោះសមិទ្ធផលការងារដែលមន្ទីរធម្មការនិងសាសនា និងគណៈសង្ឃទាំងពីរគណៈសម្រេចបាននាឆ្នាំកន្លងទៅ ។ ហើយជោគជ័យទាំងនេះ គឺពុំអាចកើតឡើងដោយចៃដន្យនោះទេ គឺកើតចេញពីការខិតខំប្រឹងប្រែង រួមគ្នាឥតឈប់ឈរប្រកបដោយការទទួលខុសត្រូវខ្ពស់ក្នុងស្មារតីសាមគ្គីភាពឯកភាពផ្ទៃក្នុងនិងកិច្ចសហការរបស់គណៈសង្ឃទាំងពីរគណៈនិងថ្នាក់ដឹកនាំ ទាំងមន្ត្រីរាជការគ្រប់លំដាប់ថ្នាក់នៃមន្ទីរធម្មការនិងសាសនា។ ឈរលើស្មារតីនេះឯកឧត្តមក៏បាន លើកទឹកព្រះទ័យ និងទឹកចិត្ត បន្តរក្សានូវស្មារតីសាមគ្គីភាពជាធ្លុងមួយរៀបចំនិងអនុវត្តផែនការថ្មីៗ ប្រកបដោយសង្គតិភាព សំដៅ លើកកម្ពស់តម្លៃព្រះពុទ្ធសាសនា តម្លៃសីលធម៌សង្គម និងការពង្រឹងនូវសុខដុមនីយកម្មសាសនាក្នុងសង្គមជាតិ ឲ្យរឹតតែប្រសើរឡើងជា ភិយ្យោភាព៕
