(កំពង់ចាម)៖ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត នៅព្រឹកថ្ងៃទី៣១ ខែធ្នូ ឆ្នាំ២០២៥ នេះ បានអញ្ជើញជួបសំណេះសំណាលជាមួយមន្ត្រីរាជការសាលាខេត្ត លោកគ្រូ អ្នកគ្រូ សិស្សានុសិស្ស និងយុវជន នាឱកាសចូលឆ្នាំសកល ២០២៦ នៅសាលសន្និសីទសាលាខេត្ត។
នាឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងការកោតសរសើរ និងវាយតម្លៃខ្ពស់នូវកិច្ចខិតខំប្រឹងប្រែងរបស់មន្រី្ដរាជការសាលាខេត្តទាំងអស់ នឹងអ្នកពាក់ព័ន្ធ ដែលបានខិតខំបំពេញការងារទទួលបានលទ្ធផលល្អ និងបន្តជំរុញលើកកម្ពស់ប្រសិទ្ធភាពការងារបន្ថែមទៀត ពិសេលការផ្តល់សេវាសារធារណៈ ដែលមានក្នុងកម្មវិធីនយោបាយរបស់រាជរដ្ឋាភិបាលក្នុង នីតិកាលទី៧ នៃរដ្ឋសភា ក្រោមការដឹកនាំដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម អភិបាលខេត្ត ក៏បានអំពាវនាវ ដល់ប្រជាពលរដ្ឋ សុំបន្តជឿជាក់ គាំទ្ររាជរដ្ឋាភិបាលកម្ពុជា វីរ:កងទ័ពរបស់យើង ក្រោមការដឹកនាំសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាដែលសម្តេច និងបងប្អូនវីរ:កងទ័ព បានប្រឹងប្រែង ខិតខំតស៊ូ រកវិធីសព្វបែបយ៉ាង ស្វែងរកកិច្ចព្រមព្រៀងសន្តិភាពជាមួយប្រទេសកម្ពុជា–ថៃ និងបណ្តាប្រទេសមហាអំណាច ដើម្បីរក្សាសន្តិភាពឲ្យគង់វង្ស យូរអង្វែង សម្រាប់ តជំនាន់ ប្រជាជនខ្មែរ ប្រទេសកម្ពុជាទាំងមូល។
នាឱកាសនោះ អភិបាលខេត្តកំពង់ចាម បានណែនាំដល់មន្ត្រីរាជការយើងទាំងអស់ ត្រូវតែមានចិត្តទូលំទូលាយ ម៉ឺងម៉ាត់ ស្មោះត្រង់ ស្អាតស្អំ មិនរើសអើង មានសាមគ្គីភាពផ្ទៃក្នុង និងមានទំនាក់ទំនងល្អជាមួយបណ្តាមន្ទីរអង្គភាព រដ្ឋបាលស្រុក ក្រុង ឃុំ សង្កាត់ ឱ្យមានភាពរលូន លើការងារបម្រើសេវាសាធារណៈ ជូនប្រជាពលរដ្ឋ។
ជាការលើកទឹកចិត្តនូវកិច្ចខិតខំប្រឹងប្រែងរបស់មន្ត្រីរាជការយើង និងអ្នកពាក់ព័ន្ធ ឯកឧត្តម អភិបាលខេត្តក៏បានឧបត្ថម្ភនូវថវិកាមួយចំនួន របស់រដ្ឋបាលខេត្ត ជូនដល់មន្ត្រីសាលាខេត្ត និងអ្នកពាក់ព័ន្ធ និងសូមជូនពរ សូមឲ្យមានសុខភាពល្អបរិបូរណ៌ និងទទួលបានជោគជ័យថ្មីៗ បន្ថែមទៀតនៅក្នុងបុព្វហេតុជាតិ និងប្រជាជនកម្ពុជា៕
