ខេត្តបន្ទាយមានជ័យ៖ដោយក្ដីអាណិតស្រឡាញ់ ពីប្រជាជនកូរ៉េ មកលើប្រជាជនខ្មែរ ដែលជា សន្តានចិត្តមនុស្សធម៌ នៅព្រឹកថ្ងៃទី២៥ ខែធ្នូ ឆ្នាំ២០២៥ អង្គការ ហាឆាន់ខាំ មកពីប្រទេសកូរ៉េបាននាំយកនូវអំណោយជា អង្ករនិងសម្ភារៈមួយចំនួន មកចែកជូនដល់បងប្អូនប្រជាពលរដ្ឋ ដែលជាជនភៀសសឹកចាកចេញ ដោយការឈ្លានពានពីពពួកទាហានសៀមចាប់ពីថ្ងៃទី៧ ខែធ្នូ ឆ្នាំ២០២៥ រហូតមកដល់បច្ចុប្បន្ន ដោយក្នុងនោះទាហានសៀម បានធ្វើសកម្មភាពបានដោយការបាញ់ប្រហារ មកក្នុងដែនអធិបតេយ្យភាពរបស់កម្ពុជានៅក្នុងភូមិសាស្ត្រមួយចំនួនដែលបានបាញ់ផ្លោងកាំភ្លើងធំ យន្តហោះទម្លាក់គ្រាប់បែក បំផ្លាញ ហេដ្ឋារចនាសម្ព័ន្ធ មានសាលារៀន វត្តអារាម ផ្ទះសម្បែង និងបាញ់ផ្សែងពុលជាដើម ។
ឯកឧត្ដម អ៊ុំ រាត្រី អភិបាលខេត្តបន្ទាយមានជ័យ បានថ្លែងនូវអំណរគុណ ចំពោះអង្គការ ហា ឆាន់ ខាំ ដែលមានលោក គីម ជុងអ៊ុក និងភរិយា ដែលតែងតែជួយដល់បងប្អូន ប្រជាពលរដ្ឋខ្មែរ ដែលកំពុងជួបការលំបាក។ នេះ ស បញ្ជាក់ឲ្យឃើញពីទឹកចិត្តអាណិតស្រឡាញ់របស់ជនជាតិកូរ៉េ។
ឯកឧត្តមបានបន្តថាអ្វីដែល បង្កើតឡើងទៅតាមខ្សែបន្ទាត់ព្រំដែនកម្ពុជា–ថៃ រហូតមកដល់ពេលនេះ គឺជាការឈ្លានពានមួយប្រកែកពុំបាន ពីសំណាក់កងទ័ពថៃមកលើដែនអធិបតេយ្យភាពកម្ពុជាហើយអ្វី ដែលពួកទាហានថៃបង្កឡើងនេះមិនមែនជាឧបទ្ទវហេតុចៃដន្យនោះទេ តែជាសង្គ្រាមធ្វើឡើងដោយចេតនាចេញពីចិត្ត ហើយត្រូវបានគិតគូរទុកជាមុនយ៉ាងល្អិតល្អន់បំផុត។ ក្រៅពីការផ្តល់នូវអង្ករ និងសម្ភារៈមួយចំនួន អង្គការ ហា ឆាន់ ខាំ នឹងបន្តជួយឧបត្ថម្ភនូវម្ហូបអាហារផ្សេងៗ នាថ្ងៃបន្ទាប់ទៀតផងដែរ៕
