(បន្ទាយមានជ័យ) ៖លេខាធិការដ្ឋានប្រយុទ្ធនិងជំងឺអេដស៍ខេត្ត និងមន្ទីរសុខាភិបាលនៃរដ្ឋបាលខេត្ត សហការជាមួយសាខាកាកបាទក្រហមកម្ពុជាខេត្តបន្ទាយមានជ័យ បានរៀបចំទិវាពិភពលោកប្រយុទ្ធនិងជំងឺអេដស៍ ១ធ្នូ ២០២៥ ក្រោមប្រធានបទយកឈ្នះការរំខាន បរិវត្តកម្មឆ្លើយតបនឹងជំងឺអេដស៍ ដែលប្រព្រឹត្តទៅក្រោមអធិបតីភាពឯកឧត្តម ប្លែក វារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងលោកជំទាវ ជ័យ ណារី អ៊ុំ រាត្រី ។ពិធីនេះបានធ្វើឡើង នៅសាលប្រជុំសាលាខេត្តបន្ទាយមានជ័យ នាចុងសប្តាហ៍នេះដោយមានការអញ្ជើញចូលរួមពីលោក លោកស្រីសមាជិកក្រុមប្រឹក្សាខេត្ត គណអភិបាលរង ខេត្ត និងលោក លោកស្រី អភិបាល.អភិបាលរង ក្រុង ស្រុក មន្ទីរអង្គភាពពាក់ព័ន្ធ និងកងកម្លាំងទាំងបី លោកគ្រូ អ្នកគ្រូ សិស្សានុសិស្ស យុវជនកាកបាទក្រហម.កាយរិទ្ធ និងយុវជន.ស.ស.យ.ក.ក្រុង និងអ្នកតំណាងអ្នកផ្ទុបមេរោគអេដស៍ ព្រមទាំងអង្គការដៃគូពាក់ព័ន្ធផងដែរ។
ក្នុងពិធីនោះឯកឧត្តម អ៊ុំ រាត្រី បានមានប្រសាសន៍ថា៖ ការប្រារព្ធទិវាពិភពលោកប្រយុទ្ធនឹងជំងឺអេដស៍ ១ធ្នូ នៅកម្ពុជា អស់រយៈពេល៣២ឆ្នាំកន្លងទៅនេះ បានបង្ហាញពីឆន្ទៈនយោបាយដ៏មោះមុតរបស់រាជរដ្ឋាភិបាលកម្ពុជា ក្នុងការចូលរួមជាមួយពិភពលោក ដើម្បីឆ្ពោះទៅបញ្ចប់ជំងឺអេដស៍។
ឯកឧត្តម អភិបាលខេត្ត បានបញ្ជាក់ដឹងទៀតថា៖ កម្ពុជា ប្តេជ្ញាបន្តខិតខំប្រឹងប្រែង សម្រេចឲ្យបានគោលដៅសកលទី១ ពោលគឺធ្វើយ៉ាងណាឲ្យអ្នក ដែលសង្ស័យថាមានផ្ទុកមេរោគអេដស៍ ឲ្យពួកគាត់ បានទៅទទួលសេវាព្យាបាល បានទាន់ពេលវេលា និងទប់ស្កាត់ករណីឆ្លងថ្មីនៃមេរោគអេដស៍នេះផងដែរ។ហើយកម្ពុជាបន្តពង្រឹងនិងពង្រីកការអប់រំលើកកម្ពស់ការយល់ដឹងពីការបង្ការការចម្លងមេរោគអេដស៍ ជារួមនៅ តាមគ្រឹះស្ថានអប់រំ សហគមន៍មូលដ្ឋាន ជាពិសេសក្នុងចំណោមយុវវ័យ ក្រុមប្រជាជនដើម្បី លើកកម្ពស់ការទប់ស្កាត់ការចម្លងមេរោគអេដស៍ពីម្តាយទៅកូន។
ក្នុងឱកាសនោះឯកឧត្តម អ៊ុំ រាត្រី បានស្នើឲ្យបងប្អូនជនរួមជាតិទាំងអស់ចូលរួមឲ្យបានសកម្ម និងឲ្យបានទ្វេដង ជាមួយរាជរដ្ឋាភិបាលកម្ពុជា ជាមួយកាកបាទក្រហមកម្ពុជា ក្នុងយន្តការជាតិតែមួយ ដើម្បីសម្រេចបានដោយជោគជ័យនៅគោលនយោបាយឆ្នាំ២០២៣–២០៣០និង គោលនយោបាយជាតិបញ្ចប់អេដស៍ និងកម្មវិធីអេដស៍សម្រាប់ឆ្នាំ២០២៣–២០៣០។
ឯកឧត្តម អ៊ុំ រាត្រី បន្តឲ្យដឹងទៀតថា៖ ចំពោះក្មួយៗយុវនារី យុវជនទាំងអស់ត្រូវចូលរួមអនុវត្តឲ្យបានខ្ជាប់ខ្ជួននូវផ្នត់គំនិត និងឥរិយាបថដើម្បីបង្ការខ្លួនពីការចម្លងមេរោគអេដស៍ និងដើរតួឱ្យបានសកម្មក្នុងការប្រយុទ្ធនឹងជំងឺអេដស៍តាមរយៈ សកម្មភាពមិត្តអប់រំមិត្ត ការបង្កើតក្រុមជួយខ្លួនឯង ចែករំលែកចំណេះដឹង ផ្សព្វផ្សាយព័ត៌មានថ្មីៗផងដែរ៕
