ខេត្តកំពង់ធំ៖ នាព្រឹកថ្ងៃទី២៤ ខែវិច្ឆិកា ឆ្នាំ២០២៥ រដ្ឋបាលខេត្តកំពង់ធំ បានរៀបចំពិធីទិវាបរិស្ថានជាតិ ២៣ វិច្ឆិកា ក្រោមប្រធានបទ “ ទម្លាប់ស្អាត គ្រួសារស្អាត និងបរិស្ថានល្អ ” នៅលើសួនច្បារដងស្ទឹងសែន។
លោក ជា វ៉ាន់ចាន់ អភិបាលរងខេត្តកំពង់ធំ បានមានប្រសាសន៍ថា ការរៀបចំពិធីនេះឡើងក្នុងគោលបំណង ដើម្បីលើកកំពស់ ការយល់ដឹង និងការស្រទ្បាញ់បរិស្ថាន ជាពិសេសជំរុញចលនាប្រជាពលរដ្ឋ ព្រះសង្ឃ កងកម្លាំងគ្រប់ប្រភេទ មន្រ្តីរាជការគ្រប់លំដាប់ថ្នាក់ សិស្ស និស្សិត ចូលរួមក្នុងកិច្ចគាំពារបរិស្ថាន ការអភិរក្សជីវៈចម្រុះ ស្របតាមយុទ្ធសាស្រ្តចក្រាវិស័យបរិស្ថានដែលបានដាក់ចេញជាបន្តបន្ទាប់ ដោយផ្តោតសំខាន់ទៅលើមុំយុទ្ធសាស្រ្តចំនួន៣គឺ ភាពស្អាត ភាពបៃតង និងចីរភាព ជាពិសេស បានបំផុសមហាជននៅគ្រប់មជ្ឈដ្ឋាន និងគ្រប់ភាគីពាក់ព័ន្ធទាំងអស់ បន្តផ្លាស់ប្តូរទស្សនៈ ពីការគិតអវិជ្ជមាន ទៅវិជ្ជមាន ពីទ្រឹស្តី ទៅការអនុវត្តជាក់ស្តែង ចូលរួមសម្អាតថែរក្សាអនាម័យ បរិស្ថាន និងជាសារអប់រំមួយសម្រាប់សាធារណៈជនគ្រប់ទិសទី ឱ្យបានយល់ដឹងផងដែរ។
ក្នុងនោះលោកអភិបាលរងខេត្ត ក៏បានធ្វើការអំពាវនាវដល់ប្រជាពលរដ្ឋទាំងអស់ ត្រូវមានកាតព្វកិច្ចចូលរួមថែរក្សាអនាម័យបរិស្ថានទាំងអស់គ្នា អនាម័យស្អាត បរិស្ថានល្អ នាំឱ្យសុខភាពយើងរឹងមាំផងដែរ៕
