បន្ទាយមានជ័យ ៖ នៅព្រឹកថ្ងៃទី៣១ ខែតុលា ឆ្នាំ២០២៥ ឯកឧត្ដម ឌិ តទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររដ្ឋាភិបាលចុះមូលដ្ឋានចុះមូលដ្ឋានខេត្តបន្ទាយមានជ័យ អញ្ជើញជាអធិបតីភាពក្នុងពិធីសំណេះសំណាល និងចែករង្វាន់ដល់ សិស្សជាប់និទ្ទេស A ទាំង១២៦នាក់ នៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤–២០២៥ នៅក្នុងខេត្តបន្ទាយមានជ័យ ប្រារព្ធធ្វើនៅសាលប្រជុំ ធំ សាលាខេត្តបន្ទាយមានជ័យ។
ឯកឧត្ដម អ៊ុំ រាត្រី អភិបាល នៃគណៈអភិបាលខេត្ត បានបញ្ជាក់ថា កាលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ឆ្នាំ២០២៥ ខេត្តបន្ទាយមានជ័យ មានសិស្សប្រឡងជាប់និទ្ទេស A កើនឡើងច្រើនជាងបណ្តាឆ្នាំកន្លងទៅ និងឈរក្នុងលំដាប់ទី៦ នៃបណ្តារាជធានីខេត្តទូទាំងប្រទេស។ ជាក់ស្តែង បេក្ខជនប្រឡងជាប់សញ្ញាបត្រមធ្យមសិក្សាទុតិយភូមិ មានចំនួន ៥,៥១៧ នាក់ ស្រី ៣,៣២០ នាក់ ស្មើនឹង ៨៥.៥២% /ស្រី ៩០.២៤% ដែលក្នុងនោះ និទ្ទេស A មាន ១២៦ នាក់/ស្រី ៦៩ នាក់, និទ្ទេស B មាន ៤៤៥នាក់/ស្រី ២៨៩ នាក់,និទ្ទេស C មាន ១៣២៥ នាក់/ស្រី ៨៩៥នាក់, និទ្ទេស D មាន ២០៩០នាក់/ស្រី ១៣១០ នាក់, និទ្ទេស E មាន ១៥៣១នាក់/ស្រី ៧៥៧នាក់។
ក្នុងឱកាសនោះឯកឧត្តមរដ្ឋមន្ត្រីបានជំរុញលើកទឹកចិត្តទៅដល់សិស្សនិទ្ទេស A ក៏ដូចជាសិស្សដែលទើបប្រឡងជាប់ ត្រូវបន្តការសិក្សាចាប់យកជំនាញមួយឱ្យពិតប្រាកដ ដើម្បីអភិវឌ្ឍខ្លួនឯង និងងាយរកការងារធ្វើ។ ក៏ដូចជាបង្កើនសមត្ថភាព ចំណេះដឹង និងចំណេះជំនាញ ដើម្បីចូលរួមជាចំណែកនាពេលអនាគត ក្នុងការអភិវឌ្ឍន៍ក្រុមគ្រួសារខេត្តបន្ទាយមានជ័យ និងប្រទេសជាតិ។
ឯកឧត្ដម រដ្ឋមន្ត្រី ក៏បានបញ្ជាក់បន្ថែមទៀតផងដែរថា នៅគ្រប់អាណត្តិ ពិសេសនៅក្នុងនិតីកាលទី៧នេះ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានគិតគូរយកចិត្តទុកដាក់យ៉ាងខ្លាំងក្នុងការអភិវឌ្ឍវិស័យអប់រំ ធនធានមនុស្សជាអទិភាព។ ជាពិសេសក្មួយៗសិស្សានុសិស្សដែលគ្មានលទ្ធភាពបន្តការសិក្សា នៅមហាវិទ្យាល័យ មានការផ្តល់នូវអាហារូបករណ៍ជាច្រើនកន្លែង ព្រមទាំងផ្តល់ឱកាសការងារសម្រាប់ក្មួយ សិស្ស និស្សិត យុវជនសិក្សាជំនាញ មានការងារធ្វើផងដែរ៕
