ខេត្តបន្ទាយមានជ័យ៖ជារៀងរាល់ឆ្នាំដល់ថ្ងៃខែពិធីបុណ្យកឋិនទានសាមគ្គីដែលជាបុណ្យប្រពៃណីជាតិ សមាគមសម្ព័ន្ធយុវជនដើម្បីសន្តិភាព តែងតែចូលរួមមិនដែលខាន។ជាក់ស្តែងសម្រាប់កម្មវិធីបុណ្យកឋិនទានមហាសាមគ្គី នៅវត្តខ្មែរពុទ្ធភូមិជាយដែនសីមារាម ស្ថិតនៅក្នុងសង្កាត់អូរជ្រៅ ក្រុងប៉ោយប៉ែត លោកបណ្ឌិត ឌីម សុខុន អគ្គលេខាធិការ សមាគមសម្ព័ន្ធយុវជនដើម្បីសន្តិភាព តំណាងឲ្យឯកឧត្តមបណ្ឌិត សុខ ចាន់ភក្តី ប្រធាន សមាគម អមដំណើរដោយអគ្គលេខាធិការរង ប្រធាន–អនុប្រធានសាខារាជាធានី/ខេត្ត,ប្រធាន–អនុប្រធានផ្នែក រួមនិងសមាជិក សមាជិការ អញ្ជើញចូលរួមពិធីបុណ្យកឋិនទានមហាសាមគ្គី ដើម្បីប្រគេនដល់ព្រះ ភិក្ខុសង្ឃ ដែលគង់ចាំព្រះវស្សាអស់ត្រីមាស ហើយក៏ដើម្បីប្រមូលបច្ច័យសម្រាប់កសាងក្នុងបរិវេណវត្តផដែរ។
កម្មវិធីអង្គកឋិនទានសាមគ្គីនេះ ក៏បានរៀបចំទៅតាមបែបប្រពៃណីនៃព្រះពុទ្ធសាសនា សម្រាប់នៅវត្តពុទ្ធភូមិខ្មែរជាយដែន គឺបានធ្វើឡើងនាវេលារសៀលថ្ងៃសៅរ៍ ៤កើត ខែកត្តិក ឆ្នាំម្សាញ់ សប្តេស័ក ព.ស.២៥៦៩ ត្រូវនឹងថ្ងៃទី២៥ ខែតុលា ឆ្នាំ២០២៥ ជួបជុំពុទ្ធបរិស័ទជិតឆ្ងាយ ប្រារព្ធពិធីក្រុងពាលីធ្វើបទនមស្ការ ព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្តនិងសម្តែងព្រះធម៌ទេនា។លុះព្រឹកត្រូវនិងថ្ងៃទី២៦ ខែតុលា ប្រគេនយាគូដល់ព្រះសង្ឃ វេអង្គកឋិនទាន និងដង្ហែរអង្គឋិនទានមហាសាមគ្គីប្រទក្សិណ ៣ជុំវិញព្រះវិហារប្រគេនដល់ព្រះសង្ឃផងដែរ។ ក្នុងពិធីអង្គកឋិនទាននេះក៏មានការនិមន្ត និងអញ្ជើញចូលរួមពីសំណាក់ព្រះមេគណខេត្ត ព្រះចៅអធិការវត្ត ព្រះមន្ត្រីសង្ឃ ឯកឧត្តម លោកជំទាវ ជ្ញាធរមូលដ្ឋាន រួមនឹងអស់លោក លោកស្រីពុទ្ធបរិស័ទជិតឆ្ងាយយ៉ាងច្រើនកុះករផងដែរ ។
ពាក់ព័ន្ធពិធីបុណ្យកឋិនទាននេះ ព្រះមេគណខេត្តបានមានសង្ឃដីការថា បុណ្យកឋិន គឺជាពិធីបុណ្យមួយចាប់ផ្ដើមធ្វើបន្ទាប់ពីបុណ្យចេញវស្សា បុណ្យកឋិនតែងត្រូវបានដង្ហែចូលគ្រប់ទីអារាមទាំងអស់ ពុំមានទំនេរវត្ដណាមួយ ត្រូវបានខកខានឡើយដូច្នេះគេតែងតែឃើញ ក្បួនកឋិនទានតែងបានដង្ហែទៅកាន់ទីអារាមរៀងៗ ខ្លួនចាប់ពីថ្ងៃ ១រោច ខែអស្សុជដល់ថ្ងៃ១៥កើត ខែកត្តិក ហើយបើទីអារាមណាមួយ មិនមានកឋិនណាមួយហែចូលទេ។ ទីអារាមនោះក៏ត្រូវតែរៀបចំជាកឋិនជើងវត្តដែរ ។ ពិធីហែអង្គកឋិនទៅកាន់ទីអារាមនិមួយៗ គេរៀបចំធ្វើឡើងយ៉ាងអធិកអធម្ម សប្បាយរីករាយយ៉ាងក្រៃលែង អ្នកផ្ដើមបុណ្យបានរៀបចំបរិក្ខាកឋិនមានត្រៃចីវរ ចិវរ សង្ឃាដិ ស្បង់ ព្រមដោយទេយ្យទាន ផ្សេងៗទៀតដូចជា បាត ចានស្រាក់ កាំបិតចេស ម្ជុល ថង់យាម ឆ័ត្រជាដើម សព្វគ្រប់អស់ហើយ គេនាំគ្នាហែទៅទីអារាម ដែលបានកំណត់ទុក។ បើកឋិននោះដង្ហែទៅវត្តឆ្ងាយ គេជួបជុំគ្នាពីព្រលឹមរួចនាំគ្នាឡើងរថយន្តសំដៅទៅវត្តនោះ ។ បើវត្តនៅតាមដងទន្លេ គេជិះទូករឺ កប៉ាល់។ បុណ្យកឋិនទាន ធ្វើឡើងនៅ ក្នុងគោលបំណងសំខាន់ៗមួយចំនួន រួមមាន៖១) ដើម្បីបង្កើតនូវសាមគ្គីភាពរវាងបុគ្គលគ្រួសារនិងសង្គម ,២) ដើម្បីទ្រទ្រង់ព្រះពុទ្ធសាសនាឲ្យបានចម្រើនរុងរឿងយូរអង្វែង, ៣) ដើម្បីផ្តល់នូវកម្លាំងកាយចិត្ត ដល់ព្រះភិក្ខុសង្ឃដើម្បីថ្វាយឧបការៈទំនុកបម្រុងឧបត្ថម្ភព្រះភិក្ខុសាមណេរដែលជាមហាកុសលដ៏ប្រសើរ និងដើម្បីកុំឲ្យកើតនូវសេចក្ដីប្រមាថចំពោះមហាកោសល្យរបស់ខ្លួនថែមទៀតផង៕
