ខេត្តបន្ទាយមានជ័យ៖កាលវេលាកំណត់ នៃរដូវកាលបុណ្យកឋិនទាន នាឆ្នាំ២០២៥ ចូលមកដល់ ចាប់ពីថ្ងៃ១រោច ខែអស្សុជ ដល់ថ្ងៃ១៥ ខែកត្តិក ត្រូវនឹងថ្ងៃទី៨ ខែតុលា រហូតដល់ថ្ងៃទី៥ ខែវិច្ឆិកា ឆ្នាំ២០២៥ ដែលបានកំណត់ត្រឹមតែ២៩ថ្ងៃប៉ុណ្ណោះ ហើយវត្តនីមួយៗ ទទួលអង្គកឋិនទានបានតែមួយដង។ សម្រាប់វត្ត សមាធិផល ហៅវត្តលោកយួន ស្ថិតនៅក្នុង សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ រួមមាន ឯកឧត្តម លោកជំទាវ លោកឧកញ៉ា អស់លោក លោកស្រី បងប្អូនប្រជាពុទ្ធបរិស័ទ ដែលជាម្ចាស់វេណទាំង១៤ បានមានសទ្ធាជ្រះថ្លាប្រកបដោយបញ្ញាញាណសម្បយុត្តិ បានស្រុះស្រួលគ្នាជាឯកឆន្ទផ្ដួចផ្ដើមធ្វើបុណ្យកឋិនទានសាមគ្គីមួយ ដើម្បីដង្ហែទៅវត្តប្រគេនដល់ព្រះសង្ឃដែលគង់ចាំព្រះវស្សា អស់កាលត្រីមាសក្នុងពុទ្ធសីមានៃ វត្តសមិទ្ធិផល ដែលកម្មវិធីបានធ្វើការរៀបចំទៅតាមបែបប្រពៃណីនៃព្រះពុទ្ធសាសនាជាហូរហែ។ ព្រះគ្រូ សោភ័ណវិមល ប៉ាត សុគន្ធ អនុគណក្រុង សិរីសោភ័ណ និងជា ព្រះគ្រូចៅអធិការវត្ត សមាធិផល ព្រះអង្គបានមាន សង្ឃដីកាថា កឋិនទាន គឺជាបុណ្យប្រពៃណីព្រះពុទ្ធសាសនា ដែលមានសម្តែងទុកក្នុងព្រះវិន័យបិដក មហាវគ្គ កឋិនក្ខន្ធកៈ ជាបុណ្យដែលមានលក្ខណៈប្លែកពីបុណ្យដទៃ ៥យ៉ាង ទី១. ប្លែកដោយកាល គឺជាកាលទាន ក្នុងមួយឆ្នាំធ្វើបានតែ១ដង មានរយៈពេលកំណត់ត្រឹមតែ២៩ថ្ងៃ ហើយវត្តមួយទទួលបានកឋិនតែ១ដងប៉ុណ្ណោះ ទី២.ប្លែកដោយវត្ថុ គឺសំពត់ដែលជាវត្ថុកឋិននោះ មានតែស្បង់ ចីវរ និងសង្ឃាដី ដែលគេធ្វើត្រឹមត្រូវតាម ពុទ្ធប្បញ្ញត្តិ ទី៣.ប្លែកដោយអំពើ គឺបុគ្គលអ្នកធ្វើគម្បីធ្វើឱ្យត្រូវតាមវិន័យបញ្ញត្តិ ហើយព្រះសង្ឃត្រូវក្រាលគ្រង ឱ្យត្រូវតាមវិន័យបញ្ញត្តិ ទី៤. ប្លែកដោយបដិគ្គាហកៈ គឺអ្នកទទួលសំពត់កឋិន បានតែភិក្ខុដែលនៅចាំព្រះវស្សា គ្រប់៣ខែ ដោយមិនដាច់វស្សាទើបទទួលក្រាលគ្រងបាន ទី៥.ប្លែកដោយអានិសង្ស ជាបុណ្យមានផលានិសង្សច្រើន អ្នកធ្វើទទួលបានអានិសង្ស ៥យ៉ាងគឺ ១.មានប្រាជ្ញាក្លៀវក្លាមុះមុត ២.មានពណ៌សម្បុរល្អ ៣.មានរូបល្អ ៤.មាន ទ្រង់ទ្រាយល្អ ៥.នឹងបានជាស្តេចចក្រពត្តិក្នុងជាតិណាមួយពុំខានឡើយ។ គួរបញ្ជាក់ថាបុណ្យកឋិនទាន សាមគ្គីវត្តសមាធិផលទទួលបាន បច្ច័យចំនួន ៣៤ ០២៤ ៦០០៛ និង ១៧៨០$ សរុបចំនួនប្រាក់រៀល ៤១ ១៤៤ ៦០០៛ និង ចំណាយផ្សេងៗអស់ចំនួន ២៣ ៥៧៨ ០០០៛៕
