ខេត្តបន្ទាយមានជ័យ៖ ឯកឧត្តម ហ៊ឹម វិបុលឬទ្ធិ រដ្ឋលេខាធិការក្រសួងធម្មការនិងសាសនា តំណាង ឯកឧត្ដម ចាយ បូរិន្ទ រដ្ឋមន្ត្រីក្រសួងធម្មការនិងសាសនា បាននាំយក នូវ អង្ករ ជាទេយ្យទាន ដ៏ថ្លៃថ្លា របស់សម្តេចមហាបវរបតី ហ៊ុន ម៉ាណែត នាយករដ្ឋមន្ត្រីនៃព្រះរាជា ណាចក្រ កម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត តាមរយៈក្រសួងធម្មការនិងសាសនាបានប្រគេនដល់ព្រះសង្ឃចំនួន ៧៧ វត្ត នៅក្នុងខេត្តបន្ទាយមានជ័យ ដែលក្នុង១ វត្តទទួលបានអង្ករ ៣០០គីឡូក្រាម។
ឯកឧត្ដម ចាយ បូរិន បានមានប្រសាសន៍ថា ព្រះពុទ្ធសាសនាកាន់តែមានតួនាទីចាំបាដើម្បីធានាថា ការរីកចម្រើន ខាងសម្ភារៈនិងស្មារតីត្រូវតែមានតុល្យភាពនិង ល្បឿនស្មើគ្នា ការស្វែងរកភាពមានបានខាងផ្នែកសម្ភារៈ ត្រូវតែស្ថិតនៅក្នុងក្របខ័ណ្ឌនៃច្បាប់សីលធម៌ សុជីវធម៌ សីលធម៌ និងគុណធម៌ ។ ដូច្នេះវាពិតជាមានភាពចាំបាច់និងបន្ទាន់ក្នុងការបញ្ជ្រាបការយល់ដឹង ដល់សង្គមដើម្បីពន្យល់ឱ្យមើលឃើញពីគុណតម្លៃនិងផលប្រយោជន៍ នៃការប្រតិបត្តិតាមធម៌វិន័យ ការគោរពច្បាប់ការលើកកម្ពស់ សុជីវធម៌ មនុស្សធម៌និងសីលធម៌ និងគុណធម៌។ ជាការពិត សាសនាបានបង្រៀនមនុស្សឱ្យធ្វើនូវសេចក្ដីល្អ ដើម្បីឈានដល់ការទទួលបាននូវសេចក្ដីសុខសម្រាប់បុគ្គលគ្រប់រូបក៏ដូចជាសង្គមទាំងមូល។ មិនតែប៉ុណ្ណោះព្រះពុទ្ធសាសនាក៏ជាបទដ្ឋាននៃគុណតម្លៃរួម ដើម្បីជួយដល់សង្គមមនុស្សមានសាមគ្គីធម៌សុខដុមរមនា សន្តិភាព និងការអភិវឌ្ឍហើយក៏ជាមាគ៌ា អ្នកប្រតិបត្តិគ្រប់រូបបានធ្វើដំណើរ ទៅចាប់យកប្រយោជន៍ទាំងក្នុងលោកនេះនិងលោកខាងមុខផងដែរ ។
ឯកឧត្ដម ចាយ បូរិន បានមានប្រសាសន៍បន្តថា ប្រទេសជាតិយើងមានសុខសន្តិភាពពេញលេញនិងវិបុលភាពសុភមង្គលមានសិទ្ធិសេរីភាពខាងជំនឿនិងសាសនា ក៏ប៉ុន្តែបច្ចុប្បន្ននេះប្រទេសយើងត្រូវបានប្រទេសជិតខាង ពួកចោរសៀមបាននិងកំពុងរំលោភឈ្លានពានមកលើទឹកដីកម្ពុជា មិនចេះឈប់ធ្វើទុក្ខបុកម្នេញមកលើបងប្អូនប្រជាពលរដ្ឋដែលកំពុងរស់នៅអាស្រ័យផលតាមខ្សែបន្ទាត់ព្រំដែនជួបការលំបាក។ ដូចនេះក្នុងនាមក្រសួងធម្មការនិងសាសនាក៏សូមធ្វើការអំពាវនាវដល់បងប្អូនប្រជាពលរដ្ឋទាំងអស់ជឿជាក់លើរាជរដ្ឋាភិបាល ដោយកាលៈទេសៈនេះ ប្រមុខរាជរដ្ឋាភិបាល គិតគូរយកចិត្តទុកដាក់ខ្ពស់អំពីសុខទុក្ខក្នុងការរស់នៅរបស់ប្រជាពលរដ្ឋគ្រប់រូបព្រមទាំងព្រះសង្ឃផងដែរ៕
