ខេត្តបន្ទាយមានជ័យ៖ផ្ទះថ្មីចំនួន ២ខ្នង ត្រូវបានប្រគល់ជូនលោកតា មេឃ អឿម អាយុ ៨២ឆ្នាំ ជាគ្រួសារក្រីក្រ រស់នៅក្នុងភូមិដីឡូត៍និងលោកយាយ ហ៊ាប យ៉ាវ រស់នៅក្នុងភូមិគាប សង្កាត់ទឹកថ្លា ក្រុងសេរីសោភ័ណ្ឌ ខេត្តបន្ទាយមានជ័យ។ ផ្ទះនេះចំណាយនៃការសាងសង់របស់សាខាកាកបាទក្រហមខេត្តបន្ទាយមានជ័យ សរុបចំណាយថវិកាអស់ចំនួន២២ .២៩៤,២០០រៀល។
ដោយពិធីប្រគល់ផ្ទះនេះប្រព្រឹត្តទៅក្រោមអធិបតីភាព ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមខេត្តនិងលោកជំទាវ ព្រមទាំងមានការអញ្ជើញចូលរួមពីលោកស្រី នួម សុភ័ណ្ឌ អនុប្រធានកិត្តិយសសាខា នារសៀលថ្ងៃទី១១ ខែកញ្ញា ឆ្នាំ២០២៦។
នាឱកាសនោះឯកឧត្តម អ៊ុំ រាត្រី បានពាំនាំប្រសាសន៍ផ្ដាំផ្ញើសាកសួរសុខទុក្ខពីសំណាក់សម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានិងលោកជំទាវបណ្ឌិត ពេជ្រចាន់មុន្នីហ៊ុន ម៉ាណែតអនុប្រធានអចិន្ត្រៃយ៍កាកបាទក្រហមកម្ពុជា ដែលជានិច្ចជាកាលសម្ដេចនិងលោកជំទាវបណ្ឌិតតែងតែគិតគូរពីការសុខទុក្ខរបស់បងប្អូនប្រជាពលរដ្ឋគ្រប់ទិសទីទោះនៅជិតក្តីឆ្ងាយក្តី។
ឯកឧត្តម អ៊ុំ រាត្រី បន្តថា ផ្ទះថ្មីនៅចំពោះមុខយើងនេះគឺជាផ្ទះមនុស្សធម៌របស់សាខាកាកបាទក្រហមខេត្តបន្ទាយមានជ័យមានលក្ខណៈសមរម្យ រឹងមាំអាចកាត់បន្ថយភាពងាយរងគ្រោះបានមួយកម្រិតហើយគិតមកដល់ពេលនេះសាខាបានអនុវត្តសាងសង់ផ្ទះសរុបចំនួន ៣៤ខ្នងផ្ទះ ចំពោះការអនុវត្តគម្រោងសង់ផ្ទះជូនគ្រួសារក្រីក្រខ្វះជម្រកស្នាក់នៅនេះពិតជាបានលើកកម្ពស់តម្លៃមនុស្សធម៌របស់កាកបាទក្រហមកម្ពុជាដែលមាន សម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រមុខដឹកនាំ។គួរបញ្ជាក់ថា ក្រៅពីប្រគល់ផ្ទះជូនក៏មានអំណោយមនុស្សធម៌បន្ថែមរួមមានៈអង្ករ ៥០kg ,ត្រីខ ១យួរ ,មីវីនវីន ២៥កញ្ចប់,មុង១,ភួយ១,សារុង១,ក្រមា១,ធុងទឹកជ័រយួរដៃ២,ធុងទឹក៦០L ១,ប្រេងឆា១ដប,ឆ្នាំង២,ចានបាយ៥,ស្លាបព្រា៥,កន្ទេលជ័រ១,ឆៃប៉ូវ១កែង,មុងកង២ និងថវិកា១០ម៉ឺនរៀល
ហើយ លោកស្រី នួម សុភ័ណបាន ឧបត្ថម្ភបន្ថែមចំនួន ២០ម៉ឺនរៀលផងដែរ។ សម្រាប់ ស្រ្តីមានផ្ទៃពោះ ៧នាក់ ម្នាក់ៗ ទទួលបាន ឃិតសុខភាព១កញ្ចប់ ថវិកាមួយចំនួន។ លោកតា លោកយាយ ៥០នាក់ ម្នាក់ៗ ទទួលបាន ភួយ១ ក្រម៉ា១ និងថវិកាមួយចំនួនផងដែរ៕
