ខេត្តបន្ទាយមានជ័យ៖ស្របពេលនៃពិធីបុណ្យកាន់បិណ្ឌ ភ្ជុំបិណ្ឌ ជាបុណ្យប្រពៃណីជាតិខ្មែរយើង ហើយក៏ជាបុណ្យធំជាងគេក្នុងចំណោមបុណ្យផ្សេងៗ ចំពោះអ្នកដែលកាន់ព្រះពុទ្ធសាសនាសម្រាប់បុណ្យកាន់បិណ្ឌវេនទី១១នេះ សាលាដំបូងខេត្តបន្ទាយមានជ័យ និងអយ្យការ អមសាលាដំបូងខេត្ត ព្រមទាំងសហការី រួមញាតិញោមពុទ្ធបរិស័ទរៀបចំបុណ្យកាន់បិណ្ឌវេនទីដប់មួយនេះនៅ វត្តគិរីធម្មបទខ្លាកូនថ្មីស្ថិតនៅក្នុងសង្កាត់ កំពង់ស្វាយ ក្រុងសេរីសោភ័ណ ក្នុងនោះម្ចាស់វេណ បាននាំយក នូវទេយ្យទាន គ្រឿងឧបភោគបរិភោគ និងបច្ច័យប្រគេនដល់ ព្រះសង្ឃសម្រាប់ផ្គត់ផ្គង់ លើការកសាង នូវសមិទ្ធផលនានានៅក្នុងវត្ត ។ វត្តនេះ មានទេសភាពល្អ ខ្យល់ អាកាសបរិសុទ្ធលក្ខណៈធម្មជាតិ។
ព្រះគ្រូ សោភ័ណនិមលប៉ាត សុគន្ធ ព្រះអនុគុណ ក្រុងសិរីសោភ័ណ បានមាន សង្ឃដីកាបញ្ជាក់ថា គោលបំណងនៃបុណ្យកាន់បិណ្ឌនេះ គឺដើម្បីបង្សុកូលឧទ្ទិសមហាកុសលដល់បុព្វការីជនញាតិការទាំងប្រាំពីរសណ្តាន ឧបាសក ញូង យ័ន្ត ឧបាសិកា ចី គឹម អេង ដែលបានចែកឋានទៅកាន់បរលោក ហើយនោះនិងបានឧទ្ទិសកុសលផលបុណ្យជូនដល់បងប្អូនវរៈកងទ័ពកម្ពុជា ដែលពលីជីវិត ក្នុងការការពារបូរណភាពទឹកដីពីពួកសៀមឈ្លានពានដោយមានមហិច្ឆតាចង់បានទឹកដីកម្ពុជាមិនចេះឈប់។ បច្ចុប្បន្នពពួកនេះនៅតែកំពុងឈ្លានពាន ល្មើសនៃបទឈប់បាញ់ ដែលធ្វើការយកបន្លាលួសព័ទ្ធយកដីរបស់ប្រជាពលរដ្ឋស្ថិតនៅក្នុងភូមិជោគជ័យ និងឃុំអូរបីជាន់ស្រុកអូរជ្រៅ ព្រមទាំងមានអំពើហិង្សាមកលើកងទ័ពប្រជាពលរដ្ឋព្រះសង្សរងរបួសធ្ងន់និងស្រាលចំនួន ២៨អង្គ/នាក់។ ក៏ប៉ុន្តែដែលមានភាពក្លាហានរបស់កងទ័ពប្រជាពលរដ្ឋយើង មានភាពសាមគ្គីរុញច្រានពួក សូមឲ្យបញ្ឈប់នូវការឈ្លានពានឬការរាយបន្លាលួសជាដើម ។ ក្នុងនាមជាព្រះមន្ត្រីសង្ឃ ក្នុងក្រុងសិរីសោភ័ណ ព្រះអង្គ ក៏សូមធ្វើការអំពាវនាវដល់បងប្អូនប្រជាពលរដ្ឋទាំងអស់ជឿទុកចិត្ត លើប្រមុខរាជរដ្ឋាភិបាលកម្ពុជា ត្រូវបំផុសស្មារតីលើកកម្ពស់សាមគ្គីធម៌ សង្គហធម៌ស្នេហាជាតិប្រកបដោយបញ្ញាញាណស្របតាមពុទ្ធឱវាទសំដៅលើកកម្ពស់សុខភាពផ្លូវកាយ ផ្លូវចិត្ត ពង្រឹងធនធានសង្គម ចូលរួមជាមួយរាជរដ្ឋាភិបាលក្នុងការដោះស្រាយ គ្រប់ការប្រឈមសំដៅថែរក្សាសន្តិភាពបូរណភាពទឹកដីនិងការអភិវឌ្ឍប្រទេសជាតិឲ្យមានភាពរីកចម្រើនជានិរន្ត៕
