ខេត្តប៉ៃលិន ៖នៅព្រឹកថ្ងៃទី១៨ ខែមេសា ឆ្នាំ២០២៦ តាមការណែនាំ និងយកចិត្តទុកដាក់ពី លោកជំទាវបណ្ឌិត បាន ស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិននិង ក្រុមការងារអនុសាខាកាកបាទក្រហមកម្ពុជាស្រុកសាលាក្រៅ ដែលមានលោក សៀ សុខុម អភិបាលស្រុកនិងជាប្រធានកិត្តិយសអនុសាខាកក្រកស្រុក គណៈកម្មាធិការអនុសាខាស្រុក និង ក្រុមមន្ត្រីប្រតិបត្តិសាខា បានរៀបចំពិធីចុះជួបសួរសុខទុក្ខនិងនាំយកអំណោយមនុស្សធម៌ផ្តល់ជូនប្រជាពលរដ្ឋរងគ្រោះដោយខ្យល់កន្រ្តាក់ចំនួន ២២គ្រួសារ ក្រោមអធិបតីភាព ឯកឧត្តម ជា ចាន់ឌិន ប្រធានក្រុមប្រឹក្សាខេត្ត និងលោកជំទាវ ពៅ សុខ អនុប្រធានអចិន្ត្រៃយ៍គណៈកម្មាធិការសាខា ។
ប្រជាពលរដ្ឋរងគ្រោះទាំង២២គ្រួសារ មកពីភូមិចំនួន៦ ក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន ក្នុងនោះបណ្ដាលអោយ រលំទាំងស្រុងចំនួន១ខ្នងផ្ទះ (១គ្រួសារ) និងប៉ើងតំបូលផ្ទះចំនួន២១ខ្នង(២១គ្រួសារ) ។
ក្នុងឱកាសសំណេះសំណាលសួរសុខទុក្ខ ឯកឧត្តមប្រធានក្រុមប្រឹក្សាខេត្ត និងលោកជំទាវអនុប្រធាបអចិន្ត្រៃយ៍សាខា បានពាំនាំ ប្រសាសន៍ផ្ដាំផ្ញើសួរសុខទុក្ខពីសំណាក់។លោកជំទាវបណ្ឌិត បាន ស្រីមុំ ប្រធានគណៈកម្មាធិការសាខា និងជាអភិបាលខេត្តប៉ៃលិន ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋរងគ្រោះ និងងាយរងគ្រោះគ្រប់ៗរូប ដោយមិនប្រកាន់ វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ និងបានសម្ដែងនូវការសោកស្ដាយចំពោះការខូចខាតផ្ទះសំបែងទ្រព្យសម្បត្តិ របស់បងប្អូន ដែលនេះជាគ្រោះមហន្តរាយបង្កដោយធម្មជាតិគ្មាននរណាម្នាក់ចង់ជួបប្រទះឡើយ។
ទន្ទឹមនោះឯកឧត្តម និងលោកជំទាវ ក៏បានអំពាវនាវដល់ប្រជាពលរដ្ឋទាំងអស់សូមមានការប្រុងប្រយ័ត្នឲ្យបានគ្រប់ៗគ្នា ជាពិសេស សូមមេត្តាថែទាំសុខភាពឱ្យបានល្អថែទាំកូនចៅតូចៗត្រូវប្រុងប្រយ័ត្នខ្លាចក្រែងជួបវិបត្តិផ្សេងៗ ម្យ៉ាងវិញ ទៀត បើឃើញភាពមិនស្រួលចំពោះសុខភាពត្រូវប្រញាប់ទៅមណ្ឌលសុខភាពឬមន្ទីរពេទ្យដែល នៅជិតបំផុត ដើម្បីអាចពិគ្រោះ ឬព្យាបាលបានទាន់ពេលវេលា ។
សូមបញ្ជាក់ថា គ្រួសារនីមួយៗទទួលបានអំណោយរួមមាន ៖ អង្ករ ២៥គីឡូ , ទឹកត្រី ១យួរ , មី ១កេស, ទឹកបរិសុទ្ធ២យួរ , ថវិកាមួយចំនួន និងស័ង្គសីសរុបចំនួន ២៤៣ សន្លឹក បែងចែកតាមការរងគ្រោះជាក់ស្ដែង ៕
