ខេត្តបន្ទាយមានជ័យ៖លោកស្រី យាំង អួយលីន នាយិកាអង្គការគ្រួសារកុមារអភិវឌ្ឍន៍ ហៅកាត់ថា FRA នៃកោះតៃវ៉ាន់បានប្រគេនកុំព្យូទ័រ Desktop ១ ,ម៉ាស៊ីន Printer១គ្រឿង និង Projector ១គ្រឿង ដល់ពុទ្ធិកបឋមសិក្សាវត្តទក្ខិណគង្គារាមអញ្ចាញ សម្រាប់សមណៈសិស្ស បានប្រើប្រាស់សិក្សារៀនសូត្រ។
លោកស្រី បានមានប្រសាសន៍ថា ដោយមានចិត្តអាណិតស្រឡាញ់ចំពោះវិស័យអប់រំដែលជាវិស័យអាទិភាពខ្ពស់សម្រាប់ធនធានមនុស្ស។ នេះគឺជាទឹកចិត្តសប្បុរសធម៌ ស្ដែងឲ្យឃើញអំពីការគិតគូរនិងក្ដីស្រឡាញ់ចំពោះជនជាតិតៃវ៉ាន់មកលើប្រជាពលរដ្ឋកម្ពុជា ជាពិសេសព្រះសង្ឃ ដែលកំពុងសិក្សារៀនសូត្រ ដោយឈរលើស្មារតីជួយគ្នា ហើយអ្វីដែលលោកស្រីចង់បានមកវិញនោះ គឺសុំឲ្យ សមណៈសិស្សទាំងអស់ ខិតខំសិក្សារៀនសូត្រ ដើម្បីក្លាយជាធនធានមនុស្សសម្រាប់បម្រើខ្លួនឯង គ្រួសារនិងសង្គមជាតិ។
ក្នុងនាមគណៈគ្រប់គ្រងសាលាពុទ្ធិកបឋមសិក្សាអញ្ចាញ ព្រះគ្រូ ជោតិរក្ខិតោ ផាត សំភុត ព្រះចៅអធិការវត្តអញ្ចាញ បានសម្តែងនូវការអរគុណយ៉ាងក្រៃលែង ចំពោះសមានចិត្តដ៏ប្រពៃរបស់លោកស្រីនាយិកា និងចងចាំដោយព្រះសង្ឃសមណសិស្សទាំងអស់ទុកក្នុងក្រអៅបេះដូង។ ទាំងនេះគឺវាបានកើតឡើងពីការចូលរួមជួយឧបត្ថម្ភផ្សេងៗរបស់លោកស្រី ប្រកបដោយទឹកចិត្តស្មោះស និងសប្បុរសធម៌ និងជាសមានចិត្ត ដ៏ល្អប្រពៃថ្លៃថ្លា ដ៏មានតម្លៃដែលពុំអាចកាត់ថ្លៃបាន ក្នុងការជួយពង្រឹងពង្រីកគុណភាពអប់រំសិក្សាដល់សមណៈសិស្សដែលកំពុង សិក្សានៅទីនេះ។ ក្រៅពីការជួយឧបត្ថម្ភសម្ភារៈ សិក្សា លោកស្រីនាយិកា លោកស្រី ក៏បានប្រគេននូវថវិកាសម្រាប់ក្រាលការ៉ូ ព្រះវិហារចំនួន ៩០០០ដុល្លាសហរដ្ឋអាមេរិក និង ១០០០ដុល្លាទៀត សម្រាប់ធ្វើការលាបថ្នាំព្រះអង្គធំក្នុងព្រះវិហារផងដែរ៕
