ខេត្តបន្ទាយមានជ័យ៖អ្នកបើកម៉ូតូនិងអ្នកជិះពីក្រោយម្នាក់ បានបាត់បង់ជីវិតភ្លាមៗនៅនឹងកន្លែង ក្រោយពីបើកបរវ៉ាជែងខ្វះការប្រុងប្រយ័ត្ន ក៏ជ្រុលទៅបុករថយន្ត កាលពីវេលាម៉ោង ១២:៤៧នាទីថ្ងៃទី១៥ ខែវិច្ឆិកា ឆ្នាំ២០២៥ នៅលើកំណាត់ផ្លូវជាតិលេខ៦ ស្ថិតក្នុងភូមិគោកទ្រាស ឃុំឈ្នួរមានជ័យ
ស្រុកព្រះនេត្រព្រះ ខេត្តបន្ទាយមានជ័យ ។
បើតាមប្រភពព័ត៌មានបានឲ្យដឹងថា មុនពេលកើតហេតុគេបានឃើញម៉ូតូ ០១គ្រឿង ម៉ាកហុងដាឌ្រីម C125ពណ៌ខ្មៅ ពាក់ផ្លាកលេខ ប/ជ1T.3285បើកបរដោយឈ្មោះ ផូ វាសនា ភេទប្រុស អាយុ ១៣ឆ្នាំ រស់នៅភូមិគោកលុន ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ និងអ្នករួមដំណើរ ០១នាក់ ឈ្នោះជុច រ៉ាឆាត់ ភេទប្រុស អាយុ ១៣ឆ្នាំ រស់នៅភូមិប្រដាក់ ឃុំជប់វារី ស្រុកព្រះនេត្រព្រះ បានបើកបរក្នុងល្បឿនលឿនខ្វះការប្រុងប្រយ័ត្ន ពេលមកដល់ចំណុចកើតហេតុ បានឡើងជែងរថយន្ដដែលមិនស្គាល់អត្តសញ្ញាណ ហើយក៏បានរ៉េចង្កូតប្ដូរគន្លងផ្លូវទៅខាងឆ្វេងដៃ ហើយបានទៅបុករថយន្តដែលនៅខាងមុខ កំពុងបើកផ្ទុយទិសគ្នាពេញទំហឹង (បណ្តាលអោយស្លាប់ភ្លាមៗ ទាំង ០២នាក់នៅកន្លែងកើតហេតុ) ។រថយន្តម៉ាកHyundai ពណ៌ស ពាក់ផ្លាកលេខ ព្រះសីហនុ 3A.4729បើកបរដោយឈ្មោះ ឌី សីហា ភេទប្រុស អាយុ ២៥ឆ្នាំ រស់នៅភូមិប៉ោយចារ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ។
សាកសពទាំង០២នាក់ ក្រោយពីសមត្ថកិច្ចជំនាញវាសវែងនិងធ្វើកោសលវិច្ឆ័យរួចប្រគល់អោយក្រុមគ្រួសារយកទៅធ្វើបុណ្យតាមប្រពៃណី។ ចំណែកម៉ូតូ និងរថយន្ត នាំយកទៅរក្សាទុកនៅអធិការដ្ឋាននគរបាលស្រុកព្រះនេត្រព្រះ ដើម្បីរងចាំដោះស្រាយគ្នាទៅតាមនីតិវិធីច្បាប់ជាក្រោយ៕
