ខេត្តបន្ទាយមានជ័យ៖ការប្រមាថលើក្នុងការបើកបរ គឺជាការប្រមាថដល់អាយុជីវិតរបស់ខ្លួនឯង ក៏ដូចជាអាយុជីវិតរបស់អ្នកដទៃផងដែរ។ លោក សុក ចាន់ថា ប្រធានមន្ទីរសាធារណការនិងដឹកជញ្ជូនខេត្តបន្ទាយមានជ័យ មានប្រសាសន៍បែបនេះក្នុងឱកាសក្រុមការងារចម្រុះកម្ពុជា ព្រមទាំងមន្ត្រីប៉ូលិសចរាចរណ៍នៃស្នងការដ្ឋាននគរបាលខេត្ត មន្ត្រីមន្ទីរសាធារណការនិងដឹកជញ្ជូនខេត្ត និងក្រុមយុវជនស្ម័គ្រចិត្តកាកបាទក្រហម បានសហការគ្នាចុះធ្វើការអប់រំផ្សព្វផ្សាយចុះចែកខិត្តប័ណ្ណ បិទស្ទីកគ័រ និងបិទចំណាំងប្លាតដល់បងប្អូនប្រជាពលរដ្ឋធ្វើដំណើរតាមយានយន្តទោចក្រយានយន្ត កន្ដ្រៃត្រង់រង្វង់មូលក្នុងក្រុងសេរីសោភ័ណ នាព្រឹកថ្ងៃទី១៣ ខែវិច្ឆិកា ឆ្នាំ២០២៥ ។
គ្រោះថ្នាក់ចរាចរណ៍បាននិងកំពុងក្លាយទៅជា បញ្ហាដ៏ធំចំពោះសុខភាពសាធារណៈ និងការអភិវឌ្ឍសេដ្ឋកិច្ចជាតិ លោកស្រី ប៉ាង ច្រិប ជាអនុប្រធានមន្ទីរសាធារណការនិងដឹកជញ្ជូនខេត្តបានឲ្យដឹងថា ការដែលក្រុមការងារចម្រុះបានសហការគ្នា ចុះធ្វើការអប់រំផ្សព្វផ្សាយជូនដល់បងប្អូនប្រជាពលរដ្ឋដែលកំពុងធ្វើដំណើរ ចង់ឲ្យបងប្អូនយល់ដឹង និងចូលរួមគោរពច្បាប់ចរាចរណ៍ផ្លូវគោក ដែលជាកត្តាចម្បងត្រូវបើកបរដោយប្រុងប្រយ័ត្នគ្រប់វិនាទី និងការអត់ធ្មត់ចេះ អធ្យាស្រ័យគ្នាទៅវិញទៅមក ហើយបងប្អូនចូរចាំច្បាស់ថា ការប្រមាថលើការបើកបរ អាចបង្ករគ្រោះថ្នាក់ដល់ខ្លួនឯងនិងអ្នកដទៃ ជាងនេះទៅទៀតនឹងមានទោសទណ្ឌថែមទៀតផងដែរ។
គួរបញ្ជាក់ផងដែរថា ក្នុងរយៈពេលមួយព្រឹកតែក្រុមការងារចម្រុះបានធ្វើការអប់រំផ្សព្វផ្សាយគេសង្កេតឃើញថាមានបងប្អូនប្រជាពលរដ្ឋធ្វើដំណើរដោយទោចក្រយានយន្តទើបពុំបានពាក់មួកសុវត្ថិភាពជាច្រើនប្រមាណជាង ៦០ភាគរយ ។ដូចនេះឃើញថាអ្នកបើកម៉ូតូ ត្រូវបានការពារតិចតួចជាអ្នកបើកបររថយន្តនិងអាចនិយាយម្យ៉ាងទៀតបានថា អ្នកបើកបរម៉ូតូ រងគ្រោះជាងអ្នកបើកបររថយន្តនៅពេលប៉ះទង្គិចម្ដងៗ ហើយមូលហេតុនិងកត្តាសំខាន់សំខាន់នៃគ្រោះថ្នាក់ចរាចរណ៍គឺមាន៤។ ទី១ បណ្ដាលមកពីកំណើនយានយន្ត ទី២កត្តាមនុស្ស ទី៣ កត្តាយានយន្តនិង ទី៤ កត្តាផ្លូវថ្នល់៕
