រាជធានីភ្នំពេញ៖ ឯកឧត្តម ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីបិទវគ្គបណ្ដុះបណ្ដាលស្ដីពី “នីតិវិធី និងគោលការណ៍នៃការចុះត្រួតពិនិត្យគុណភាពហេដ្ឋារចនាសម្ព័ន្ធផ្លូវជនបទ” ជូនដល់មន្ត្រីបច្ចេកទេសក្រសួងអភិវឌ្ឍន៍ជនបទ។ពិធីនេះបានធ្វើឡើងនារសៀលថ្ងៃទី៣ ខែវិច្ឆិកា ឆ្នាំ២០២៥ នៅទីស្ដីការក្រសួង ដោយមានការអញ្ជើញចូលរួមជាកិត្តិយសពីសំណាក់ ឯកឧត្តមជាថ្នាក់ដឹកនាំក្រសួង រួមទាំងមន្រ្ដីបច្ចេកទេសសិក្ខាកាមផងដែរ ។
បន្ទាប់ពីបានស្ដាប់របាយការណ៍វគ្គបណ្ដុះបណ្ដាលរួចមក ឯកឧត្ដម ឆាយ ឫទ្ធិសែន បានថ្លែងអំណរគុណចំពោះឯកឧត្តមគ្រូឧទ្ទេស និងគណៈគ្រប់គ្រងវគ្គ ដែលបានខិតខំយកអស់ពីសមត្ថភាព រៀបចំវគ្គនេះឡើង និងបានចែករំលែកចំណេះដឹងជូនដល់សិក្ខាកាមទាំងអស់ ព្រមទាំងបានសម្ដែងនូវមនោសញ្ចេតនាអបអរសាទរចំពោះ សិក្ខាកាមដែលបានបញ្ចប់វគ្គប្រកបដោយជោគជ័យនាពេលនេះ។ ក្នុងឱកាសនោះ ឯកឧត្ដមរដ្ឋមន្ត្រី បានគូសបញ្ជាក់ថា ផ្អែកតាមយុទ្ធសាស្ដ្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភាក្រោមការដឹកនាំបន្តវេនប្រកបដោយគតិបណ្ឌិត របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្រសួងអភិវឌ្ឍន៍ជនបទ បានចាត់ទុកការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រកបដោយភាពធន់ ជាយុទ្ធសាស្ដ្រទី១ ដើម្បីតភ្ជាប់តំបន់ជនបទ និងទីក្រុង និងជាសរសៃឈាមសេដ្ឋកិច្ចដ៏សំខាន់ សម្រាប់ចូលរួមសម្រេចឱ្យបានជោគជ័យនូវចក្ខុវិស័យ“កម្ពុជា ជាប្រទេស មានប្រាក់ចំណូលខ្ពស់ឆ្នាំ២០៥០”។ ដូច្នេះ ក្រសួងអភិវឌ្ឍន៍ជនបទបានបង្កើត គ.ត.វ. ដើម្បីដឹកនាំចុះត្រួតពិនិត្យ និងវាយតម្លៃគុណភាពការងារសាងសង់ ស្តារឡើងវិញ កែលម្អ ជួសជុល ថែទាំ និងលើកកម្រិតផ្លូវជនបទ និងសំណង់សិល្បការ្យ ក្នុងគោលដៅពង្រឹង គុណភាពនៃការសាងសង់ហេដ្ឋារចនាសម្ព័ន្ធផ្លូវជនបទ ដើម្បីធានាបាននូវគុណភាពនៃសំណង់ស្របតាមបទដ្ឋានបច្ចេកទេសដែលបានកំណត់ ជាមួយនឹងការអប់រំផ្សព្វផ្សាយឱ្យប្រជាពលរដ្ឋចូលរួមថែរក្សាសមិទ្ធផលដែលបានស្ថាបនារួច ឱ្យបានគង់វង្ស៕
