ខេត្តបន្ទាយមានជ័យ៖ ឡានរទេះសាឡី១គ្រឿងស្ថិតនៅវត្តទកិ្ខណគង្គារាម អញ្ចាញ ក្នុងឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ដែលជាសទ្ធាជ្រះថ្លារបស់ ឯកឧត្ដម នូ សុីថា និងលោកជំទាវ បានផ្តល់ជាថវិកា ដើម្បីស្ថាបនារទេះសាឡីថ្មី សម្រាប់បំរើការជាសាធារណៈក្នុងវត្តអញ្ចាញនេះ ដោយចំណាយថវិកាអស់ ១៥០០០$ សហរដ្ឋអាមេរិក។
ព្រះតេជគុណ ជាត សំភុត ព្រះចៅអធិការវត្តអញ្ចាញ បានមានសង្ឃដីកាថា វត្តអញ្ចាញគឺជាវត្តមួយ ក្នុងចំណោមវត្តទាំង ៥៥ នៅទូទាំងស្រុកមង្គលបូរី ហើយក៍បានកសាង និងកំពុងកសាងនូវសមិទ្ធផលជាច្រើនក្នុងវត្ត ជាក់ស្ដែងកំពុងកសាងជួសជុលព្រះវិហារឡេីងវិញ។ ក្រោយពីជាងបានធ្វើឡានរទេះសាឡីរួចរាល់ហើយនោះក៏បាននាំយកមកកំណត់ថ្ងៃសម្ពោធឆ្លងដាក់ឲ្យ ប្រេីប្រាស់ នាថ្ងៃទី០៥ ខែតុលា ឆ្នាំ២០២៥ ជាប្រយោជន៍សាធារណៈជន ដែលជួបនូវមរណទុក្ខទូទៅមិនប្រកាន់វណ្ណៈ និងសាសនាអ្វីនោះឡើយ គឺជាសម្បត្តិរួម។
លោក អ៊ូ សុភាព អភិបាលរង ស្រុកមង្គលបូរី និង លោក បៀវ ថាន ប្រធានមន្ទីរធម្មការ និងសាសនាខេត្ត បានមានប្រសាសន៍ ថ្លែងអំណរគុណយ៉ាងជ្រាលជ្រៅបំផុត ចំពោះឯកឧត្ដម នូ សុីថា និងលោកជំទាវ ដែលបានចំណាយទ្រព្យធនផ្ទាល់ខ្លួនជាច្រើន បង្កើតបានជាសមិទ្ធផលសម្រាប់បំរើសេចក្តីត្រូវការ របស់បងប្អូនប្រជាពលរដ្ឋទូទៅ។
លោក បៀវ ថាន បន្តថា ក្រោយថ្ងៃរំដោះ ៧ មករា ឆ្នាំ១៩៧៩ ក្រោមការដឹកនាំរបស់រណសិរ្សសាមគ្គីសង្រ្គោះជាតិកម្ពុជា បានធ្វើឲ្យវិស័យព្រះពុទ្ធសាសនា ក៍ដូចជាសាសនានាក្នុងប្រទេសកម្ពុជា ត្រូវបានកសាងឡើងវិញ ដោយជំរុញ និងលើកកម្ពស់ ព្រមទាំងមានការចូលរួមអភិវឌ្ឍន៍ឲ្យរីកចម្រើនយ៉ាងឆាប់រហ័ស ដោយសារមានរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងបន្តមកដល់ការដឹកនាំប្រកបដោយថាមពល ស្វាហាប់ ឈ្លាសវៃ និងមានចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដល់នូវសិទ្ធិសេរីភាពពេញលេញខាងជំនឿសាសនា ធ្វើឲ្យប្រជាពលរដ្ឋទូទាំងប្រទេស មានការត្រេកអរ គាំទ្រ សាទរ និងសប្បាយរីករាយប្រកបដោយជំនឿមុតមាំមកលេីរាជរដ្ឋាភិបាល និងបានរួបរួមគ្នាកសាងឡើងវិញ ដែលនាំឲ្យប្រជាពុទ្ធបរិស័ទទាំងក្នុង និងក្រៅប្រទេស ចូលរួមបរិច្ចាគដោយចិត្តសទ្ធាជ្រះថ្លា ចូលរួមចំណែកជាមួយរាជរដ្ឋាភិបាលក្នុងការកសាងស្ថាបនាទីអារាម ទីសក្ការៈបូជាផ្សេងៗ ឲ្យមានការរីកលូតលាស់ឥតឈប់ឈរពីមួយថ្ងៃទៅមួយថ្ងៃ។
ជាចុងក្រោយ លោក បៀវ ថាន បានធ្វើការផ្តាំផ្ញើ ដល់គណសង្ឃវត្ត អាចារ្យគណៈកម្មការ គ្រប់វត្តទាំងអស់ ចូរធ្វើការអនុវត្តឲ្យបានខ្ជាប់ខ្ជួន និងបន្តថែរក្សា ឲ្យបាននូវ អភិក្រម ស៣ របស់ក្រសួងធម្មការ នឹងសាសនា សម្រាប់វត្តអារាម គឺវត្តស្អាត វត្តស្ងប់ នឹងវត្តស្វាង ដេីម្បីឲ្យសក្ដិសមជាប្រទេសមានសក្ដានុពលទេសចរណ៍ និងសាសនា៕
