បន្ទាយមានជ័យ៖ដោយអនុវត្តតាមអនុសាសន៍ដ៏ខ្ពង់ខ្ពស់របស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិនៅថ្ងៃទី១២ ខែកញ្ញា ឆ្នាំ២០២៥ លោកឧត្ដមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានចាត់តាំងលោកឧត្ដមសេនីយ៍ត្រី វង្ស វិត ស្នងការរងផែនការងារធនធានមនុស្សអមដំណើរដោយលោកវរសេនីយ៍ឯក ឱ នរិន្ទ នាយការិយាល័យបុគ្គលិក និងលោកវរសេនីយ៍ទោ ឌី ទាវ អធិការនៃអធិការដ្ឋាននគរបាលស្រុកមង្គលបូរីនិងមន្ត្រីនគរបាលជាច្រើនរូបចូលរួមគោរពវិញ្ញាណក្ខន្ធនិងប្រគល់ថវិកាចំនួន៨,១៧០,០០០រៀល(ប្រាំបីលានមួយសែនប្រាំពីរមុឺនរៀលគត់)ក្នុងនោះថវិការបស់សមាគមមិត្តនគរបាលជាតិកម្ពុជាចំនួន៦លានរៀលនិងថវិការបស់ស្នងការដ្ឋាននគរបាលខេត្តបន្ទាយមានជ័យចំនួន២,១៧០,០០០រៀលយកមកប្រគល់ជូនដល់គ្រួសារសពលោកវរសេនីយ៍ត្រី មួន អ៊ាយ នាយប៉ុស្តិ៍នគរបាលរដ្ឋបាលស្រះរាំង នៃអធិការដ្ឋាននគរបាលស្រុកមង្គលបូរី ដែលបានទទួលមរណៈភាពនៅថ្ងៃទី១១ ខែកញ្ញា ឆ្នាំ២០២៥ សពបានតម្កល់ធ្វើបុណ្យនៅគេហដ្ឋាននៃសពស្ថិតនៅភូមិថ្នាល់ដាច់ ឃុំភ្នំដី ស្រុកភ្នំស្រុក ខេត្តបន្ទាយមានជ័យ។
ក្នុងឱកាសដ៏ក្រៀមក្រំនេះលោកឧត្ដមសេនីយ៍ត្រី វង្ស វិត បានពាំនាំការចូលរួមមរណទុក្ខនិងចូលរួមសោកស្ដាយយ៉ាងក្រៃលែងជាមួយក្រុមគ្រួសារសពពីសំណាក់លោកឧត្ដមសេនីយ៍ទោ ស្នងការ ចំពោះការបាត់បង់ប្តី ឪពុក ជាទីគោរពស្រលាញ់ដ៏ជ្រាលជ្រៅ និងធ្លាប់ផ្ដល់នូវព្រហ្មវិហារធម៌ចំពោះក្រុមគ្រួសារនាគ្រាកន្លងមក។
ជាចុងក្រោយលោកសូមឧទ្ទិសបួងសួង ដល់គុណបុណ្យព្រះរតនត្រ័យ វត្ថុសាកសិទ្ធក្នុងលោកសូមជួយដឹកនាំវិញ្ញាណក្ខន្ធរបស់លោកវរសេនីយ៍ត្រី មួន អ៊ាយ សូមបានទៅកាន់សុគតិភព កុំបីឃ្លៀងឃ្លាតឡេីយ៕
