(បន្ទាយមានជ័យ) លោក យឹម សំណាង អភិបាលរង ខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញជាអធិបតីភាពបើកសិក្ខាសាលាស្ដីពីយន្តការ និងលំហូរនៃការកំណត់អត្តសញ្ញាណរាយការណ៍ បញ្ជូន និងគ្រប់គ្រងករណីកុមារនៅថ្នាក់ក្រោមជាតិ។ សិក្ខាសាលានេះធ្វើឡើងនៅព្រឹកថ្ងៃទី២៧ ខែសីហា ឆ្នាំ២០២៦ នៅសាលប្រជុំការិយាល័យមជ្ឈមណ្ឌលសំចតប៉ោយប៉ែត និងស្តារនីតិសម្បទា (PTRC) អគារថ្មី ក្នុងក្រុងប៉ោយប៉ែត ដោយមានការចូលរួមពីលោក លោកស្រី អភិបាល.អភិបាលរងក្រុង នគរបាលក្រុង ប្រធាន.អនុប្រធានមន្ទីរ ការិយាល័យពាក់ព័ន្ធ អាជ្ញាធរមូលដ្ឋានសង្កាត់ និងអង្គការដៃគូអភិវឌ្ឍន៍ផងដែរ។បន្ទាប់ពីបានស្ដាប់នៅរបាយការណ៍របស់លោក អនុប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបន្ទាយមានជ័យ និងតាមបណ្ដាអង្គការដៃគូរួចមកលោក យឹម សំណាង អភិបាលរង ខេត្តបានកោតសរសើរចំពោះអង្គការតំណក់ទឹក និងគ្រប់ស្ថាប័ន និងអង្គការដៃគូ ដែលបាន សហការរៀបចំវគ្គបណ្តុះបណ្តាលនេះឡើង ក្នុងគោលបំណងពង្រឹងសមត្ថភាពមន្ត្រី និងអ្នកពាក់ព័ន្ធនៅថ្នាក់មូលដ្ឋាន ដើម្បីចូលរួមការពារ និងលើកកម្ពស់សុខុមាលភាពកុមារឱ្យកាន់តែមានប្រសិទ្ធភាព។ ជាក់ស្តែង កុមារគឺជាធនធានមនុស្សដ៏មានតម្លៃ និងជាកម្លាំងស្នូលសម្រាប់ការអភិវឌ្ឍប្រទេសជាតិនាពេលអនាគត។
លោក អភិបាលរង ខេត្តបានបញ្ជាក់ថា៖ វគ្គបណ្តុះបណ្តាលនេះ មានគោលបំណងសំខាន់ៗដូចជា៖
១,បង្កើនចំណេះដឹងរបស់សិក្ខាកាមអំពីនិយមន័យ ប្រភេទ និងទម្រង់នៃការកេងប្រវ័ញ្ច និងការជួញដូរកុមារ។
២,ពង្រឹងសមត្ថភាពក្នុងការកំណត់អត្តសញ្ញាណកុមាររងគ្រោះ និងកុមារងាយរងគ្រោះ តាមរយៈការសម្គាល់សញ្ញា និងកត្តាហានិភ័យផ្សេងៗ។
៣,ពង្រឹងការយល់ដឹងអំពីយន្តការរាយការណ៍ និងការបញ្ជូនករណីទៅកាន់សេវាពាក់ព័ន្ធ។
៤,លើកកម្ពស់ការអនុវត្តគោលការណ៍ឆ្លើយតបដែលផ្តោតលើកុមារ និងគោរពផលប្រយោជន៍ល្អបំផុតរបស់កុមារ។
៥,ពង្រឹងកិច្ចសហការ និងការសម្របសម្រួលរវាងអាជ្ញាធរមូលដ្ឋាន មន្ទីរ–អង្គភាពពាក់ព័ន្ធ និងអង្គការដៃគូ ដើម្បី ធានាការការពារ និងការឆ្លើយតបចំពោះកុមារប្រកបដោយប្រសិទ្ធភាព។
ទន្ទឹមជាមួយគ្នានោះលោក យឹម សំណាង សង្ឃឹមនិងជឿជាក់ថា៖ តាមរយៈសិក្ខាកាមទាំងអស់នឹងទទួលបានចំណេះដឹង ជំនាញ និងបទពិសោធន៍ថ្មីៗ ដែលអាចយកទៅអនុវត្តជាក់ស្តែងក្នុងការងារប្រចាំថ្ងៃ ដើម្បីជួយកំណត់អត្តសញ្ញាណ វាយការណ៍ និងបញ្ជូនករណីកុមារ បានកាន់តែមានប្រសិទ្ធភាព និងទាន់ពេលវេលា៕
