បន្ទាយមានជ័យ ៖ អភិបាលខេត្តបន្ទាយមានជ័យ បាន ដាក់ចេញផែនការយុទ្ធសាស្ត្របន្ថែមទៀតក្នុងការបន្តបោសសម្អាតបទល្មើសឆបោកតាមប្រព័ន្ធបច្ចេកវិទ្យា (Oline Scams)នៅក្នុងភូមិសាស្ត្រខេត្តបន្ទាយមានជ័យ ជម្រុញឱ្យអាជ្ញាធរមានសមត្ថកិច្ចរួមគ្នាចុះស្រាវជ្រាវ និងធ្វើរដ្ឋបាលឱ្យបានជាប់ជាប្រចាំ ចំពោះទីតាំងដែលមានការសង្ស័យការប្រព្រឹត្តនូវបទល្មើសឆបោកតាមប្រព័ន្ធបច្ចេកវិទ្យា (Oline Scams) តាមគ្រប់រូបភាព ដើម្បីធ្វើការបង្ក្រាបឱ្យបានទាន់ពេលវេលា។
ឯកឧត្ដម អ៊ុំ រាត្រី បានដាក់ផែនការបន្ថែមទៀត ក្នុងពេលដឹកនាំកិច្ចប្រជុំពិភាក្សា នឹងបន្តការងារអនុវត្តវិធានការបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Oline Scams) នៅក្នុងភូមិសាស្ត្រខេត្តបន្ទាយមានជ័យ ជាមួយសមត្ថកិច្ចពាក់ព័ន្ធ និងអាជ្ញាធក្រុង–ស្រុកទាំង៩ទូទាំង ខេត្តបន្ទាយមានជ័យ នាថ្ងៃទី០៣ ខែសីហា ឆ្នាំ២០២៦ នៅសាលាខេត្តបន្ទាយមានជ័យ។
អភិបាលខេត្ត បន្តថា បើទោះបីជាកន្លងមកកងកម្លាំងសមត្ថកិច្ចយើងបានធ្វើការបង្ក្រាបបានជាបន្តបន្ទាប់ និងឃាត់ខ្លួនឧក្រិដ្ឋជន នៃបទល្មើសបញ្ជូនទៅតុលាការ នឹងបញ្ជូនទៅប្រទេសកំណើតរបស់គេវិញយ៉ាងណាក៏ដោយ ក៏យើងមិនត្រូវបន្ធូរដៃឡើយ ត្រូវបន្តរួមគ្នាការបោសសម្អាតការឆបោកតាមប្រព័ន្ធបច្ចេកវិទ្យា (Online Scams) នេះឱ្យអស់នៅក្នុងខេត្តបន្ទាយមានជ័យ។
ឯកឧត្ដម អ៊ុំ រាត្រី បញ្ជាក់ថា បទល្មើសឆបោកតាមប្រព័ន្ធបច្ចេកវិទ្យា (Online Scams) បាននិងកំពុងក្លាយជាបញ្ហាប្រឈមធំមួយ ដែលតម្រូវឱ្យមានកិច្ចសហការ និងមានវិធានការដោះស្រាយ មានការចូលរួមពីគ្រប់ភាគីពាក់ព័ន្ធ៕
