បន្ទាយមានជ័យ ៖ ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ អញ្ជើញដឹកនាំកិច្ចប្រជុំពិភាក្សាគម្រោងចំណូល–ចំណាយថវិការរដ្ឋបាលខេត្តបន្ទាយមានជ័យឆ្នាំ២០២៧ និងសៀវភៅព្រាងផែនការយុទ្ធសាស្ត្រថវិកាខេត្ត ឆ្នាំ២០២៧–២០២៩។ កិច្ចប្រជុំនេះ ធ្វើឡើងនៅសាលប្រជុំ ខ សាលាខេត្តបន្ទាយមានជ័យ នាព្រឹកថ្ងៃទី០៣ ខែសីហា ឆ្នាំ ២០២៦ដោយមានការចូលរួមពីសំណាក់អភិបាលរង ខេត្ត មន្ទីរ អង្គភាពពាក់ព័ន្ធជុំវិញខេត្តផងដែរ។
ឯកឧត្ដម អភិបាលខេត្ត ក៏បានថ្លែងអំណរគុណគ្រប់អ្នកពាក់ព័ន្ធ ដែលបានរៀបចំគម្រោងថវិកាមុនដាក់ចេញអនុម័តសម្រេច បើទោះបីជាយើងទទួលរងពីការឈ្លានពានពីប្រទេសថៃ មកលើដែនអធិបតេយ្យភាពរបស់កម្ពុជាយើងតាមបន្ទាត់ព្រំដែនយ៉ាងណាក៏ដោយ ក៏កិច្ចការស្នូល ក្នុងការអភិវឌ្ឍខេត្ត ក្រុង –ស្រុក ឃុំ –សង្កាត់ ក៏បានយើងនៅតែបន្ត ។ ហើយយើងក៏បានរៀបចំផែនការយុទ្ធសាស្រ្តជាបន្តបន្ទាប់ ដើម្បីអភិវឌ្ឍន៍ មូដ្ឋានរបស់យើង។
ឯកឧត្ដម បញ្ជាក់ថា ពាក់ព័ន្ធទៅនឹងគម្រោងថវិកាសម្រាប់ឆ្នាំ២០២៧ខាងមុខ រដ្ឋបាលខេត្ត នឹងរៀបចំនូវគម្រោងកែលំអសោភ័ណភាពក្រុងសិរីសោភ័ណ ដោយឱ្យមន្ទីរ អង្គភាព ពាក់ព័ន្ធធ្វើការសិក្សាលើកិច្ចការងារអនុវត្តគម្រោង ក្នុងការកែលម្អសោភ័ណភាពក្រុង ដោយមានការរៀបចំដើមឈើផ្លូរដើរថ្មើរជើង ចំណតរថយន្តទៅតាមគន្លងផ្លូវនីមួយៗ។ ឯកឧត្ដម បន្តថា ឆន្ទៈដ៏មោះមុតរបស់ខេត្ត និងមានការប្រែប្រួលទេ នឹងអនុវត្តគម្រោងនេះឱ្យបានឆាប់នៅឆ្នាំ២០២៧ បើការអនុវត្តគម្រោង មិនអាចបញ្ចប់ឆ្នាំ២០២៧ និងលើកគម្រោងបន្តសម្រាប់ឆ្នាំ២០២៨ ដើម្បីធ្វើយ៉ាងណាឱ្យក្រុងសិរីសោភ័ណមានសោភ័ណភាព បៃតង និងមានភាពទាក់ទាញ៕
