បន្ទាយមានជ័យ ៖ ឯកឧត្ដម អ៊ុំ រាត្រី អភិបាល ខេត្តបន្ទាយមានជ័យ បំផុសចលនាឱ្យយុវជន ដែលជាកម្លាំងចលករយ៉ាងសំខាន់ និងមានឥទ្ធិពលបំផុតក្នុងការការពារ និងអភិរក្សព្រៃឈើ ដើម្បីចូលរួម និងបង្កើតយុទ្ធនាការផ្សព្វផ្សាយ បង្កើនការយល់ដឹងពីតម្លៃនៃព្រៃឈើ តាមរយៈការចែករំលែកព័ត៌មាន បង្កើតមាតិកាអប់រំលើបណ្តាញសង្គមផ្សេងៗ។
ការបំផុសចលនានេះនៅក្នុងឱកាស អញ្ជើញជាអធិបតីភាពក្នុងពិធីអបអរសាទ បុណ្យរុក្ខទិវា ៩ កក្កដា ២០២៦ ព្រមទាំងបានដាំកូនឈើលម្អសរុបចំនួន៣០០ដើម (ដើមក្ងោក) តាមដងផ្លូវជាតិលេខ៥ និងបាន ចែកជូនកូនឈើសម្រាប់តាមបណ្តាមន្ទីរ–អង្គភាព ក្រុង–ស្រុក និងបងប្អូនប្រជាពលរដ្ឋចំនួន១.០០០ដើម នាព្រឹកថ្ងៃទី៣០ ខែកក្កដា ឆ្នាំ ២០២៦ ។
ឯកឧត្ដម អភិបាលខេត្តក៏បានបញ្ជាក់ថា ការបាត់បង់ព្រៃឈើ គឺពិតជាបាននាំមកនូវគ្រោះមហន្តរាយយ៉ាងធំធេងណាស់ដល់ភពផែនដីយើង ដូចជា៖ ធ្វើឱ្យមានបំរែបំរួលអាកាសធាតុ ការឡើងកំដៅនៃភពផែនដី គ្រោះរាំងស្ងួត ភ្លើងឆេះព្រៃ បាត់បង់ជីវសាស្ត្រចំរុះ បាត់បង់សត្វព្រៃគ្រប់ប្រភេទ ខ្យល់ព្យុះ (ខ្យល់កន្ត្រាក់) និងគ្រោះទឹកជំនន់ដែលបង្កឱ្យមានការលិចលង់ផ្ទះសំបែង ដីស្រែ–ចំការ ផលដំណាំ ផ្សេងៗ បាត់បង់ទ្រព្យសម្បត្តិ និងអាយុជីវិតមនុស្ស សត្វ ថែមទៀតផង។ឯកឧត្ដម បន្តថា ផ្ទុយមកវិញ ប្រសិនបើមាន ឬសម្បូរព្រៃឈើ យើងពិតជាអាចចៀសផុតនូវរាល់គ្រោះមហន្តរាយផ្សេងៗ ដែលបានកើតឡើងខាងលើផងដែរ។
ដើម្បីជំនួសមកវិញនូវព្រៃឈើដែលបានបាត់បង់ ឯកឧត្ដម អភិបាល ខេត្ត បានធ្វើការអំពាវនាវសារជាថ្មីបន្ថែមទៀត ដល់បងប្អូន និងក្មួយៗទាំងអស់ ត្រូវនាំគ្នាចូលរួមដាំឈើឡើងវិញ នៅលើដីចំការ តាមព្រំដី ឬភ្លឺស្រែរបស់ខ្លួន ជាពិសេស នៅលើដីចំការដែលហឹលខ្សោះជីវជាតិមិនអាចធ្វើដំណាំកសិកម្មបាន ហើយគួរដាំជាប្រភេទកូនឈើប្រណីតក្នុងស្រុក និងកូនឈើដែលមានការលូតលាស់លឿន មិនរើសដី ដើម្បីធ្វើឱ្យបរិស្ថានមានភាពប្រសើរឡើងវិញ កាត់បន្ថយនូវគ្រោះធម្មជាតិគ្រប់បែបយ៉ាង និងជួយលើកស្ទួយសេដ្ឋកិច្ចគ្រួសារ សហគមន៍ ក៏ដូចជាសង្គមជាតិយើងទាំងមូល។ មួយវិញទៀតគ្រប់វត្តអារាម មន្ទីរ–អង្គភាពនានាជុំវិញខេត្ត កងកំលាំងប្រដាប់អាវុធគ្រប់អង្គភាព អាជ្ញាធរដែនដីគ្រប់លំដាប់ថ្នាក់ និងបងប្អូនប្រជាពលរដ្ឋ ចូលរួមក្នុងស្មារតីបុរេសកម្ម និងអន្តរសកម្ម លើការងារដាំដើមឈើឡើងវិញឱ្យបានផុលផុសនៅគ្រប់ទីកន្លែងដែលអាចដាំបាន ដូចជា នៅតាមវត្តអារាម ទីសាធារណៈនានា ក្នុងបរិវេណគ្រប់មន្ទីរ–អង្គភាព មន្ទីរពេទ្យ សាលារៀន ផ្លូវសាធារណៈ ឬក៏ដាំជាចំការក្តីក្នុងគោលបំណងធ្វើអាជីវកម្មជាដើម។ល។
បើតាមការបញ្ជាក់ពីលោកស្រី អន ស៊ីថា ប្រធានស្ដីទី មន្ទីរកសិកម្ម រុក្ខាប្រមាញ់ និង នេសាទខេត្ត បានបញ្ជាក់ឱ្យដឹងថា ការប្រារព្វពិធីបុណ្យរុក្ខទិវាថ្នាក់ខេត្ត ស្ថិតនៅក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ មានដាំដុះប្រភេទឈើលម្អ ( ក្ងោក) ចំនួន ១០០០ដើម នៅអមសងខាងផ្លូវជាតិលេខ៥ ចាប់ពីចំណុចស្ថានីយ៍ប្រេងឥន្ធនៈតូតាល់ ( ផ្លូវវាងក្រុង ) មកដល់ស្ពានសែសិន និងបានត្រៀមកូនឈើសម្រាប់ចែកជូនបងប្អូនសរុបចំនួន ១ ០០០ដើម មានប្រភេទ បេង,ធ្នង់, ក្រញូង, ឈើទាល, គគីរ, ផ្ដៀក, ត្របែកព្រៃជាដើម។ លោកស្រីបន្តថា នៅក្នុងឆ្នាំ២០២៦នេះ គិតពីដើមឆ្នាំ រហូតមកដល់ខែកក្កដា ឆ្នាំ២០២៦ខណ្ឌរដ្ឋបាលព្រៃឈើបន្ទាយមានជ័យ បណ្តុះកូនឈើបានចំនួន ២០ ២០០ដើម រួមមានធ្នង់ ៥ ៨០០ដើម, ក្រញូង ៣ ៧០០ដើម, ឈើទាល ៥ ០០០ដើម, គគីរ ១ ៥០០ដើម, ត្របែកព្រៃ ១ ៥០០ដើម និងចារ ២ ៧០០ដើម បានប្រគេន និងចែកជូនកូនឈើដល់ព្រះសង្ឃ អង្គភាពនានា និងប្រជាពលរដ្ឋ ចំនួន ២០ ១៣២ដើម និងសហការជាមួយគណៈកម្មការសហគមន៍ព្រៃឈើ ដាំកូនឈើបានចំនួន ១២ ៨០០ដើម ( ត្របែកព្រៃ ក្ងោក និង ប្រេងខ្យល់ )៕
