បន្ទាយមានជ័យ ៖ ថ្លែងក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលស្រុកព្រះនេត្រព្រះ នារសៀលថ្ងៃទី៣០ ខែកក្កដា ឆ្នាំ២០២៦ ឯកឧត្តម អ៊ុំ រាត្រី អភិបាលនៃគណៈអភិបាលខេត្ត បានណែនាំដល់រដ្ឋបាលក្រុងស្រុក ឃុំសង្កាត់ ក្នុងការផ្តល់សេវារដ្ឋបាលជូនប្រជាពលរដ្ឋ តាមនីតិវិធីសាមញ្ញប្រកបដោយមនសិការវិជ្ជាជីវៈ តម្លាភាព គណនេយ្យភាព និងភាពអាចជឿទុកចិត្តបាន។
ឯកឧត្ដម អភិបាលខេត្ត បញ្ជាក់ថា កន្លងមកការផ្តល់សេវាជូនប្រជាពលរដ្ឋរបស់រដ្ឋបាលខេត្ត ក្រុង–ស្រុក ឃុំ–សង្កាត់ គឺមានលក្ខណៈកាន់តែមានគុណភាព ភាពរហ័សរហួនជាងមុន និងទទួលបាននូវជំនឿទុកចិត្តពីបងប្អូនប្រជាពលរដ្ឋ ដោយហេតុថា រចនាសម្ព័ន្ធផ្តល់សេវារដ្ឋបាល បានទទួលការឧបត្ថម្ភគាំទ្របន្ថែមពីសំណាក់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ដែលបានជំរុញលើកទឹកចិត្តក្នុងការផ្តល់សេវាតម្រូវការជូនប្រជាពលរដ្ឋនៅគ្រប់មូលដ្ឋានក្រុង-ស្រុកទាំង៩ ដោយបានផ្តល់ការគាំទ្រលើលទ្ធភាពរបស់រដ្ឋបាលឃុំ–សង្កាត់ តាមរយៈបន្ថែមបុគ្គលិកស្ម័គ្រចិត្តចំនួន១នាក់ក្នុង១ឃុំ–សង្កាត់ និងរដ្ឋបាលក្រុង–ស្រុកចំនួន២នាក់ក្នុង១ក្រុង–ស្រុក ដើម្បីពន្លឿនក្នុងការផ្តល់សេវាអត្រានុកូលដ្ឋាន និងនៅតាមប៉ុស្តិ៍នគរបាលរដ្ឋបាលឃុំ–សង្កាត់ ដែលមានចម្ងាយឆ្ងាយ មានការឧបត្ថម្ភការធ្វើដំណើរ ក្នុងគោលបំណងធ្វើយ៉ាងណាឱ្យខេត្តបន្ទាយមានជ័យជាខេត្តដែលផ្តល់សេវាជូនប្រជាពលរដ្ឋបានល្អប្រសើរ។
សូមបញ្ជាក់ថា ៖ លោក ឈឺន រតនៈ ដែលត្រូវបានក្រសួងមហាផ្ទៃ តែងតាំងឱ្យកាន់មុខតំណែងជាអភិបាលរង នៃគណៈអភិបាលស្រុកព្រះនេត្រព្រះ យោងតាមប្រកាសលេខៈ៨១៤៦ ប្រក ចុះថ្ងៃទី១៣ កក្កដា ២០២៦ របស់ក្រសួងមហាផ្ទៃ។ ហើយការតែងតាំងមន្រ្តីរាជការ គឺជាដំណើរការជាប្រក្រតី សម្រាប់ការគ្រប់គ្រងមន្រ្តីរាជការក្នុងការបំពេញ ការងារប្រចាំថ្ងៃ ដោយអនុលោមតាមច្បាប់ ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ក៏ដូចជាក្របខ័ណ្ឌច្បាប់ និងលិខិតបទដ្ឋានគតិយុត្តិពាក់ព័ន្ធនានាជាធរមាន ក្នុងគោលបំណងដើម្បីលើកកម្ពស់ ប្រសិទ្ធភាព និងប្រសិទ្ធផល នៃការបំពេញភារកិច្ចរបស់មន្រ្តីរាជការ–បុគ្គលិក នៃរាជរដ្ឋាភិបាល និងរដ្ឋបាលនៅថ្នាក់ក្រោមជាតិ៕
