ខេត្តបន្ទាយមានជ័យ៖ជនជាតិថៃ ៦នាក់ ដែលបានចាក់ទៅលើសន្តិសុខ បណ្តាលឲ្យបាត់បង់ជីវិតមួយរំពេចនៅកន្លែង ១នាក់ និង ១នាក់ទៀតរងរបួស បង្កការភ្ញាក់ផ្អើលកាលពីវេលាម៉ោង ១១ និង ១០នាទី ថ្ងៃទី០៣ ខែធ្នូ ឆ្នាំ២០២៥ ស្ថិតនៅភូមិគីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ត្រូវបាននគរបាលក្រុងប៉ោយប៉ែតចាប់ខ្លួនបញ្ជូនទៅតុលាការ។
ពាក់ព័ន្ធករណីខាងលើនេះលោកវរសេនីយ៍ទោ រ៉ែន សុភ័ក្រ អធិការរងទទួលផែនការងារនគរបាលយុត្តិធម៌ក្រុងប៉ោយប៉ែតបានឲ្យដឹងថា ក្រោយពីទទួលបានបទបញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត និងលោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុង លោកបានដឹកនាំកម្លាំងជំនាញចុះទៅដល់ចំណុចកើតខាងលើធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យ ដែលជាជនជាតិថៃ បានចំនួន៦នាក់ បញ្ជូនទៅអធិការដ្ឋាននគរបាលក្រុង ដើម្បីសាកសួរនិងកសាងសុំណុំរឿងចាត់ការតាមនិតិវិធី ។
ជនរងគ្រោះដែលបានបាត់បង់ជីវិតមានឈ្មោះ ញ៉ែប គឹសាន ភេទប្រុស អាយុ ២៦ ឆ្នាំ មុខរបរ សន្តិសុខ និងឈ្មោះ សុខ ស៊ីណាត ភេទប្រុស អាយុ ៥៥ឆ្នាំ មុខរបរ សន្តិសុខ( របួសស្រាល)។ក្រោយពីកើតហេតុក្រុមជនបង្កជាជនជាតិថៃបានរត់គេចខ្លួន តែត្រូវកម្លាំងនគរបានចាប់បានភ្លាមៗ សរុប ១៥នាក់ ក្នុងនោះមានជនសង្ស័យ ចំនួន៦នាក់ រួចបានធ្វើការហ៊ុមព័ទ្ធ កន្លែងកើតហេតុ។
ជនសង្ស័យដែលឃាត់ខ្លួនបានរួមមានៈ
១.ឈ្មោះ ស៊ីឡៈ ម៉ុងឈុនកាហាន ភេទប្រុស អាយុ ២៤ឆ្នាំ ជនជាតិថៃ
២.ឈ្មោះ សុផាក់ឆៃ ដារ៉ាកៃ ភេទប្រុស អាយុ៤០ឆ្នាំ ជនជាតិថៃ
៣.ឈ្មោះ មេថាត់ អាការៈប្រាក់ឆាត ភេទប្រុស អាយុ២០ឆ្នាំ ជនជាតិថៃ
៤.ឈ្មោះ ថាណាក់ភុន ហេមម៉វុធ អាយុ៣១ឆ្នាំ ជនជាតិថៃ
៥.ឈ្មោះ ថុតសាឡាត សឺឡាតា អាយុ២៨ឆ្នាំ ជនជាតិថៃ
៦.ឈ្មោះ ថាណាត់ វង្សចាលើន អាយុ៣០ឆ្នាំ ជនជាតិថៃ ។នៅចំពោះមុខសមត្ថកិច្ចជនសង្ស័យទាំង ៦នាក់ បានឆ្លើយសារភាពថា ពួកខ្លួនពិតជាបាននាំគ្នារៀបគម្រោង ដើម្បីរំដោះខ្លួនចេញពីផ្ទះល្វែងមួយកន្លែងដែលមានសន្តិសុខយាមចំនួនបីនាក់ ស្ថិតនៅចំណុចខាងលើពិតប្រាកដមែន ដោយការរៀបចំគម្រោងនេះគឺខ្លួនបានពិភាក្សាគ្នា ទី១. គូសផែនទីនៅតាមចំណុចយាមរបស់សន្តិសុខ ,ទី២. រៀបចំគម្រោងវាយទៅលើសន្តិសុខឲ្យសន្លប់ ហើយនាំគ្នារត់គេចខ្លួន ដោយពួកខ្លួនពុំមានបំណងចាក់សម្លាប់សន្តិសុខនោះទេ ។ បច្ចុប្បន្នជនសង្ស័យទាំង ៦នាក់ ត្រូវបានបញ្ជូនទៅតុលាការហើយនាថ្ងៃទី៥ ខែធ្នូ ឆ្នាំ២០២៥នេះ ដើម្បីអនុវត្តតាមនិតិវិធីច្បាប់បន្ត៕
