(បន្ទាយមានជ័យ)៖ទង្វើឈ្លានពានរបស់ទាហានសៀមនូវតែបន្ត ធ្វើទុក្ខបុកម្នេញមកលើកម្ពុជាមិនចេះឈប់ឈរ ទោះបីជាមានកិច្ចព្រមព្រៀងឈប់បាញ់និងប្រគល់ទាហានកម្ពុជាចំនួន ១៨នាក់មកឱ្យកម្ពុជាវិញ ដោយមានអន្តរជាតិ ពិសេសប្រធានអាស៊ាន ជាអ្នកធ្វើសាក្សីផងដែរក្តី ប៉ុន្តែក្រោយពីកិច្ចព្រមព្រៀងគ្នាទាហានសៀម បែរជាប្រែក្រឡាស់ប្រកាសលុបកិច្ចព្រមព្រៀងនេះ ដោយឯកតោភាគីទៅវិញ ។ហើយម្យ៉ាងវិញទៀតថ្ងៃទី១២ ខែវិច្ឆិការ ឆ្នាំ២០២៥ ជាថ្ងៃដែលសៀមកំណត់ប្រគល់ទាហានកម្ពុជាទាំង ១៨នាក់នោះមកឱ្យកម្ពុជាវិញផងដែរ បែរជាមិនឃើញប្រគល់ ថែមទាំងឆ្មក់លួចបាញ់ពលរដ្ឋខ្មែរស្លូតត្រង់នៅរសៀលថ្ងៃទី១២ ខែវិច្ឆិការ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្តាលឱ្យប្រជាពលរដ្ឋខ្មែរស្លាប់ និងរងរបួស ត្រូវបានដឹកបញ្ជូនទៅមន្ទីរពេទ្យភ្លាមៗផងដែរ។
ពាក់ព័ន្ធករណីនេះបើយោងតាមអ្នកនាំពាក្យរដ្ឋបាលខេត្តបន្ទាយមានជ័យបានបញ្ជាក់ថា ក្នុងហេតុការណ៍ផ្ទុះអាវុធនេះកម្លាំងទាហានថៃ បានប្រើកាំភ្លើង RPD បាញ់ប្រហារមកលើប្រជាពលរដ្ឋកម្ពុជា ដែលកំពុងស្នាក់នៅក្នុងជម្រកកៅស៊ូតង់ ក្នុងដែនអធិបតេយ្យ នៃព្រះរាជាណាចក្រកម្ពុជា បណ្តាលឲ្យប្រជាពលរដ្ឋខ្មែរស្លាប់ ១នាក់ និងរងរបួស ៣នាក់ ។
ដោយឡែងបើយោងតាមផេកផ្លូវការក្រសួងការពារជាតិ បានប្រកាសថា យោធាថៃបានបើកការបាញ់ប្រហារមកលើប្រជាពលរដ្ឋខ្មែរ បណ្ដាលឲ្យរងរបួសជនស៊ីវិលចំនួន ៥រូប ហើយការបើកការវាយប្រហារនេះធ្វើឡើងបន្ទាប់ពីយោធាថៃ បានធ្វើសកម្មភាពបង្កហេតុជាច្រើនរាប់មិនអស់ ច្រើនថ្ងៃមកហើយ ក្នុងចេតនាញុះញុងដើម្បីនាំដល់ការប៉ះទង្គិចគ្នា។
ក្នុងនោះក្រសួងការពារជាតិ ក៏សូមធ្វើការថ្កោលទោសយ៉ាងដាច់អហង្ការចំពោះទង្វើអមនុស្សធម៌ដ៏សាហាវឃោរឃៅនេះ។ហើយនេះបង្ហាញយ៉ាងច្បាស់ ដែលភាគីថៃ បានរំលោភបំពានលើសេចក្តីថ្លែងការរួមស្ដីពីកិច្ចព្រមព្រៀងសន្តិភាពរវាងកម្ពុជានិងថៃ ដែលភាគីទាំងពីរបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ដែលចុះហត្ថលេខា ដោយនាយករដ្ឋមន្ត្រីនៃព្រះរាជាណាចក្រកម្ពុជានិងថៃ ក្រោមសាក្សីរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិកនិងឯកឧត្តម អាន់រ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានអាស៊ាន ។
ក្នុងន័យនេះ កម្ពុជាសូមអំពាវនាវឲ្យសហគមន៍អន្តរជាតិថ្កោលទោសយ៉ាងម៉ឺងម៉ាត់ ចំពោះការរំលោភបំពានសេចក្តីថ្លែងការណ៍រួម ស្ដីពីកិច្ចព្រមព្រៀងសន្តិភាពរវាងកម្ពុជានិងថៃ និងសកម្មភាពខុសច្បាប់របស់ថៃម្ដងហើយម្ដងទៀតនេះ ដោយទាមទារឲ្យថៃទទួលខុសត្រូវទាំងស្រុងចំពោះការរំលោភបំពានដ៏កំរោលនេះផងដែរ៕
