ខេត្តបន្ទាយមានជ័យ៖បញ្ហាសំរាមជាកត្តាដ៏ស្មុកស្មាញជាខ្លាំងរបស់អាជ្ញាធរ និងប្រជាពលរដ្ឋ ដោយសារប្រជាពលរដ្ឋមួយចំនួនតូចហាក់បីដូចជា មិនទាន់យល់ច្បាស់ពីបញ្ហាអនាម័យ បរិស្ថាន បោះសំរាមចោលពាសវាលពាក់កាលតាមដីទំនេ និងតាមជញ្ជើមផ្លូវសាធារណៈក្នុងទីប្រជុំជនក្រុង ខ្លះមិនវិចខ្ជប់ឲ្យបានត្រឹមត្រូវ បោះមិនចូលក្នុងធុងនៅពេលភ្លៀងធ្លាក់ម្តងៗសំរាមហូរដោយតាមទឹក ចូលក្នុងប្រព័ន្ធលូ បង្កឲ្យស្ទះជន់លិចជាដើម ។ជាក់ស្តែងនៅតាមចិញ្ជើមផ្លូវ កំណាត់ផ្លូវជាតិលេខ៥ ត្រង់ចន្លោះចាប់ពីក្បែការ៉ាសសាំងរបស់លោក ប៉ោ វណ្ណៈ ឆ្ពោះទៅលិចរហូតក្បែមូលដ្ឋានកងរាជអាវុធហត្ថក្រុងឃើញថា សំរាមគរ និងរាយប៉ាយ ធ្វើឲ្យជះខ្លិនស្អុយសឹងទ្រាំពុំបាន ពិសេសធ្វើឲ្យប៉ះពាល់ដល់សោភ័ណភាពទីក្រុងថែមទៀតផង។ដោយមើលឃើញបែបនេះនារសៀលថ្ងៃទី១០ ខែវិច្ឆិការ ឆ្នាំ២០២៥ មន្ត្រីសាលាក្រុងប៉ោយប៉ែត និងបរិស្ថាន ក្រោមការណែនាំចង្អុលបង្ហាញពីលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានសហការជាមួយក្រុមហ៊ុនប្រមូលសំរាម ស៊ិនទ្រី រួមនឹងអាជ្ញាធរមូលដ្ឋានក្នុងសង្គាត់ផ្សារកណ្តាល ក្រុងប៉ោយប៉ែត បាននាំយករថយន្តជិត ១០គ្រឿង បើកប្រតិបត្តិការទ្រង់ទ្រាយធំប្រមូលសំរាម នៅតាមបណ្តោយផ្លូវជាតិតែម្តង ។
លោក យ៉ុត ស៊ីយ៉ុន អនុប្រធានការិយាល័យសាធារណការ ដឹកជញ្ជូន អនាម័យ បរិស្ថាន និងសណ្តាប់ធ្នាប់សាធារណៈ បានឲ្យដឹងថា បញ្ហាសំរាមនេះអាជ្ញាធរយកចិត្តទុកដាក់ណាស់ ដើរប្រមូលជាប្រចាំទាំងនៅកន្លែងដីទំនេ និងតាមចិញ្ជើមផ្លូវសាធារណៈ ជាក់ស្តែងដូចពេលនេះជាដើម ហើយកន្លែងដែលកំពុងតែប្រមូលនេះកន្លងមកគឺមួយខែៗ ប្រមូលមិនចេះតិចដង ហើយក៏មិនចេះអស់ដែរ ដោយសារតែប្រជាពលរដ្ឋមួយចំនួន ពិសេសអាជីវករដែលលក់ដូរតាមរទេះ និងម៉ូតូកង់បីជាដើម នៅពេលពួគាត់ត្រលប់មកពីលក់វិញ គឺតែងតែយកមកក្រវែងចោលពាសវាលពាសកាល ណែនាំមិនព្រមស្តាប់ទាល់តែសោះ ភាគច្រើនពេលយប់ ។ដូច្នេះអាជ្ញាធរក៏សូមអំពាវនាវឲ្យប្រជាពលរដ្ឋយើងចូលរួមសំអាតបរិស្ថាន អនាម័យ ឲ្យបានគ្រប់ៗគ្នា បញ្ឈប់ការបោះចោលសំរាមបែបនេះទៀត ដើម្បីឲ្យទីក្រុងយើងស្អាត ទីក្រុងដែលគួរឲ្យចង់រស់នៅ។ ការចូលរួមរបស់បងប្អូនប្រជាពលរដ្ឋ គឺជាផ្នែកមួយជួយដល់មុខមាត់ក្រុង ខេត្ត និងប្រទេសជាតិយើងទាំងអស់គ្នាផងដែរ៕
