ខេត្តបន្ទាយមានជ័យ៖លោក យឹម សំណាង អភិបាលរង ខេត្តបន្ទាយមានជ័យ តំណាងឯកឧត្តម អ៊ុំ រាត្រី អភិបាលខេត្ត លោក បៀវ ថាន ប្រធានមន្ទីរធម្មការនិងសាសនាខេត្ត បានអញ្ជើញ ចូលរួមបុណ្យកាន់វេណទី៨ ត្រូវនឹងថ្ងៃទី១៥ ខែកញ្ញា ឆ្នាំ២០២៥ នៅវត្តស្រះរាំង ស្ថិតនៅក្នុងឃុំស្រះរាំង ស្រុកមង្គលបូរី ដែលម្ចាស់វេណ នាពេលនេះ ផ្ដួចផ្ដើមឡើងដោយ រដ្ឋបាលខេត្ត និងមន្ទីរធម្មការនិងសាសនាខេត្ត ក្រុមអាចារ្យខេត្ត និងសមាជិកក្រុមប្រឹក្សា នៃឃុំស្រះរាំង។ដោយក្នុងនោះបាននាំយកនូវគ្រឿងឧបភោគបរិភោគ បច្ច័យទៅប្រគេនដល់ព្រះសង្ឃនៅក្នុង វេណទី៨ នេះរួមមានរដ្ឋបាលខេត្តបន្ទាយមានជ័យចំនួន ៥០ម៉ឺនរៀល និងសម្ភារៈបរិក្ខារមួយចំនួន ក្រុមការងារថ្នាក់ជាតិចុះមូលដ្ឋាននៃឃុំស្រះរាំងបច្ច័យចំនួន២០ម៉ឺនរៀល និងសម្ភារៈបរិក្ខារ រដ្ឋបាលស្រុកមង្គលបូរីបច្ច័យចំនួន២៥ម៉ឺនរៀល និងក្រុមការងារមន្ទីរធម្មការនិងសាសនាខេត្តចំនួន ២លាន ៦៤ម៉ឺនរៀល។
លោក យឹម សំណាង អភិបាលរង ខេត្តបានមានប្រសាសន៍ថា បុណ្យកាន់បិណ្ឌភ្ជុំបិណ្ឌគឺជាពិធីបុណ្យប្រពៃណីជាតិមួយដែលធំជាងគេ ក្នុងចំណោមពិធីបុណ្យទាំងឡាយទាំងពួង ចំពោះអ្នកជឿជាក់នៃព្រះពុទ្ធសាសនា ។ពិធីបុណ្យកាន់បិណ្ឌភ្ជុំបិណ្ឌ យើងប្រារព្ធធ្វើឡើងដើម្បីឧទ្ទិសបង្សុកូលដល់មហាកុសលផលបុណ្យដល់ដួងវិញ្ញាណក្ខន្ធមាតាបិតា ញាតិការទាំងប្រាំពីរសន្ដាន ព្រមទាំងឧទ្ទិសមហាកុសលដល់បុព្វការីជនគ្រប់ជំនាន់ ពិសេសវិញ្ញាណក្ខន្ធ កងទ័ពដែលបានពលីជីវិតក្នុងបុព្វហេតុការពារជាតិមាតុភូមិការពារ ទឹកដីពីពួកចោរសៀម ដែលមានមហិច្ឆតាឈ្លានពានមិនចេះឈប់ឈរនោះ ។ដូចនេះ ក្នុងនាមរដ្ឋបាលខេត្តបន្ទាយមានជ័យ សូមធ្វើការអំពាវនាវដល់បងប្អូនប្រជាពលរដ្ឋទាំងអស់សូមជឿទុកចិត្តលើប្រមុខរាជរដ្ឋាភិបាលកម្ពុជា បំផុសស្មារតីលើកកម្ពស់សាមគ្គីធម៌ សច្ចធម៌ សង្គហធម៍ ស្នេហាជាតិ ប្រកបដោយបញ្ញាញាណសមតាមពុទ្ធឱវាទ។ សំដៅលើកកម្ពស់សុខភាពផ្លូវកាយ ចិត្តពង្រឹងគុណភាពសង្គម និងចូលរួមជាមួយរាជរដ្ឋាភិបាលកម្ពុជា ក្នុងការដោះស្រាយគ្រប់ការប្រឈម សម្រាប់ថែរក្សាសន្តិភាពបូរណភាពទឹកដី និងការអភិវឌ្ឍប្រទេសជាតិឲ្យមានការរីកចម្រើនជានិរន្ត៕
