បន្ទាយមានជ័យ ៖ ឯកឧត្តម ឡាំ ហេងហួត រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) តំណាងដ៏ខ្ពង់ខ្ពស់ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានដឹកនាំកិច្ចប្រជុំជាមួយមន្ទីរស្ថាប័នពាក់ព័ន្ធ អភិបាលក្រុង–ស្រុក ដើម្បីពិភាក្សា ពិនិត្យ វាយតម្លៃ ផលប៉ះពាល់ស្រូវរបស់បងប្អូនប្រជាកសិករ ដែលរងគ្រោះដោយសារទឹកជំនន់ ដើម្បីស្នើរសុំស្រូវពូជជូនដល់បងប្អូនប្រជាកសិករក្នុងការស្តារឡើងវិញ ។ កិច្ចប្រជុំ នេះប្រារព្ធធ្វើឡើងនៅសាលប្រជុំ ខ សាលាបន្ទាយមានជ័យ នាព្រឹកថ្ងៃទី១៥ ខែតុលា ឆ្នាំ២០២៦។
របាយការណ៍សង្ខេបរបស់ឯកឧត្តម អ៊ុំ រាត្រី អភិបាលខេត្ត ក៏បានមានប្រសាសន៍បញ្ជាក់ថា ក្នុងចំណោម៩ក្រុង–ស្រុក មានក្រុងប៉ោយប៉ែត,ស្រុកមង្គលបូរី និងក្រុងសិរីសោភ័ណ រងគ្រោះដោយសារទឹកជំនន់ប៉ះពាល់ខ្លាំង ជាងគេ ដែលបានធ្វើឱ្យប៉ះពាល់ដល់ផ្ទះសំបែង ផលដំណាំងរបស់បងប្អូប្រជាពលរដ្ឋ រួមនឹងហេដ្ឋារចនាសម្ព័ន្ធមួយចំនួនទៀត ។ ដោយឡែកស្រុកភ្នំស្រុកក៏មានផលប៉ះដំណាំរបស់បងប្អូនប្រជាពលរដ្ឋមួយចំនួនផងដែរ។ ឯកឧត្ដម បញ្ជាក់ថា គិតចាប់ពីទឹកជំនន់ចាប់ផ្តើមកើតឡើងពីថ្ងៃទី២៤ ខែកញ្ញា រហូតដល់ថ្ងៃទី១៣ ខែតុលា ទឹកបានចាប់ផ្តើមស្រកចុះវិលទៅរកសភាពធម្មតា តែតំបន់មួយចំនួននៅរងការលិចផ្ទះសំបែងពលរដ្ឋដោយសារនៅតំបន់ទំនាប និងពលរដ្ឋរស់នៅក្បែរមាត់ស្ទឹងជាដើម។ ហើយអាជ្ញាធខេត្ដ ក៏បានធ្វើការជាមួយមន្ទីរជំនាញដើម្បីធ្វើការស្រង់ទិន្នន័យពីផលប៉ះពាល់ ខូចខាតដំណាំរបស់បងប្អូនប្រជាពលរដ្ឋ ពិនិត្យមើលពីលទ្ធភាពស្រូវបងប្អូនកសិករដែលអាចស្ដារបាន នឹងមិនអាចស្ដារឡើងវិញបាន។ ជាមួយគ្នានោះឯកឧត្តម អ៊ុំ រាត្រី ក៏បានថ្លែងអំណរគុណដល់គណៈកម្មការគ្រប់គ្រងគ្រោះហន្តរាយ ដែលបានចូលរួមដោះស្រាយទាន់ពេលវេលាចំពោះបញ្ហាទឹកជំនន់នៅក្នុងខេត្តបន្ទាយមានជ័យ។
ឯកឧត្តម ឡាំ ហេងហួត ក៏បានបញ្ជាក់ ទឹកជំនន់ មិនត្រឹមតែបង្កផលប៉ះពាល់ទៅដល់ជីវភាពរបស់បងប្អូនប្រជាពលរដ្ឋប៉ុណ្ណោះទេ ប៉ុន្តែវាបានបំផ្លាញហេដ្ឋារចនាសម្ព័ន្ធ ក៏ដូចជាផលដំណាំរបស់ប្រជាកសិករ ជាពិសេសដំណាំស្រូវ បើទោះបីស្ថានភាពទឹកជំនន់ស្រកចុះក៏ដោយ ក្នុងនាមគណៈកម្មាធិការជាតិគ្រប់គ្រងគ្រោះមហន្តរាយ នៅតែបន្តយកចិត្តទុកដាក់ និងស្នើរដល់អាជ្ញាធរខេត្ត ក្រុង–ស្រុក រួមនឹងមន្ទីរជំនាញ ធ្វេីការវាយតម្លៃនៃការខូចខាតដំណាំស្រូវរបស់បងប្អូនប្រជាកសិករ ដើម្បីមានវិធានការជួយដោះស្រាយស្ដារ ផ្តល់ពូជជូនពួកគាត់មានលទ្ធភាពស្តារការដាំដុះស្រូវឡើងវិញ។
ជាមួយគ្នានោះដើម្បីឱ្យការអនុវត្តការងារឱកាន់តែមានប្រសិទ្ធភាព ឯកឧត្ដម បានផ្តល់អនុសាសន៍ចំនួន៣ រួមមាន ៖ ទី១ –កាផ្ទៀងផ្ទាត់ទិន្នន័យ ផលប៉ះពាល់ និងវយមតម្លៃការខូចខាតឱ្យបានត្រឹមត្រូវ កំណត់នូវចំនួនគ្រួសារដែលរងផលប៉ះពាល់ តាមបណ្តាក្រុង–ស្រុក, ទី២ –ការកំណត់តំបន់ណាដែលអាចស្តារឡើងវិញបាន និងមិនអាចស្តារបាន ដើម្បីស្នើរសុំពូជផ្តល់ជូនបងប្អូនប្រជាកសិករ និងទី៣ –មន្ត្រីជំនាញ បន្តសហការធ្វើការរួមគ្នា ជាមួយមូលដ្ឋាន ដើម្បីធ្វើការវាយតម្លៃនៃការខូចខាត ដើម្បីធ្វើសំណើរស្នើរសុំ ជំនួយស្បៀងគ្រាប់ពូជ និងវិធានការស្តារឡើងវិញ ឱ្យស្របទៅតាមតម្រូវកាជាក់ស្តែងប្រជាពលរដ្ឋ ៕
