(បន្ទាយមានជ័យ) ស្មារតីនៃការរួមសាមគ្គីភាព និងការជ្រោមជ្រែងគ្នាកាន់តែស្ដែងឡើងច្បាស់តាមរយៈសកម្មភាពបុណ្យទាននិងការធ្វើទានការរួមសាមគ្គីគ្នានូវតែបន្តប្រមូលផ្ដុំគ្នាធ្វើបុណ្យ ជាពិសេសបុណ្យកាន់វេនបិណ្ឌ ទោះបីក្នុងកាលៈទេសៈ ប្រទេសជាតិត្រូវប្រឈមមុខនិងសង្គ្រាមការគំរាមកំហែង ការឈ្លានពានពីសំណាក់ប្រទេសថៃយ៉ាងណាក៏ដោយ។ លោក ហង្ស រ៉ាត់ ទីប្រឹក្សាជាន់ខ្ពស់ សមាគមសម្ព័ន្ធយុវជនដើម្បីសន្តិភាព បានមានប្រសាសន៍លើកឡើងបែបនេះក្នុងឱកាសដែលលោកនិងលោក សយ ចាន់ធី អគ្គលេខាធិការរងទទួលផែនការងារទំនាក់ទំនងជាតិនិងអន្តរជាតិ តំណាងឲ្យឯកឧត្តមបណ្ឌិត សុខ ចាន់ភក្តី ប្រធានសមាគម និងលោក ឆុន វីរ: ប្រធានសមាគសាខាខេត្តបន្ទាយមានជ័យ រួមនឹងសមាជិកសមាជិកា បានបន្តកាន់វេនបិណ្ឌទី១២ នៅវត្តខ្មែរពុទ្ធភូមិជាយដែនសីមារាម ស្ថិតនៅក្នុងសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។ក្នុងឱកាសនោះដែរក៏មានការអញ្ជើញចូលរួមពីលោក ឈាន ចំរើន ប្រធាន ក្រុមប្រឹក្សាក្រុងប៉ោយប៉ែតផងដែរ ។
នាល្ងាចថ្ងៃទី០៧ ខែតុលា ឆ្នាំ២០២៦ លោក ហង្ស រ៉ាត់ និងលោក ឆុន វីរ: បានដឹកនាំសមាជិកសមាជិកា អញ្ជើញចូលរួមសូត្រមន្តថ្វាយបង្គំនមស្សការ ព្រះរតនត្រ័យ សមាទានសីល និមន្តព្រះសង្ឃសូត្រមន្តចម្រើនព្រះបរិត្ត និងសម្ដែងធម៌ទេសនា តាមបែបបទទំនៀមទំលាប់ប្រពៃណីនិងជំនឿសាសនា ។លុះព្រឹកថ្ងៃទី០៨ ខែតុលា បានប្រគេនយាគូ រាប់បាត្រ និងវេរភត្ថាហារប្រគេនព្រះសង្ឃ ដើម្បីឧទ្ទិសដល់វិញ្ញាណក្ខន្ធបុព្វការីជន មាតាបិតា ជីដូនជីតា និងញាតិការទាំង៧សន្ដាន ដែលបានចែកឋានទៅកាន់បរលោកខាងមុខ ជាកិច្ចបញ្ចប់បិណ្ឌវេណទី១២ ប្រកបដោយសទ្ធាជ្រះថ្លា ។
លោក ហង្ស រ៉ាត់ បានបញ្ជាក់ថា សមាគមសម្ព័ន្ធយុវជនដើម្បីសន្តិភាព ដែលដឹកនាំដោយឯកឧត្តមបណ្ឌិត សុខ ចាន់ភក្តី ជាប្រធានសមាគមតែងតែបំផុសបំផុលដាស់ស្មារតីដល់យុវជន និងបងប្អូនប្រជាពលរដ្ឋ អាជីវករ ពាណិជ្ជករ និងសប្បុរសជននានាទាំងក្នុងស្រុកនិងក្រៅស្រុក ចូលរួមចំណែកជាមួយអាជ្ញាធរគ្រប់លំដាប់ថ្នាក់ ប្រមុខរាជរដ្ឋាភិបាលកម្ពុជា ដើម្បីកាត់បន្ថយភាពក្រីក្រ ផ្ដល់ជាសម្ភារៈ អំណោយ ស្បៀងអាហារនិងថវិកា តាមរយៈសមាគម ផ្តល់ជូនដល់ប្រជាពលរដ្ឋដែលមានជីវភាពខ្វះខាត ដោយផ្ទាល់មិនរើសអើងឋានៈ ពណ៌សម្បុរ និងនិន្នាការនយោបាយឡើយ ពិសេសជូនដល់វីរៈកងទ័ពដ៏អង្គអាចក្លាហានដែលកំពុងឈរជើងការពារបូរណៈភាពទឹកដីពីការឈ្លានពានរបស់ទាហានថៃ នៅតាមខ្សែបន្ទាត់ព្រំដែន៕
