បន្ទាយមានជ័យ ៖ អគារផ្នែកសម្ភព និងរោគស្ត្រី របស់មន្ទីរពេទ្យបង្អែកព្រះនេត្រព្រះ ក្រោមជំនួយមូលនិធិកូរ៉េសម្រាប់ការថែទាំសុខភាពអន្តរជាតិ (KOFIH) ត្រូវបានដាក់សម្ពោធដាក់ឱ្យប្រើប្រាស់ជាផ្លូវការ ដែលវាមានតួនាទីយ៉ាងសំខាន់ក្នុងការថែទាំសុខភាពស្ត្រី និងទារក ចាប់តាំងពីកំឡុងពេលមានផ្ទៃពោះ។ពិធីសម្ភោធដាក់ឱ្យប្រើប្រាស់ជាផ្លូវការនូវអគារផ្នែកសម្ភពរបស់មន្ទីរពេទ្យបង្អែកព្រះនេត្រព្រះ ប្រារព្ធធ្វើឡើងក្រោមអធិបតីភាពដ៏ខ្ពង់ខ្ពស់ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងឯកឧត្តម Kim Chang Yong ឯកអគ្គរដ្ឋទូតសាធារណរដ្ឋកូរ៉េ ប្រចាំព្រះរាជាណាចក្រកម្ពុជា នារសៀលថ្ងៃទី០៦ ខែសីហា ឆ្នាំ ២០២៦។
ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ មានប្រសាសន៍ថា អគារសម្ភព ដែលបាននិងកំពុងដាក់សម្ភោធឱ្យប្រើប្រាស់ជាផ្លូវការនៅពេលនេះ គឺស្ថិតក្នុងគម្រោងពង្រឹងសេវា សង្គ្រោះបន្ទាន់ផ្នែកសម្ភពនិងទារកទើបនឹងកើត (EmONC) បានចំណាយថវិកាសរុប ៣៩៨,៣៩៥.៩៨ ដុល្លារ ដោយមិនគិតបញ្ចូល សម្ភារៈបរិក្ខាពេទ្យ និងការបំពាក់គ្រឿងសង្ហារឹម។ អគារនេះ មានបណ្តោយ៥០,២ម៉ែត្រគុណទទឹង១៥ម៉ែត្រ ដំបូលប្រក់ក្បឿង មានចំនួន២៨បន្ទប់ និងមានបន្ទប់ទឹកចំនួន១២ ក្នុងនោះ បន្ទប់ជនពិការចំនួន២បន្ទប់។ ចាប់ផ្តើមសាងសង់នៅថ្ងៃទី២០ ខែតុលា ឆ្នាំ២០២៥ និងបញ្ចប់ជាស្ថាពរនៅថ្ងៃទី១ ខែកក្កដា ឆ្នាំ២០២៦ ជាមួយគ្នានេះ មន្ទីរពេទ្យបង្អែកព្រះនេត្រព្រះ បានចូលរួមបដិភាគថវិកាចំនួន ៤៩,៦០០ដុល្លារ លើការចាក់ដី ការតសំយ៉ាបបន្ថែម ការតសំយ៉ាបខាងមុខអគារ ការធ្វើរបង ការចាក់បេតុងខាងមុខអគារ និងការកែលម្អសួនច្បារ។
ឯកឧត្តម Kim Chang Yong ឯកអគ្គរដ្ឋទូតសាធារណរដ្ឋកូរ៉េ ប្រចាំព្រះរាជាណាចក្រកម្ពុជា មានប្រសាសន៍ ថា រាជរដ្ឋាភិបាលនៃសាធារណរដ្ឋកូរ៉េ និងអង្គការ KOFIH បានធ្វើការយ៉ាងជិតស្និទ្ធក្នុងកិច្ចសហប្រតិបត្តិការជាមួយរាជរដ្ឋាភិបាលកម្ពុជា ដើម្បីពង្រឹងសមត្ថភាពថែទាំសង្គ្រោះបន្ទាន់ផ្នែកសម្ភព និងទារកទើបនឹងកើតនៅភាគពាយព្យនៃប្រទេសកម្ពុជា កាត់បន្ថយមរណភាពដែលអាចការពារបាន និងបង្កើតប្រព័ន្ធថែទាំសុខភាពដែលមានភាពម្ចាស់ការ និងចីរភាព។ ឯកឧត្ដម បន្តថា អគារសម្ភព គឺជាផ្លែផ្កានៃសាមគ្គីភាពដ៏មានអត្ថន័យ ដែលរាជរដ្ឋាភិបាលកម្ពុជា រាជរដ្ឋាភិបាលនៃសាធារណរដ្ឋកូរ៉េ និងសហគមន៍មូលដ្ឋានបានចាប់ដៃគ្នាសំដៅទៅរកគោលដៅរួមមួយ។ អគារសម្ភពត្រូវបានបំពាក់ដោយឧបករណ៍វេជ្ជសាស្ត្រសង្គ្រោះបន្ទាន់ចាំបាច់រួមមាន ៖ ឧបករណ៍វះកាត់ឆ្មប និងសម្រាលកូន ឧបករណ៍ស្តាប់ចលនាបេះដូងទារក (fetal Dopplers) និងឧបករណ៍បូមទាញទារក ដែលអនុញ្ញាតឱ្យមានការថែទាំបន្ទាន់ និងជំនាញវិជ្ជាជីវៈ ទោះបីជាក្នុងស្ថានភាពសម្រាលកូនដែលមានហានិភ័យខ្ពស់ និងស្ថានភាពសង្គ្រោះបន្ទាន់ក៏ដោយ។
ឯកអគ្គរដ្ឋទូតសាធារណរដ្ឋកូរ៉េ បានបញ្ជាក់ ថា រាជរដ្ឋាភិបាលនៃសាធារណរដ្ឋកូរ៉េ និងអង្គការ KOFIH នឹងនៅតែជាដៃគូដ៏រឹងមាំ ដែលដើរទន្ទឹមគ្នាជាមួយប្រជាជនកម្ពុជា ដើម្បីជីវិតប្រកបដោយសុខភាពល្អ និងអនាគតដ៏ភ្លឺស្វាងរបស់ពួកគេ។
ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ក៏បានថ្លែងអំណរគុណរដ្ឋាភិបាលសាធារណៈរដ្ឋកូរ៉េ តាមរយៈមូលនិធិកូរ៉េសម្រាប់ការថែទាំសុខភាពអន្តរជាតិ (KOFIH) ដែលបានចូលរួមចំណែកលើកកម្ពស់វិស័យសុខាភិបាលនៅក្នុងប្រទេសកម្ពុជា។ ឯកឧត្ដម សាស្ត្រាចារ្យ បន្តថា ក្រោមការដឹកនាំដោយរាជរដ្ឋាភិបាល នីតិកាល ទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា បាននាំមកនូវការអភិវឌ្ឍ និងសមទ្ធិផលថ្មីៗជាច្រើន ដែលក្នុងនោះវិស័យសុខាភិបាល បានចាត់ទុកជាអទិភាពទី១ នៃគោលនយោបាយអទិភាពទាំង៦ចំនុច ការពង្រីកសេវាសុខភិបាលឆ្ពោះគ្របដណ្តប់ជាសកល ខណៈផែនទីចង្អុរផ្លូវឆ្ពោះទៅកាន់ការគ្រប់ដណ្តប់សុខភាពជាសកល នាឆ្នាំ២០៣៥ ដែលត្រូវបានប្រកាសឱ្យអនុវត្តរួចហើយ។
ឯកឧត្ដម រដ្ឋមន្ត្រី បន្តថា ដើម្បីឆ្ពោះទៅរកសម្រេច និងគោលដៅការគ្របដណ្តប់សុខភាពជាសកល សុខភាមាតា និងទារក គឺជាសូចនាករដ៏សំខាន់មួយដែលឆ្លុះបញ្ចាំងគុណភាពប្រព័ន្ធសុខាភិបាលរបស់ប្រទេសមួយ។ ដូច្នេះការវិនិយោគសុខភាពមាតា និងទារក មិនមែនគ្រាន់តែជាការវិនិយោគវិស័យសុខាភិបាលប៉ុណ្ណោះទេ ថែមទាំងវិនិយោគទៅលើមូលធនមនុស្សលើអនាគត់របស់កុមារ និងសមត្ថភាពប្រកួតប្រជែងរបស់ប្រទេសជាតិ។
ឯកឧត្ដម បញ្ជាក់ថា នៅពេលទារកកើតមកដោយសុវត្ថិភាព មិនត្រឹមតែគ្រួសារមួយទទួលបានសេចក្តីសុខប៉ុណ្ណោះទេ ប្រទេសជាតិទាំងមូលក៏ទទួលបានអនាគត់មួយដ៏ប្រសើរផងដែរ។សូមបញ្ជាក់ថា អគារផ្នែកសម្ភព ដែលត្រូវដាក់សម្ពោធឱ្យប្រើប្រាស់ជាផ្លូវការ ក្រោមមូលនិធិកូរ៉េសម្រាប់ការថែទាំសុខភាពអន្តរជាតិ (KOFIH) មិនត្រឹមតែជាការបន្ថែមហេដ្ឋារចនាសម្ព័ន្ធប៉ុណ្ណោះទេ ប៉ុន្តែជាការឆ្លើយតបដោយផ្ទាល់ចំពោះតម្រូវការជាក់ស្តែងរបស់ប្រជាពលរដ្ឋ នឹងជួយបង្កើនសមត្ថភាពរបស់មន្ទីរពេទ្យបង្អែកព្រះនេត្រព្រះ ក្នុងការផ្តល់សេវាសម្ភព និងសង្គ្រោះបន្ទាន់ផ្នែកមាតា និងទារកទើបនឹងកើត (EmONC) ឱ្យកាន់តែមានប្រសិទ្ធភាព សុវត្ថិភាព និងទាន់ពេលវេលា ស្របតាមស្តង់ដារបច្ចេកទេសរបស់ក្រសួងសុខាភិបាល។ អ្វីដែលសំខាន់ជាងនេះទៅទៀត សមិទ្ធផលនេះ នឹងជួយកាត់បន្ថយការលំបាករបស់ប្រជាពលរដ្ឋក្នុងការស្វែងរកសេវាសុខាភិបាល។ ស្ត្រីមានផ្ទៃពោះ និងអ្នកជំងឺនៅតំបន់ឆ្ងាយៗ នឹងអាចទទួលបានការពិនិត្យ ការសម្រាលកូន និងការសង្គ្រោះបន្ទាន់បានកាន់តែឆាប់រហ័ស ដោយមិនចាំបាច់ធ្វើដំណើរឆ្ងាយ ឬរង់ចាំការបញ្ជូនទៅមន្ទីរពេទ្យនៅតំបន់ផ្សេងទៀតឡើយ។ ការណ៍នេះមិនត្រឹមតែជួយកាត់បន្ថយហានិភ័យសម្រាប់មាតា និងទារកប៉ុណ្ណោះទេ ប៉ុន្តែថែមទាំងជួយកាត់បន្ថយបន្ទុកសេដ្ឋកិច្ច និងពេលវេលារបស់គ្រួសារប្រជាពលរដ្ឋផងដែរ៕
