បន្ទាយមានជ័យ៖ដោយសារអស់ជំនឿ និងការភូតកុហក់ដោះសារច្រើនលើកច្រើនសាររបស់ក្រុមហ៊ុន ពៅ វណ្ណា ពុះដីល្វែងលក់ក្នុងគម្រោងទី១០ និងទី១១ ស្ថិតនៅក្នុងភូមិសិលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាប់នឹងព្រំប្រទល់ក្រុងប៉ោយប៉ែតនៃតំបន់សេដ្ឋកិច្ចពិសេសអូនាង ថាដោះស្រាយជូនពលរដ្ឋដែលជាអតិថិជនរបស់ខ្លួនដែលបានទិញដីល្វែង អស់រយះពេលជាច្រើនឆ្នាំមិនបានដីនោះ នាព្រឹកថ្ងៃទី៦ ខែសីហា ឆ្នាំ២០២៦ ពួគាត់ដែលជាជនរងគ្រោះប្រមាណជា៥០នាក់ក្នុងចំណោម ៨៧៥នាក់ ដែលភាគច្រើនជាអ្នករស់នៅក្រុងប៉ោយប៉ែត បាននាំគ្នាមទៅសាលាខេត្តបន្ទាយមានជ័យ ដើម្បីសុំកិច្ចអន្តរាគមន៍ពីអភិបាលខេត្តបន្ទាយមានជ័យ បើមិនបានដីទេសុំតែលុយមកវិញពីក្រុមហ៊ុន ពៅ វណ្ណា ពុះដីខ្យល់លក់។
លោក ឈី ឆន ជាពលរដ្ឋដែលរងគ្រោះក្នុងចំណោមពលរដ្ឋទាំង៨៧៥គ្រួសារ ដែលបានទិញពុះល្វែងពីលោកស្រី ពៅ វណ្ណា ជាភរិយាលោកមេឃុំ អូរបីជាន់ បានឲ្យដឹងថា មូលហេតុដែលពួកគាត់នាំគ្នាមកសាលាខេត្តគឺដើម្បីសុំឲ្យឯកឧត្តមអភិបាលខេត្តបន្ទាយមានជ័យ មេត្តាផ្តល់កិច្ចអន្តរាគមន៍ជួយជំរុញនិងដោះស្រាយឲ្យក្រុមហ៊ុនដីឡូ ពៅ វណ្ណា រកដំណោះស្រាយទទួលខុសត្រូវជូនពួកគាត់ជាម្ចាស់ទិញដី បានដីបើមិនបានដីត្រូវសងលុយមកវិញ។
លោកបន្តថា ពលរដ្ឋបានជួបប្រជុំដោះស្រាយជាមួយក្រុមហ៊ុន ពៅ វណ្ណា ចំនួន ៥លើកមកហើយ តែពុំមានដំណោះស្រាយអ្វីឲ្យពួកគាត់ជឿទុកចិត្តឡើយ។បើទោះបីបានជួបដោះស្រាយជាមួយឯកឧត្តម ប៉ាន់ ខែម ប៊ុនថន ចំនួន ២លើក ដែលសរុប ៧លើកនេះចាប់តាំងពីឆ្នាំ២០២៥ រហូតដល់ពេលនេះនូវតែពួកគាត់មិនអាចទទួលបានដំណោះស្រាយដដែល ទាំងក្រោយកិច្ចប្រជុំ កាលពីថ្ងៃទី០៣ ខែកុម្ភៈ ឆ្នាំ២០២៦ ជាមួយឯកឧត្តមបណ្ឌិត ប៉ានខែម ប៊ុនថន ក្រុមហ៊ុនបានសន្យាថា នឹងដោះស្រាយជូនឱ្យបានដាច់ខែកុម្ភៈ ឆ្នាំ២០២៦ ប៉ុន្តែគិតត្រឹមថ្ងៃទី០៥ ខែសីហា ឆ្នាំ២០២៦ នេះ ក្រុមហ៊ុនមិនត្រឹមតែមិនមានដំណោះស្រាយប៉ុណ្ណោះទេ ថែមទាំងបានឲ្យអតិថិជនរងចាំដោយមិនមានពេលកំណត់ និងមិនព្រមធ្វើកិច្ចសន្យាជាផ្លូវការណ៍ជាមួយអតិថិជនឡើយ ដែលជាចេតនាគេចវេសមិនទទួលខុសត្រូវ និងធ្វើឱ្យប្រជាពលរដ្ឋមានការព្រួយបារម្ភយ៉ាងខ្លាំង។ពលរដ្ឋជាច្រើនទៀតបានលើកឡើងចោទជាសំណួរដល់មន្ត្រីរដ្ឋបាលខេត្តមន្ទាយមានជ័យ ថាតើត្រូវប្រើពេលប៉ុន្មានឆ្នាំទៀតបានចប់។បើកាលទិញដីខាងក្រុមហ៊ុន ពៅ វណ្ណា អះអាងថា ដីគ្មានជម្លោះបើមានជម្លោះក្រុមហ៊ុនសងមួយគុណជា៥ តែជាក់ស្ដែងដីមានជម្លោះពិតប្រាកដក្រុមហ៊ុនមិនព្រមចូលខ្លួនដោះស្រាយជាមួយអតិថិជនពីមួយឆ្នាំទៅមួយឆ្នាំទាំងអតិថិជនយកលុយទិញដី ពីធនាគារត្រូវបង់មួយខែ៤៥០ដុល្លា។ តើក្រុមហ៊ុនគិតជួយរំលែកដល់អតិថិជនឬយ៉ាងណា។ឬឲ្យអតិថិជនបង់ការប្រាក់រហូតដល់ក្រសួងដោះស្រាយចប់ តើការប្រាក់អ្នកណាជាអ្នកទទួលខុសត្រូវ។
លោក ស៊ុំ ចន្ទគា មន្ត្រីសម្របសម្រួលសមាគមអាដហុកប្រចាំខេត្តបន្ទាយមានជ័យ បានឲ្យដឹងនៅថ្ងៃទី៦ ខែសីហា ឆ្នាំ២០២៦ថា បញ្ហាទំនាស់ដីធ្លីដែលប្រជាពលរដ្ឋមកសាលាខេត្តនេះគឺទំនាស់ជាមួយលោកស្រី ពៅ វណ្ណា តាមព័ត៌មាននិងឯកសារទទួលបាន លោកស្រី ពៅវណ្ណា ត្រូវលោកឧកញ្ញា លី សាយឃាង ប្តឹងចោទប្រកាន់យកដីរបស់គាត់ទៅពុះអង្កន់លក់ហើយត្រូវបានលោកប្តឹងរក្សាការពារ មិនឱ្យមានការលក់ទិញចេញបណ្ណកម្មសិទ្ធិ។ អញ្ជឹងអ្នកដែលរងផលប៉ះពាល់គឺពលរដ្ឋ ។លោកបន្តថា បញ្ហាទំនាស់ដីធ្លីកើតឡើងច្រើន ប៉ុន្តែសំខាន់ទំនាស់ពេលកើតឡើងអ្នកណាជាម្ចាស់ទំនាស់ត្រូវចូលខ្លួនដោះស្រាយ។លោកបន្តថា បញ្ហាទំនាស់ដីធ្លីនៅខេត្តបន្ទាយមានជ័យបច្ចុប្បន្នពុំសូវមានច្រើនដូចកាលពីដើមដែល ដីមិនមានហាងឆេងថ្លៃនោះទេ។ តែអ្វីដែលសំខាននៅខេត្តបន្ទាយមានជ័យមានការខ្នះខ្នែងដោះស្រាយបញ្ហាដីធ្លីបានច្រើន៕
