បន្ទាយមានជ័យ ៖សាលាចំណេះទូទៅអ៊ែបភលនៅថ្ងៃទី២៨ ខែមិថុនា ឆ្នា២០២៦ បានរៀបចំកម្មវិធីប្រឡងប្រជែងសរសេរតាមអាន កម្រិតបឋមសិក្សាលើកទី១១ នៃកម្មវិធីសិក្សាជាតិ ថ្នាក់សាលា។ កម្មវិធីនេះបង្កើតឡើងក្នុងគោលបំណងដើម្បីលើកកម្ពស់អក្សរសាស្ត្រជាតិ ពង្រឹងសមត្ថភាព និងការចងចាំ ព្រមទាំងបណ្តុះភាពក្លាហាន និង ស្មារតីប្រកួតប្រជែងវិជ្ជមានដល់កូនៗសិស្សានុសិស្ស។
ក្នុងការប្រកួតនោះដែរ ត្រូវបានបែងចែកជា៤ក្រុម ដោយមានបេក្ខជនឆ្នើមចូលរួមសរុបចំនួន ៣២នាក់។ ចំពោះសិស្សជ័យលាភីដែលទទួលបានចំណាត់ថ្នាក់ល្អ នឹងទទួលបានការលើកទឹកចិត្តយ៉ាងពិសេស សម្រាប់ជ័យលាភីលេខ១ ទទួលបានមេដាយមាស១គ្រឿង, កាដូ ១កញ្ចប់ និងអាហារូបករណ៍សិក្សា៥០% រយៈពេលមួយត្រីមាស, ជ័យលាភីលេខ២ ៖ ទទួលបានមេដាយប្រាក់១គ្រឿង, កាដូ ១ កញ្ចប់ និងអាហារូបករណ៍សិក្សា ៤០% រយៈពេលមួយត្រីមាស, ចំណែកជ័យលាភីលេខ៣ ៖ ទទួលបានមេដាយសំរឹទ្ធ ១ គ្រឿង, កាដូ ១ កញ្ចប់ និងអាហារូបករណ៍សិក្សា ៣០% រយៈពេលមួយត្រីមាស។
លោក សៅ ធី ប្រធានក្រុមប្រឹក្សាភិបាល សាលាចំណេះដឹងទូទៅ អ៊ែបភល បានបញ្ជាក់ថា នេះជាឆ្នាំទី១១ ហើយ ដែលកម្មវិធីប្រកួតប្រជែងនេះត្រូវបានរៀបចំឡើងជារៀងរាល់ឆ្នាំ។ ចំពោះសេវាកម្ម និងកម្មវិធីសិក្សារបស់សាលា ដើម្បីគាំទ្រដល់ការប្រកួតប្រជែងនេះ ក៏ដូចជាការសិក្សា របស់សិស្សានុសិស្សពេញមួយឆ្នាំ សាលាចំណេះទូទៅអ៊ែបភល មានផ្តល់ជូននូវសេវាកម្មអប់រំចម្បង ចំនួនពីរគឺ ៖ ១–កម្មវិធីសិក្សាជាតិ ៖ មានចាប់ពីកម្រិតមត្តេយ្យសិក្សា ដល់បឋមសិក្សា ស្របតាមនិងទទួលស្គាល់ ដោយក្រសួងអប់រំ យុវជន និងកីឡា។ រាល់សិស្សានុសិស្សដែលបញ្ចប់ការសិក្សានៅទីនេះ គឺអាច បន្តការសិក្សាបានទាំងនៅគ្រឹះស្ថានសិក្សារដ្ឋ និងឯកជនទាំងអស់ទូទាំងប្រទេស ក្រោមការបង្រៀន ពីលោកគ្រូ–អ្នកគ្រូដែលមានជំនាញ និងឆ្លងកាត់ការបណ្តុះបណ្តាលគរុកោសល្យត្រឹមត្រូវ។ ២. កម្មវិធីសិក្សាអន្តរជាតិ ៖ ជាកម្មវិធីសិក្សាទំនើបចុងក្រោយរបស់ចក្រភពអង់គ្លេស ដែលធានាឱ្យ សិស្សានុសិស្សទទួលបានជំនាញ ស្តាប់ អាន សរសេរ និយាយ និងវេយ្យាករណ៍ភាសាអង់គ្លេស យ៉ាងពិតប្រាកដ។ បន្ថែមលើនេះ សាលាក៏មានបញ្ចូលកម្មវិធីសិក្សាភាសាចិនផងដែរ ដែលធ្វើឱ្យ សិស្សានុសិស្សទទួលបានចំណេះដឹងទាំងភាសាអង់គ្លេស និងភាសាចិនក្នុងពេលតែមួយ។
លោកបន្តថា ក្រៅពីកម្មវិធីសិក្សាដ៏រឹងមាំ សាលាក៏មានសេវាកម្មដឹកជញ្ជូនប្រកបដោយសុវត្ថិភាពខ្ពស់ ព្រមទាំងបរិយាកាសសិក្សាស្រស់ស្រាយ មានផាសុកភាព សុខសុវត្ថិភាព គុណភាពអប់រំល្អ និងការបណ្តុះឥរិយាបថល្អដល់សិស្សានុសិស្ស។ សាលាចំណេះទូទៅអ៊ែបភល តម្លៃសិក្សាសមរម្យ គុណភាពអប់រំល្អផងដែរ៕
