បន្ទាយមានជ័យ ៖ នៅព្រឹកថ្ងៃទី១៩ ខែឧសភា ឆ្នាំ២០២៦ ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ដឹកនាំកិច្ចប្រជុំ ត្រៀមរៀបចំគម្រោងកែលម្អក្នុងក្រុងសិរីសោភ័ណ។ កិច្ចប្រជុំនេះបានធ្វើឡើងនៅសាលប្រជុំ ក សាលាខេត្តបន្ទាមានជ័យ ដោយមានការចូលរួមពីលោក ឈឿន ក្រៃយ៉ុង អភិបាលរង ខេត្ត លោក ណង វុទ្ធី នាយករដ្ឋបាលខេត្ត លោក សុក ចាន់ថា ប្រធានមន្ទីរសាធារណការ និងដឹកជញ្ជូនខេត្ត លោក ស្រេង សុផល អភិបាលក្រុងសិរីសោភ័ណ មន្ត្រីជំនាញខេត្ត និងក្រុង ចៅសង្កាត់ចំនួន៤ ក្នុងក្រុងសិរីសោភ័ណផងដែរ ។
ដើម្បីឱ្យគម្រោងសម្រេចបានជោគជ័យ អនុវត្តនៅឆ្នាំ២០២៧ខាងមុខឯកឧត្តម អ៊ុំ រាត្រី អភិបាលខេត្ត ក៏បានធ្វើការណែនាំដល់អាជ្ញាធរក្រុងសិរីសោភ័ណ ក៏ដូចជាសង្កាត់ពាក់ព័ន្ធទាំង៤នៅក្នុងក្រុង ត្រូវរៀបចំក្រុមការងារធ្វើការសិក្សាវាយតម្លៃទៅលើគម្រោងឱ្យបានល្អិតល្អន សិក្សាពីផលប៉ះពាល់នៃការអភិវឌ្ឍគម្រោង ក្នុងការសម្របសម្រួលដោះស្រាយ សុំឱ្យបងប្អូនប្រជាពលរដ្ឋចូលរួមទាំងអស់គហនាដើម្បីកែលម្អសោភ័ណ្ឌភាពក្រុងកាន់តែមានភាពស្រស់ស្អាតនិងមានភាពបៃតង។
ចំពោះគម្រោងកែលម្អក្រុងគ្រោងនិងចាប់ផ្តើមអនុវត្តន៍ នៅឆ្នាំ២០២៧ខាងមុខ ប្រវែងផ្លូវមានការរៀបចំក្រាលការ៉ូឡាធ្វើផ្លូវដើរ ចំនួន៦ខ្សែ រួមមាន ៖ ១–ប្រវែងផ្លូវពីភ្លើងស្តុបសួនម្ទេសក្រហម ដល់ ផ្លូវកែងជាប់សាលាក្រុង ២៣៥៣ម៉ែត្រ, ២–ប្រវែងផ្លូវកែងជាប់សាលាក្រុង ដល់ផ្លូវបេតុងជាប់របងសាលារៀនពង្រ ១៣៥៦ម៉ែត្រ, ៣–ប្រវែងផ្លូវពីស្ពានទី២ (ផ្លូវជាតិលេខ៦) ដល់ស្ពានទឹកថ្លា ៨២៥០ម៉ែត្រ, ៤–ប្រវែងផ្លូវពីរង្វង់មូលដៃ៣២(ផ្លូវជាតិលេខ៥) ដល់រង្វង់មូលស្រីគ្រប់ល័ក្ខ ៧៨៨ម៉ែត្រ, ៥–ប្រវែងផ្លូវពីរង្វង់មូលស្រីគ្រប់ល័ក្ខ (ផ្លូវជាតិលេខ៥) ដល់ផ្លូវរទេះភ្លើង ៦២៤ម៉ែត្រ, ៦–ប្រវែងផ្លូវពីរង្វង់មូលស្រីគ្រប់ល័ក្ខ (ផ្លូវជាតិលេខ៦) ដល់ផ្លូវខាងមុខសណ្ឋាគារណាសារ ៩៤១ម៉ែត្រ៕
