(បន្ទាយមានជ័យ) ដោយមានការណែនាំពីឯកឧត្តមបណ្ឌិត សុខ ចាន់ភក្តី ប្រធានសមាគមសម្ព័ន្ធយុវជនដើម្បីសន្តិភាព លោកបណ្ឌិត ឌីម សុខុន អគ្គលេខាធិការ សមាគម នាថ្ងៃទី១៤ ខែឧសភា ឆ្នាំ២០២៦ លោក ឆុន វីរៈ ប្រធានសមាគម សាខាខេត្តបន្ទាយមានជ័យ អមដំណើរប្រធាន អនុប្រធានផ្នែក និងសមាជិក សមាជិកានៃសមាគមសម្ព័ន្ធយុវជនដើម្បីសន្តិភាព ក្នុងនោះក៏មានការនិមន្ត និងអញ្ជើញចូលរួមពីលោក ហង្ស រ៉ាត់ អគ្គលេខាធិការរង សមាគម ព្រះសង្ឃ រួមនឹងអាជ្ញាធរ បានចុះសួរសុខទុកនិងនាំយកនូវអំណោយជាគ្រឿងឧបភោគ បរិភោគ បារី ថ្នាំពេទ្យ ប្រគល់ជូនដល់រីរៈកងទ័ពដ៏អង្គអាចក្លាហានជួរមុខ ចំនួន ៤គោលដៅ ក្នុងភូមិសាស្ត្រស្រុកថ្មពួក ខេត្តបន្ទាយមានជ័យ។អំណោយដែលត្រូវចែកជូនដល់វីរៈកងទ័ពជួរមុខ ដែលកំពុងឈរជើងការពារបូរណភាពទឹកដី មិនអនុញ្ញាតឲ្យកងទ័ពឈ្លានពានសៀមមករំលោភលើបូរណភាពទឹកដីកម្ពុជាយើងនោះរួមមាន : ទឹកបរិសុទ្ធ , សៀង , ពងទា , បារី និងថ្នាំពេទ្យផងដែរ ។
លោក ហង្ស រ៉ាត់ ក្នុងនាមអគ្គលេខាធិការរង សមាគម និង លោក ឆុន វីរៈ ប្រធានសមាគម សាខាខេត្តបន្ទាយមានជ័យ បានមានប្រសាសន៍ថា អំណោយទាំងនេះគឺបានមកពីការជួយឧបត្ថម្ភពីថ្នាក់ដឹកនាំ និងសមាជិក សមាជិការ សមាគម រួមនឹងអាជីវករ ប្រជាពលរដ្ឋ ទោះបីពេលនេះអំណោយដែលចែកជូនមានតិចតួចមិនគ្រប់តាមតម្រូវការក៏ពិតមែន តែជាទឹកចិត្តចូលរួម ផ្ដល់នូវកម្លាំងចិត្តដល់កងទ័ពដ៏អង់អាចរបស់យើងដើម្បីផ្សារភ្ជាប់សមរភូមិមុខនិងសមរភូមិក្រោយ។
ជាមួយគ្នានោះដែរកងទ័ពដែលកំពុងឈរជើងនៅជួរមុខ បានថ្លែងនូវអំណរអរគុណយ៉ាងជ្រាវជ្រៅជូនចំពោះឯកឧត្តមបណ្ឌិត ប្រធានសមាគម និងសហការី ដែលជានិច្ចជាកាលតែងតែគាំទ្រនិងលើកទឹកចិត្តដល់កងទ័ពជួរមុខ ដែលកំពុងឈរជើងការពារបូរណភាពទឹកដី មិនអនុញ្ញាតឲ្យកងទ័ពឈ្លានពានសៀម មករំលោភលើបូរណភាពទឹកដីយើងបានឡើយ។នេះគឺជាកាយវិការដ៏ប្រពៃថ្លៃថ្លាផ្សារភ្ជាប់សមរភូមិមុខនឹងសមរភូមិក្រោយ ដែលកត្តានេះបានជួយជំរុញនិងលើកទឹកចិត្តដល់កងទ័ពជួរមុខឲ្យមានភាពមោះមុតអង់អាចក្លាហាននិងបំពេញភារកិច្ចបំរើជាតិ មាតុភូមិ ដោយមិនខ្លាចញញើត ជាមួយខ្មាំងសត្រូវ ពិសេសហ៊ានបូជាជីវិតជូនប្រទេសជាតិ ៕
