ខេត្តបន្ទាយមានជ័យ៖ការចុះអនុវត្តតាមសេចក្តីសម្រេចរបស់សាលាឧទ្ធរណ៍ខេត្តបាត់ដំបង របស់អាជ្ញាសាលាខេត្តបន្ទាយមានជ័យ នាព្រឹកថ្ងៃទី៨ ខែឧសភា ឆ្នាំ២០២៦ ដោយមានការចូលរួមពីគ្រប់ភាគី អាជ្ញាធរគ្រប់ជាន់ថ្នាក់ដែលមានកាតព្វកិច្ចក្នុងការចូលរួមអនុវត្ត ក្នុងសំណុំរឿងរដ្ឋប្បវេណីលេខ:២២៧ ចុះថ្ងៃទី២៣ ខែវិច្ឆិកា ឆ្នាំ២០២៣,សាលដីកា លេខ:១៦(គ) ចុះថ្ងៃទី១៧ ខែមករា ឆ្នាំ២០២៤,លិខិតបញ្ជាក់ចូលជាស្ថាពរនៃសាលដីកាលេខ: ៥៥លកសព/រវ ដែលមានម្ចាស់បំណុលឈ្មោះ ទៀ ប៊ុនលៀម មានលោក ឌឹម ចៅសេង ជាមេធាវីតំណាងដោយអាណត្តិ ដែលមានកូនបំណុលឈ្មោះ ហ៊ី ភី លើទីតាំងដីមួយកន្លែង ស្ថិតនៅក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ទទួលបានជោគជ័យ ដោយភាគីកូនបំណុលយល់ព្រមដោយស្ម័គ្រចិត្ត។
សូមជំរាបផងដែរថា នៅមុនពេលអនុវត្ត ភាគីខាងកូនបំណុលបានរៀបចំអោយមានការតវ៉ាប្រឆាំងនឹងការអនុវត្តនេះ ដោយប្រើមនុស្សដែលជួលបន្ទប់ស្នាក់នៅរបស់ខ្លួន មានទាំងចាស់ ទាំងវ័យជំទង់ស្រែកទាមទារកយុត្តិធម៌ មិនត្រឹមតែប៉ុណ្ណោះបានធ្វើសកម្មភាពថតឡាយផ្សាយផ្ទាល់តាមបណ្តាញសង្គម ដោយបានស្រែកចោទប្រកាន់មកលើអាជ្ញាសាលាខេត្ត អាជ្ញាធរ កងកម្លាំង ដោយមិនបានស្តាប់ហេតុផល និងពិនិត្យមើលឯកសារពាក់ព័ន្ធផ្លូវច្បាប់ ក្រោយពីមានការពន្យល់ពីនីតិវិធីផ្លូវច្បាប់,សេចក្តីសម្រេចពីតុលាការ រហូតឈានដល់ការអនុវត្ត ទើបភាគីកូនបំណុលគឺលោក ហ៊ី ភី យល់ព្រមដោយស្ម័គ្រចិត្ត។
អាជ្ញាសាលាខេត្តបន្ទាយមានជ័យ បានបញ្ជាក់ប្រាប់បណ្តាញសារព័ត៌មានថា រឿងនេះតុលាការបានសម្រេចទាំងបីថ្នាក់គឺបានឲ្យភាគីម្ចាស់បំណុលអនុវត្តឈ្នះ ហើយបានបង្គាប់ឲ្យកូនបំណុលរុះរើ និងចាកចេញពីទីតាំងអនុវត្ត ហើយមួយវិញទៀតមុនចុះអនុវត្តនេះលោកក៏បានជូនដំណឹងតាមនិតិវិធីច្បាប់មិនចេះតិចដង សូម្បីតែគាត់និងមេធាវីរបស់គាត់ក៏បានជូនដំណឹងដោយផ្ទាល់បន្ថែមទៀតផង ហើយពួគាត់ក៏ទទួលស្គាល់ហើយដែរ តែនូវពេលចុះអនុវត្តបែជាបង្កបញ្ហា តែទោះជាយ៉ាងណាលោកមិនប្រកាន់ទេ ការពិតនូវតែជាការពិត ជាលិតផលចុងក្រោយសម្របសម្រួលដោយយល់ព្រមឲ្យអនុវត្តដោយស្ម័គ្រចិត្ត ។
មេធាវី តំណាងឲ្យម្ចាស់បំណុលបានបញ្ជាក់ដែរថា រឿងនេះបានឈ្នះក្តីតាំងពីឆ្នាំ២០០២ មកម្លេះរហូតស្នើសុំការអនុវត្តនៅឆ្នាំ២០១៥ ប៉ុន្តែកូនបំណុលចេះតែប្រើនិតិវិធីពន្យាលពេលផង រករឿងប្តឹងផ្តល់ផង អូសបន្លាយរហូតមកដល់បច្ចុន្ននេះជា២០ឆ្នាំទៅហើយ ទើបពេលនេះអនុវត្តរួចរាល់ជាស្ថាពរ ដោយភាគីកូនបំណុលបានយល់ព្រមដោយស្ម័គ្រចិត្ត ៕
