(បន្ទាយមានជ័យ)៖នាថ្ងៃសុក្រ ៦រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវដឹងថ្ងៃទី២ ខែតុលា ឆ្នាំ២០២៦ លោក ហង្ស រ៉ាត់ ទីប្រឹក្សាជាន់ខ្ពស់ នៃសមាគមសម្ព័ន្ធយុវជនដើម្បីសន្តិភាព និងលោកស្រី បានដឹកនាំក្រុមការងារសាខាខេត្តបន្ទាយមានជ័យ អញ្ជើញចូលរួមពិធីបុណ្យកាន់បិណ្ឌវេនទី៦ នៅវត្តពោធិ៍សុវណ្ណសិលារាម (ហៅវត្តអណ្ដូងថ្មមាស) ស្ថិតនៅក្នុងភូមិអណ្ដូងថ្មមាស សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ។
នៅក្នុងឱកាសនោះ លោក ហង្ស រ៉ាត់ និងក្រុមការងារ បានអញ្ជើញក្រាបថ្វាយបង្គំ និងនាំយកទ័យទាន រួមជាមួយបរិក្ខារ ព្រមទាំងបច្ច័យមួយចំនួន ដែលជាសទ្ធាជ្រះថ្លា វេរប្រគេនដល់ព្រះសង្ឃ ព្រមទាំងបានចែកអំណោយជាសារ៉ុង និងអាវ ជូនដល់តាជី យាយជីផងដែរ ដើម្បីបង្សុកូលឧទ្ទិសមហាកុសលផលបុណ្យជូនចំពោះបុព្វការីជន ញាតិកាទាំង ៧ សន្ដាន និងវីរៈកងទ័ពដ៏អង់អាចក្លាហាន ដែលបានពលីជីវិតក្នុងបុព្វហេតុការពារជាតិ មាតុភូមិ ព្រមទាំងប្រជាជន ។
លោក ហង្ស រ៉ាត់ បានមានប្រសាសន៍ថា បុណ្យកាន់បិណ្ឌនិងភ្ជុំបិណ្ឌ គឺជាមរតកវប្បធម៌ដ៏ថ្លៃថ្លារបស់ជាតិខ្មែរ ដែលឆ្លុះបញ្ចាំងពីគុណតម្លៃនៃការដឹងគុណ ការគោរពបុព្វបុរសនិងសាមគ្គីភាពក្នុងសង្គម ។ការបន្តគោរពនិងប្រតិបត្តិពិធីបុណ្យប្រពៃណីនេះ គឺជាការចូលរួមថែរក្សានិងលើកស្ទួយអត្តសញ្ញាណវប្បធម៌ខ្មែរ និងពុទ្ធសាសនា ដែលជាសាសនារបស់រដ្ឋឲ្យបានគង់វង្ស និងបន្តពីជំនាន់មួយទៅជំនាន់មួយ។
លោក ហង្ស រ៉ាត់ ក្នុងនាមទីប្រឹក្សាជាន់ខ្ពស់សមាគម បានបញ្ជាក់ថា ការចូលរួមពិធីបុណ្យកាន់បិណ្ឌយ៉ាងផុសផុលពីសំណាក់សមាជិកសមាជិកាសាខាខេត្តបន្ទាយមានជ័យនេះដោយមានការណែនាំពីឯកឧត្តមបណ្ឌិត សុខ ចាន់ភក្តី ប្រធានសមាគម មិនត្រឹមតែចូលរួមពិធីបុណ្យតែប៉ុណ្ណោះទេ សមាគមបានចូលរួមចំណែកជាមួយប្រមុខរាជរដ្ឋាភិបាលកម្ពុជា ផ្នែកមនុស្សជួយដល់ប្រជាពលរដ្ឋដែលមានជីវភាពខ្វះខាត ពិសេសវីរៈកងទ័ពជួសមុខ ដែលកំពុងការពារបូរណភាពទឹកដី ពីការឈ្លានពានរបស់ប្រទេសថៃ ដោយធ្វើការគៀងគរអំណោយជាសម្ភារៈផ្សេងៗនិងថវិកា ពីសប្បុរសជននានាទាំងក្នុងនិងក្រៅស្រុក ដើម្បីយកចែកជូនដោយផ្ទាល់មិនគិតពីការនឿយហត់ឡើយ៕
