(បន្ទាយមានជ័យ) ដោយមានការគាំទ្រយ៉ាងខ្លាំងក្លាពីសំណាក់មាតាបិតា អាណាព្យាបាល សិស្ស សាលាបញ្ញាសាស្ត្រអន្តរជាតិ បានពង្រីកទីតាំងបន្ថែមនៅក្នុងទឹកដីក្រុងប៉ោយប៉ែត នៅព្រឹកថ្ងៃសុក្រ ទី២៨ ខែសីហា ឆ្នាំ២០២៦នេះបានរៀបចំពិធីសម្ពោធសាលាបញ្ញាសាស្ត្រអន្តរជាតិ សាខាក្រុងប៉ោយប៉ែត ក្រោមអធិបតីភាពលោក ឃូ ពៅ អភិបាលរងខេត្ត តំណាងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បណ្ឌិតព្រឹទ្ធាចារ្យសាសនូបត្ថម្ភក៍ កុល ផេង បិតាស្ថាបនិក សាកលវិទ្យាល័យបញ្ញាសាស្ត្រកម្ពុជា និងសាលាបញ្ញាសាស្ត្រអន្តរជាតិ ដោយមានការនិមន្ត និងអញ្ជើញចូលរួមពីព្រះមហាធម្មាលង្ការមុនី បណ្ឌិត ចាន់ សុជន ជាព្រះរាជាគណៈថ្នាក់កិត្តិយស និងជាព្រះគ្រូចៅអធិការវត្តប្រាសាទស្រះកណ្តាលខ្ចាស់ ព្រមទាំងលោក លោកស្រី អភិបាល.អភិបាលរងក្រុង ប្រធាន.អនុប្រធានមន្ទីរអប់រំយុវជន និងកីឡាខេត្ត អាជ្ញាធរមូលដ្ឋានភូមិ សង្កាត់ សិស្សានុសិស្ស និងអាណាព្យាបាលសិស្ស ស្ថិតនៅខាងលិចតារាងបាល់ទាត់មិត្តភាព ក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោក ឈុន ពេញ នាយកសាលារៀនបញ្ញាសាស្រ្តអន្តរជាតិ សាខាក្រុងប៉ោយប៉ែត បានឡើងមានប្រសាសន៍អោយដឹងថា៖សាលាបញ្ញាសាស្រ្តអន្តរជាតិ ជាសាលាចំណេះទូទៅឯកជនមួយ ដែលផ្តល់កម្មវិធីសិក្សាជាតិ និងអន្តរជាតិ ដែលមាន លោកតា បណ្ឌិត កុល ផេង ជាបិតាស្ថាបនិក។ ក្រោមការដឹកនាំដ៏ឈ្លាសវៃ របស់លោកតា ធ្វើអោយសាលាបញ្ញាសាស្រ្តអន្តរជាតិមានភាពរីកចម្រើនខ្ពស់ និងមានទីតាំងរហូតដល់ ៣០កន្លែង ទូទាំងប្រទេស។
លោក នាយកសាលារៀនបញ្ញាសាស្រ្តអន្តរជាតិ សាខាក្រុងប៉ោយប៉ែត បានបញ្ជាក់ថា៖សាលាបញ្ញាសាស្រ្តអន្តរជាតិ សាខាក្រុងប៉ោយប៉ែតជាសាខាទី២៩ ដែលមានអគារសិក្សាចំនួន២ដាច់ដោយឡែកពីគ្នា និងមានបន្ទប់សិក្សាទាំងអស់ ៣០បន្ទប់។ ហើយសាលាបានចាប់ផ្តើម ទទួលសិស្សចាប់តាំងពីថ្ងៃទី១ ខែកក្កដា ឆ្នាំ២០២៦មកម៉្លេះ ជាលទ្ធផលគិតត្រឹមថ្ងៃនេះ យើងទទួលបានសិស្សចំនួន១២៩នាក់ (៨៩នាក់ ពេញមួយថ្ងៃអន្តរជាតិ ១៨នាក់រៀនកន្លះថ្ងៃខ្មែរ និង២២នាក់រៀនកន្លះថ្ងៃអន្តរជាតិ)។
ថ្លែងនៅក្នុងឱកាសនោះបណ្ឌិតព្រឹទ្ធាចារ្យសាសនូបត្ថម្ភក៍ កុល ផេង និងលោក ឃូ ពៅ អភិបាលរងខេត្ត បានធ្វើការកោតសរសើរ និងសាទរចំពោះចំពោះវត្តមានរបស់សាលាបញ្ញាសាស្ត្រអន្តរជាតិ ដែលបានបង្ហាញវត្តមាននៅក្នុងក្រុងប៉ោយប៉ែតនាពេលនេះ ក្នុងគោលដៅបណ្ដុះបណ្ដាលធនធានមនុស្ស(ទំពាំងស្នងឬស្សី) ផ្ដោតទៅលើវិស័យអប់រំ។ ជាពិសេស សាលាបញ្ញាសាស្រ្តអន្តរជាតិ មានបាវចនា “វិន័យ គុណធម៌ សុភមង្គល“។
បណ្ឌិតព្រឹទ្ធាចារ្យសាសនូបត្ថម្ភក៍ កុល ផេង បានធ្វើការផ្ដាំផ្ញើដល់គណៈគ្រប់គ្រងសាលាបញ្ញាសាស្ត្រអន្តរជាតិ សាខាក្រុងប៉ោយប៉ែតទាំងអស់ ត្រូវបន្តខិតខំឱ្យអស់ពីកម្លាំងកាយចិត្ត ដើម្បីបង្ហាត់បង្រៀនសិស្សានុសិស្សឱ្យទទួលបាននូវចំណេះដឹងប្រកបដោយគុណភាព ដើម្បីចូលរួម ចំណែកបន្តនិរន្តរភាពអប់រំជាមួយក្រសួងអប់រំ យុវជន និងកីឡា ក្នុងការបណ្តុះបណ្តាល និងអភិវឌ្ឍធនធានមនុស្សក្នុងប្រទេសកម្ពុជា ស្របតាមចតុស្តម្ភរបស់ក្រសួងអប់រំគឺ ១,រៀនដើម្បីចេះដឹង ២,រៀនដើម្បីចេះធ្វើ ៣,រៀនដើម្បីមានសីលធម៌ល្អ ៤,រៀនដើម្បីចេះរស់នៅជាមួយគ្នា ក៏ដូចជាពាក្យស្លោក “ ការអប់រំសម្រាប់ទាំងអស់គ្នា ទាំងអស់គ្នាសម្រាប់ការអប់រំ “៕
